هيزه‌يل شيعه حال كازمى هاوردنه‌سه ته‌نگ و 48 مووڵه‌ت وه‌پى دانه
شه‌فه‌ق نيوز/ هاپوه‌يمانى فه‌تح وه سه‌رۆكايه‌تى هادى عامرى، ئاشكراى ئه‌وه كرد هيزه‌يل شيعه مووڵه‌ت 48 سه‌عات دانه‌سه مسته‌فا كازمى سه‌رۆك وه‌زيره‌يل راسپارياێ ئه‌را ئاڵشتكردن ناو كانديده‌يل له كابينه وه‌زاريه‌گه‌ى.
له‌ى باوه‌ته‌و، سه‌رچه‌وه‌يگ له هاوپه‌يمانيه‌گه له باسيگ ئه‌را شه‌فه‌ق نيوز وت: هيزه‌يل شيعه له دويا دانيشتنيان وه كازمى دوباره كانديدكردنه‌وه‌ى شماره‌يگ له وه‌زيره‌يل له حكومه‌ته‌يل وه‌رين ره‌ته‌و كردنه، له‌ناونيانيش وه‌زيره‌يليگ له حكومه‌ت ئيسه، بيجگه كانديده‌يل تر له حكومه‌ته‌يل وه‌رين.
سه‌رچه‌وه‌گه ك نه‌تواس ناوى ئاشكرا بدێ وت: سه‌رۆك فراكسيۆنه‌يل سياسى شيعه بڕيگ تێبينى راده‌س وه كازمى كردنه له‌باره‌ى ريكار حكوميه‌گه‌ى و كابينه وه‌زاره‌يه‌گه، بيجگه وه‌پيداين 48 سه‌عات ئه‌را جواودانه‌وه‌ى له‌بان ئه‌و تێبينيه‌يل و ناڕه‌زايى فراكسيۆنه‌يله له‌بان ناو بڕيگ له كانديده‌يل ئه‌را كابينه وه‌زاريه‌گه.
