مەزهەر خالقی له‌شوون چەنه‌ها ساڵ بێدەنگی شكان
هونەرمەند مەزهەر خالقی له‌شوون 35 ساڵ ئه‌ڕا یەكەمجار قاپی وه‌ڕوی میدیای حكوومی ئيران واز ئەكاو وه‌ل بەش پارێزگای سنەی ماڵپەڕ ئیرنای زووانحاڵ فەرمی حكوومەت ئيران وتووێژ ئەكا. ئیرنا وەوجوورە هەواڵەگە بڵاوه‌وكردگەسەو "مەزهەر خالقی، هونەرمەندێگ ك له‌شوون چەنه‌ها ساڵ بێدەنگی شكان".
خالقی لەو وتووێژە ئويشێ كوردستان لەروی موزیك، ميلۆدی و فۆلكلۆر پێگەی گرنگێگ لە مۆسیقا ديرێ. بوين هونەرمەنده‌یل ژەنیار و گورانیچڕیش وە هۆكار سەرەكی پێشكەفتن مۆسیقا لە كوردستان زانێ.
خالقی باس لە شانازیكردن خوه‌ی وە نەتەوە و نیشتمانەگەی ئەكا و ئويشێ، كورد خاوەن كولتوورێگ دەوڵەمەنە و لە رووژهەڵات ناوڕاس پلەيگ تایبەت ديرێ. ئويشێديش نیشتمان و ملله‌ت كوردستان وەفادارترین و وە هەستترین ملله‌ت جه‌هانن.
باس لەوەيش ئەكا، ئەو وه‌ختەگ سەرۆك بەش رادیۆی پارێزگای كرماشان بويە، گرنگیگ تایبەت داسە زاراوەی كەڵهوری و تەنانەت نیشته‌جايه‌يل باشوور كوردستان لە سنوور قەسر شيرين نه‌ف له‌لێوەرگرتنە.
ا. ج
