هەزاران تویشهاتن وە ڤایرۆس کۆرۆنا لە وڵات چین

شەفەق نیوز/ وڵات چین، ئمڕوو یەکشەممە، توومارکردن بەرزترین زیایبوین رووژانە لە تویشهاتنەیل ڤایرۆس کۆرۆنا وەماوەی شەش مانگ راگەیان.

ئی راگەیانن چینیە دویای یەک رووژ لە قسەی وەرپرسەیل تەندروسی تیەێد، ک وتن: خوەیان پابەندن وە ریکارەیل سەختیگ ئەرا نواگردن بیماریەگە، ک ئەو قسەیلە ئومید خاوەن کاروبارەیل لە سووکروکردن ئەو ریکارەیلە سەردەو کرد.

دەسەی تەندروسی نیشتمانی وت: وڵات چین ٤٦١٠ تویشهاتن نوو وە ڤایرۆس کۆرۆنا لە پەنج تەشرین دویەم توومار کرد، ک ئەوە گەورەترین شمارەس لە شەش مانگ گوزەشتە تا ئمڕوو.

هەرچەن شمارەی تویشهاتنەیل لە جەهان فرە کەمەو بویە، باوجی وڵات چین، دویای نزیکەی سێ ساڵ لە بڵاوبوین پەتاگە، هیمان لەبان سیاسەت (هویچ کۆڤید) کار کەێد، ک بەسیان و کەرەنتین تەندروسی و وەشکین و کەمکردن هامشوو هاناوی.