نێچیرڤان بارزانی جەخت کەێد لە چارەسەرکردن گرفتەگان وەگەرد حکومەت فیدڕاڵی لەبان سێ بنەما
شەفەق نیوز/ نێچیرڤان بارزانی سەرۆک هەرێم کوردستان جیگر سەرکردەی پارت دیموکڕات کوردستان، ئمڕوو یەکشەممە، داوا لە حزبەگە کرد دەور گورج خوەی لە چارەسەر کردن گرفتەگان و باوەتە گیرهاتگەیل وەجیبارێد لەناوبەین هەولێر و بەغداد، لەبنەمای دەستور و مقەیەتی مافەیل وشایستەیل دەستوری هەرێم کوردستان، وئەنجامداین و جیوەجیکردن فیدڕاڵی.
ئەویش لە بەیاننامەی بارزانی هات وەبۆنی دامەزرانن حزبەگە، ک رەسیە ئاژانس شەفەق نیوز.
بارزانی لە ساڵیاد هەفتاو چوارم ئەرا دامەزرانن پارتیەگەمان دیموکڕات کوردستان، وت: وە گشت رێزیگ یاد شەهیدە نەمرەگانمان کەیمن، ک گیان خوەیان کردنە قوربانی ئەرا ئازادکردن کوردستان، سڵاویگ لە گیان پاکیان، وسڵاو ئەرا خیزانەیل و کەسوکارەیلیان، و ئەرا پێشمەرگە قارەمانەگان، پێروزبایی پێشکەشکەم ئەرا بەڕێز سەرۆک بارزانی، نووسینگەی سیاسی، سەرکردایەتی و کادر و ئەندامەیل وپشتگیرەیل و جەماوەر حزبەگەمان پارت دیموکڕات کوردستان.
وتیش: وەرێز وسەربەرزی یادکردنەوەی بارزانی نەمر کەیمن، سەرکردە و دامەزرێنەر پارت دیموکڕات کوردستان ، و گشت فەرمانەدە و خەباتکارە دێرینەگان ک پارتی دامەزرانن جوور گرنگی مێژوویگ، و لە مەیدان خەبات وەردەوام بوین وشانوەشان پێشمەرگە تا دویاترین هەناس، رینمای خەباتیان ئەرا کوردستان ونەوەگان هیشتنە جی.
سەرۆک هەرێم کوردستان هەمیش وت: پارت دیموکڕات کوردستان دامەزریا ئەرا وەدەسهاوردن مافەگان گەل کوردستان، وخەبات کرد ئەرا دیموکڕاتی وئازادی و ئەنجامداین سیستەمیگ سیاسی تا کوردستان لە سای سەربەرز بوود، و لە رەی خەباتەگەی گشت سەختیەگان هەڵگرد.
ئمڕوو ئەرک پارت دیموکڕات کوردستان و کادرەگانی، لە ری کارکردنە لە حکومەت و دامەزراوەگان هەرێم کوردستان، ئەرا خاسەوکردن رەوشەیل ژیان وگوزرانی کوردستانیەگان، و وەپشتسەرنان گرفت و قەیرانەگان، و هەمیشە جوور رەفتاریان خاوەن هەڵمەت بوون لە پێشەنگی یەکێتی ریزەگە و یەکگردن و کار هاوبەشانە لە ناونی پێکهاتەیل کوردستان، ئەرا مقەیەتی دەسکەفتگەیل.
وتیش: لەی ساڵیادە، جەختکەیمن لەبان دەور گرنگ و گورجەگەی پارت دیموکڕات کوردستان لە چارەسەرکردن گرفتەگان وەگەرد حکومەت فیدڕاڵی لەبان بنەمای دەستور و مقەیەتی ماف و شایستە دەستوریەگان و جیوەجیکردن فیدڕاڵی وەشیوەیگ پیشەیی، و هەمیش دووپات کەیمن لە گرنگی کارکردن لە بنەمای هەماهەنگی و هاوبەشی و ئەنجامداین هاوسەنگی ناونی گشت پێکهاتەیل عراق ئەرا مسۆگەر کردن ئاسایس و ئارامی سیاسی و پێشکەفتن لە وڵاتەگە.
سەرۆک هەرێم وتیش: ئیمە ئی یادکردنەوە کەیمن، لەوەختیگ جهان و ناوچەگە وعراق وەگشتی و هەرێم کوردستان وەتایبەت هانە رەوشەیل سەخت و ناسک، و کاردەیل وئەندامەیل وجەماوەر پارت دیموکڕات کوردستان، وەگەرد گشت کوردستانیەگان سەختی ومەینەتەگان وبارە قورسەگان هەڵگردن، و خوەیان هەمیشە هاندەرەن ئەرا وەردەوامی ری خەبات وزەحمەتکیشان، لەی ساڵیادە سوپاسیان کەم، وسڵاو لە خۆڕاگرییان کەم، ومن دڵنیام ک وەخۆڕاگری و زەحمەتکیشانیان ئیمە ئی قۆناغ سەختەیشە نەیمنە پشت سەر، و پڕ وەهیوا وەرەو ئایندەیگ خاستر چیمن
