تەهران قەیەغەی هاوردەکردنی کەێد.. ئایفۆن وە ملیاریگ دۆلار لە ماوەی 10 مانگ چوودە ناو ئیران
راپۆرتیگ ئاژانس تەسنیم ئیران، کە ئاژانس شەفەق نیوز ئەڵگەردانی کرد، لەناوی هاتگە، “لە ماوەی دە مانگ گوزەشتە ئامێرەیل ئایفۆن وە بەهای ملیاریگ دۆلار هاتیەسە ناو بازاڕ ئیران”، وتیش “یە لە وەختیگە کە هاوردەکردن مۆبایل ئایفۆن وە فەرمی ئەرا ناو ئیران قەیەغە کریاس و بەرهەمەیل ئی ئامێرە هەر لە مۆدێل ئایفۆن 14ەو توومار نەکریانە”.
راپۆرتەگە هاوردەکردن ئایفۆن وە بەهای یەک ملیار دۆلار لە ماوەی 10 مانگ گوزەشتە وە "شۆکیگ گەورەی دراو" باس کردگە.
لە راپۆرتەگە وتیش: "ئەپڵ هویچ ئامادەیییگ فەرمی لە ئیران نەیرێد و تەنانەت خزمەتگوزاریی نەرمەکاڵایش دابین نیەکەێد"، وتیش "ئەو ئامێرەیل ئایفۆنە کە رەسنە ئێرانییەیل فرەجار لە وڵاتەیل ترەک جویر ئیمارات هاوردە کریەن".
نرخ مۆبایلیگ جویر ئایفۆن 13 پرۆ ماکس کە بەرهەمی لە گشت جەهان وسیاس، لە بازاڕەیل ئیران زیاتر لە 100 ملیۆن تۆمان (نزیکەی دوو هەزار دۆلار)ە.
