كوردستان وه‌ل به‌رزه‌وبوين حاڵه‌ته‌يل تويشهاتن وه كۆرۆنا 5 نه‌خوه‌شخانه دروس ئه‌كا
شه‌فه‌ق نيوز/ وه‌زاره‌ت شاره‌وانيه‌يل و گه‌شتيارى له حكومه‌ت هه‌رێم كوردستان، ئاشكراى ته‌رخانكردن پارچه زه‌ويه‌يليگ كرد ئه‌را دروسكردن 5 نه‌خوه‌شخانه، ئه‌ويش له هه‌وڵيگ ئه‌را روێ وه‌ڕوێ بوينه‌وه‌ى ڤايرۆس كۆرۆنا وه‌ل به‌رزه‌وبوين شماره‌ى حاڵه‌ته‌يل تويشهاتن وه‌و ڤايرۆسه.
وه‌زاره‌ته‌گه له به‌ياننامه‌يگ ك شه‌فه‌ق نيوز ئاگادارى بوێ، ئه‌وه ده‌رخست ك زه‌ويه‌يليگ ئه‌را دروسكردن 5 نه‌خوه‌شخانه له شار و قه‌زايه‌يل جياجياى ناوچه‌يل هه‌رێم كوردستان ته‌رخان كردگه، ئه‌ويش له‌وه‌ر روێ وه‌ڕوێ بوينه‌وه‌ى ڤايرۆس كۆرۆنا ك له‌سه‌رانسه‌ر جه‌هان بڵاوه‌و بويه.
وه‌زاره‌ته‌گه ئاماژه وه‌ئه‌وه كرد پارچه‌يگ زه‌وى ته‌رخان كرياگه ئه‌را دروسكردن نه‌خوه‌شخانه‌يگ 70 قه‌ره‌وێڵه‌يى له شار هه‌ولێر و پارچه زه‌وييگ ئه‌را دروسكردن نه‌خوه‌شخانه‌يگ 64 قه‌ره‌وێڵه‌يى له هه‌ڵه‌بجه و پارچه زه‌وييگ ئه‌را دروسكردن نه‌خوه‌شخانه‌يگ 70 قه‌ره‌وێڵه‌يى له كه‌لار و پارچه‌يگ تر 20 قه‌ره‌وێڵه‌يى له پێنجوێن و پارچه زه‌وييگيش ئه‌را دروسكردن نه‌خوه‌شخانه‌يگ 100 قه‌ره‌وێڵه‌يى له چوارقوڵانه.
