خوه‌ندكاره‌يل كورد فه‌يلى ده‌رفه‌ت له كۆليژ و په‌يمانگايه‌يل ئه‌رايان هه‌ڵكه‌فت
شه‌فه‌ق نيوز/ ئه‌بو مووسا فه‌يلى وه‌رپرس تۆماركردن له په‌يمانگاى پزيشكى ته‌كنيكى مه‌نسور، ك يه‌كيگه له دامه‌زرياگه‌يل زانكۆى ته‌كنيكى ناوڕاس له وه‌زاره‌ت خوه‌نين باڵاو توێژينه‌وه‌ى زانستى، باس له وجوود ده‌رفه‌ت كرد له‌وه‌ر ئه‌وه‌ك رووڵه‌يل كورد فه‌يلى پيشكه‌ش ئه‌را كۆليژ و په‌يمانگايه‌يل عراقى بكه‌ن.
له‌و باوه‌ته‌و، فه‌يلى له به‌ياننامه‌يگ ئه‌را شه‌فه‌ق نيوز وت: وه‌بوونه‌ى ته‌واوبوين ساڵ خوه‌نين 2018 / 2019 و نزيكه‌وبوين تۆماركردن ساڵ خوه‌نين 2019/ 2020، ئاگادار گشت خيزانه‌يل كورد فه‌يلى ئه‌كه‌يم ك ئه‌تويه‌نن رووڵه‌يليان ئه‌را خوه‌نين ئيواران له كۆليژ و په‌يمانگايه‌يل عراقى پيشكه‌ش بكه‌ن وه‌گووره‌ى فه‌رمان ديوانى شماره 122 ساڵ 2017، وه‌بى مه‌رج موعه‌ده‌ل وه ريژه‌ى(5%)له‌بان پلان وه‌رگرتن ئه‌را گشت به‌شيگ زانستى له كۆليژ يا په‌يمانگا دوياى ته‌ئيد ليژنه‌ى كورده‌يل فه‌يلى له ئه‌نجومه‌ن پاريزگا وه كتاويگ فه‌رمى ئه‌را ئه‌و زانكۆ ك ئه‌خوازێد پيشكه‌ش ئه‌راى بكا وه ئه‌وه‌گ بايه‌سه ئه‌و خوه‌ندكاره له كورده‌يل فه‌يلى بدێ.
