لە سەردەم کۆڕۆنا.. چە خوەنیمن چە دوینیمن

لە سەردەم کۆڕۆنا.. چە خوەنیمن چە دوینیمن
2020-05-26T14:03:35+00:00

شه‌فه‌ق نیوز/ برێگ لە دەوڵەتەیل، سیاسەتیگ وەل زیدانیەیل وەکار تێەرن تا زیندانەیل سوکەو بکەن، ودووارە تاوانبارەیل تێکەڵ کۆمەڵگا بکەن، مرجیگ خەنە بانیان، ک هەرکەسیگ لەلیان بڕیگ دیاری کریاگ لەکتاو بخوەنێد، ماوەی سزاگەی کەمەو بوود، شایەت یە پلانیگ بوود سودیگ بڕەسنێگە کۆمەڵگا، بەڵکم ئایا مەغز تاوەنبارەگە ئاڵشت بوود، تەنیا وە کتاو خوەنستن؟، تایبەت خوەنستنیگ یا کتاویگ وە ئارازو خوەی نەویە؟، لەیرا بایەسە بکەفێمنە شوین چینیگ لەو تاوانبارەیلە ک وەخوەنستن چینەسەو ئەرا ناو کۆمەڵگا، وبزانیم ئایا خوەنستنەگە کارەگەری لەبان رەفتاریان داشتگە یا نە.
ئی باسە تیەێد، چوینکە هایمنە رەوشیگ لە شییوەگەی، ک ئازادی جموجویل نەمەنیە، هەمیش شیوەیگە لە زیندانی، لایەکلا ترەو بویەسە دەرفەتیگ ئەرا خوەنستن ئەو کتاوەیلەگ نەتویەنستیمن بخوەنیمنەی لەوەخت سەرقاڵی، یا تەماشای هەرچەگ خوازیمن لە فیلمەیل.
لەڕاسی، لەوەر ڤاێڕۆس کۆڕۆنا، کەفتیمنە زیایبوینیگ لە وەخت، ک ئیمە وەبی خوازین خوەمان هایمنە پشت دیوارەیل ماڵەیلمان، ئایا ئەو ئارازوە داشتیمنەی وەختا لەدەیشت ماڵەیلمان بویمن، وگوزران دوو ژیان، یەکیگیان ژیان تەماشای فیلم یا خوەنستن کتاو بوی، ئیەسە ئەو ئارازوە هیمان دیریمنەی؟ یا ئایا چشتیگ لەلی ئەنجام دریا؟.
هەڵبەت فرەیگ لەلیمان هەوڵدان ئەرا وەدەسهاوردن ئەی دەرفەتە، ئەرا وەدەسهاوردن ئامانجیان وە هوکارەی چشتیگ نوو، یا پیشەیگ نوو، ولەلای فرەی کەس، فیلم و کتاو خاسترین ری بوی ئەرا پڕەوکردن وەختو دەرفەتو ئارازو، یەیش بیگومان کاریگ فرە خاسە.
ئیسە بایمنەو ئەرا باوەت زیندانیەگان ک جوور رەوشەگەی ئیمەس، ئایا کار تەماشاکردنەگە هەر جوور ئەوە مینێد، ک زیندانیەگە ناچارە لە خوەنستەگە وئیمەیش ناچاریمن لەتەماشای فیلمەگان؟ ئایا خوازین کتاو خوەنستن وە وەخت بووشایی بوی وئایمیگ خوازید تەنیا وەخوەنست وه‌ختی پڕەو بکەێد؟.
سینما وفیلمەگان – تایبەت ئەوانەگ شیوەی هونەری گرنە خوەیان- لەیە فرەتر خوازید، کتاویش لەوە فەرەتر خوازید لە یەکیگ چەو گڕدەێدە بان نووسانەگانی تا وەختەگە بکوشێد.
با بایمنەو ئەرا كەشوهەوای فیلم دیەن ئی وەختە ، وتەماشای بکەیمن وەراورد كەشوهەوای فیلم دیەنمان لەوەختە ئاساییەگە. لە ژیان ئاساییەگە تو ئازادید، هەروەختیگ بتواێد لەماڵ دەرچید، وەگەرد دەرچگند بڕیگ چشت دوینێد، بڕیگ مەردم دوینێد، وهەڵویست و کورتە چیرۆک و رەوش جوراجور دوینێد، ک شایەت ئاره‌زویگ دەروینی لەلید پەیابوود، بوەێدەد وەرەو چالاکی روشنهویری، چ خوەنستن بوود، چ تەماشاکردن، ئاڵوزییگ وەگەرد خاوەن کارەگەد شایەت ئیوارە بوەیدەد ئەرا تەماشاکردن فیلمیگ کۆمیدی، تا دەرویند لە خوسەگە بشورێد، یا مرافەیگ وەل هاوسەرەگەد، بوەێدەد ئەرا فیلمیگ ترسناک یا نێزانم فیلمیگ مناڵانە یا شایەت فیلمیگ سیه‌ ‌وچەرمگ.
نیشتن کۆتایی هەفتەگە لە چایخانەیگ، هیلێگەد رۆمان ( چیرۆک دوو شار) ئەرا دیکینیز بخوەنێد، یا ( مینەی روزگاریگ گومابوی) ئەرا بڕۆست.
ژیان لە دەیشت ماڵ لە هەردوگ رەوش خوەشی وتەنگی، وەرپرسە لەبان دیاریکردن ئەو ژیانەگ هاناو ناخ، لەیراو تام تەماشا کردن وخوەنستن وەرگرێد، و بوودە بەشیگ لە ژیان وئەزمون تاکە کەس.
وەگورەی سیمینۆفیچ ڤیجۆتسکی؛ ( بایەسە تەماشای کۆمەڵگە بکریەێد لە پلەی یەکەم جوور هۆکار دیاری کار رەفتار مرۆڤ)، واتە کەسایەتی تاک لە پەیوەندیەگانی وەل ئەواکە دروس بوود ، نەگ ته‌نیا وە ئەزمون خوەیەتی.

Shafaq Live
Shafaq Live