كارمه‌نده‌يل ته‌ندروستى له هه‌رێم كوردستان له‌وه‌ر دوياكه‌فتن مووچه‌يليان گردبوينه‌وه
شه‌فه‌ق نيوز/ پزيشك و كارمه‌نده‌يل ته‌ندروستى له شاره‌يل هه‌رێم كوردستان، ده‌سكردنه ريكخستن مانگرتن له‌وه‌ر ده‌رخستن ناڕه‌زايه‌تى له‌باره‌ى دياكه‌فتن مووچه‌ى مانگانه‌يان ك زياتر له په‌نجا رووژ وه‌سه‌ريا چيه.
له‌ى باوه‌ته‌و، پزيشكه‌يل مانگرتگ له به‌ياننامه‌يگ ئه‌را شه‌فه‌ق نيوز ئه‌وه ده‌رخستن ك وه‌ل بارودوخ سه‌خت و مه‌ترسيدار ك خه‌ريك كاركردنن له‌تى له روێ وه‌ڕوێ بوينه‌وه‌ى ڤايرۆس كۆرۆنا، حكومه‌ت مووچه‌ى مانگانه دويا خستگه ك په‌نجا رووژ وه‌سه‌ريا چگه.
پزيشكه‌يل و كارمه‌نده‌يل ته‌ندروستى هه‌ميش وتن: له‌ساى بارودوخ ئابوورى سه‌ختيگ ژيه‌يم و ئمڕوويش مانگرتن ئه‌نجام ئه‌يه‌يم له‌گشت ره‌دهه‌يل له نه‌خوشخانه‌يل سلێمانى و ئه‌گه‌ر حكومه‌ت جواومانه‌و نه‌يه‌ێد، له سووه‌و ده‌س له ده‌وام هه‌ڵگريم له‌گشت نه‌خوه‌شخانه‌يل ته‌وارى.
لاى خوه‌ييشه‌و هاوژين عوسمان سه‌رۆك سه‌نديكاى پزيشكه‌يل سلێمانى ئه‌را شه‌فه‌ق نيوز وت: ئى مانگرتنه گشت كارمه‌نده‌يل ته‌ندروستى له سلێمانى و هه‌ڵه‌بجه و ئداره‌ى راپه‌ڕين و گه‌رميان گرته‌سه‌و، ك دروشم مانگرتگه‌يل ئه‌وه‌سه "ده‌وام بى مووچه نيه".
