کانی وێست: یەک مەلیۆن دۆلار ئەرا هەر خاوەن مناڵیگ ئەگەر بویمە سەرۆک ئەمریکا
شەفەق نیوز/ راپەر ئەمریکی کانی وێست یەکەمین چالاکی هەڵمەت هەڵبژاردنی ئەرا سەرۆکایەتی ئەمریکا دەسکردەپی، لە نۆرس چاڕلیستون لە ولایەی ساوت کارولینا.
کانی لە سەرەتای وتارەگەی پێشنیارکرد وە پێشکەشکردن یەک ملیۆن دۆلار ئەرا هەرکەسیگ مناڵیگ دیرێد ئەگەر بویە سەرۆک ئاینده‌ی ئەمریکا. لەو چالاکیە سەدان لە جەماوەر ئامادەبوین، و وێست وە چاکەتیگ دەرچگ ك ژمارەی ٢٠٢٠ ناگەسە بان سەری.
لە وتارە دریژیگەی لەنوای جەماوەر ئەمریکی باس باوەتەیلیگ کرد جوور: کورتاجکردن، ودەرمان ریگری دووگیانی، وت: پیلان 'ب' نەمەن، تەنیا پلان 'ئ' هەس.
وێست وەختا باس کورتاج کردن کارداشیان هاووڕیی کرد لە نووزگەی دەسکردە گیرستن، و وت: کورتاج بایەسە یاسایی بوود، وەگەرد پشتگیری ئەرا ئەوانە ئەو کارەکەن، وتیش: هەر کەسیگ مناڵ دیرێد بایەسە یەک مەلیۆن دۆلار وەربگرێد. وەگورەی یاسایل وەلایەت ساوت کارولینا، ئەوەگ خوازێد خوەی کاندید بکەێد ئەرا هەڵبژاردن سەرۆکایەتی، بایەسە تا نیمەڕو رووژ دووشەممە ١٠٠٠٠ واژوو ودەس بارێد، تا بخریەێدە ناو لیست کاندیدەیل ئایندە.
وێست داوا لە جەماوەرەگەی کرد ئەرای دەنگ بیەن، تا بکەفێدە ناو کاندیدەیل لە ساوت کارولینا.
لە کۆبونەوەگە، ئامادەکەرەیل پەڵپ گردن ک بایەسە گشت میوانەگان دەمامەک و ماسک وەکاربارن، و بایەسە چەودیری لە دویرەکەفتن کۆمەڵایەتی بکەن، بەڵکم گرتەگان دەرخستن ک چەن کەسیگ دەمامەک وەکار ناوردنە، و گردەوبوینە له نزیک شانۆەگە.
