ئیمام و خەتیبەیل جمعە لە هەرێم کوردستان ئیدانەی گورز ئیران لە هەولێر کەن
وتارخوەن جمعە لە ناحیەی “سۆران”، عەبدوڵڵا وەیسی، وت: ئایین ئیسلامی دووپات لە گرنگی ڕەچاوکردن هاوسایەتی خاس کردیە، نەبایەس هاوسا زیان وە هاوساگەی بڕەسنێد، تەنانەت وە کاریگ ناخووشی، قورئانیش دووپات لەبان موسڵمانەیل کردیە بنەمایل هاوسایەتی خاس و ئەوە کە مرۆڤ نەبایەس زیان وە یەکتر بڕەسنێد.
هەمیش وت: ئیمە و کۆمار ئیسلامی ئیران هاوسایمن، تا ئیسەیش زیانیگ وە هاوسایگ نەڕەسانیمنە، و کارە خاسەیل هاوسایلمان هیمان هاوەرچەومان، چوینکە نەتەوەی کورد نەتەوەیگ دڵسووزە، و پرسیار ئەوە کرد: کی دەسەڵات دایەسە ئیران ئەرا کوشتن و بڵاوکردن تیرۆر لە ناو خەڵک؟ و ئاسایش و سەقامگیریمان بشیونێد؟
وتیش: وەو مووشەکەیلە کە تیکەڵ وە خوین خەڵک بیتاوان بوین، وە درزز و بوختان جویر بریکاری ئیسرائیل لە چوارچیوە خریەنەڕوی، و بویین بارەگایگ مۆساد، و دیاری کرد کە "ئیسلام وە هویچ شیوەیگ ری وە بوختان نیەێد".
وەیسی پرسیاریش کرد: ئایا مەعقولە مناڵیگ ١١ مانگان بریکار ئیسرائیلی بوود؟ تا لاشەی بووڕیەێد و لەت بکریەێد، و بنەماڵەیگ یا گەلیگ بوختان وەپی بکریەێد؟”
لەلای خوەییش ئیمام و وتارخوەن مزگەفت جەلیل خەیات لە هەولێر، شێخ بەشیر حەداد، لە وتار نماز جمعە، ئەو پەلامار لەبان هەولێر تیرۆریستی دادە قەڵەم، چوینکە خەڵک مەدەنی بیتاوان کردە ئامانج، ئاماژەیە تا ئەوە لیژنەیەی حکومەت عراق سەردان ئەو شوینەیلە کرد کە پەلامار دریانە و چەسپان کە کە ئەوان مەدەنین.
وتیش: پرس بۆردومان یەکلایی کردن تووڵەی سیاسییە لە ناوەین وڵاتەیل گەورە، بەڵام لە دەیشت خاکی وڵاتیان، لەوان ئەمریکا و ئیران و وڵاتەیل ترەک، وتیش؛ ئەو وڵاتانە تووڵەیان لە یەکتر لەبان خاک عراق یەکلایی کەنەو، لەوانەیش لە هەرێم کوردستان.
شەو دووشەممە لەبان سێشەممە، سوپای پاسداران ئیران وە مووشەک بالیستیکی وپەلامار سەختیگ لەبان ناوچە مەدەنییەیل شار هەولێر کردە ئامانج و لەوەر ئەوە زیاتر لە 10 هاوڵاتی مەدەنی کوشیان یا زەخمدار بوین.
