نرخ نه‌فت له بازاڕه‌يل جه‌هانى روێ له به‌رزه‌وبوين كرد
2019-09-19T10:22:42+00:00
شه‌فه‌ق نيوز/ نرخ نه‌فت له بازاڕه‌يل جه‌هانى دوياى چه‌ن رووژيگ له گرژێ، روێ له به‌رزه‌وبوين كرد، ئه‌ويش له‌وه‌ر قه‌وڵ سعوديه ئه‌را هاوردنه‌وه‌ى به‌رهه‌مه‌يلێ وه ته‌واوى له كووتايى مانگ ئه‌يلول له‌و دامه‌زرياگه‌يله ك له‌لايه‌ن ته‌ياره‌يل بى ته‌ياره‌وانه‌و په‌لامار دريان.
وه‌گووره‌ى ئاژانسه‌يل جه‌هانى, نه‌فت برينت 8 سه‌نت به‌رزه‌و بوێ و هه‌ر به‌رميليگى ره‌سيه 63,68 دۆلار و نه‌رخ نه‌فت خام ئه‌مريكى خوه‌رئاواى تكساسيش 14 سه‌نت به‌رزه‌و بوێ و هه‌ر به‌رميليگى وه 58,25 دۆلار مامڵه وه‌پيه‌و كريا.
جى باسه، به‌رزه‌وبوين نرخ نه‌فت دوياى ئه‌وه هات ك سعوديه ئاشكراى كرد وه‌گووره‌ى وه‌ختيگ دياريكرياێ گله‌وخوه‌ێد ئه‌را زيايكردن به‌رهه‌مه‌يلێ له‌و دامه‌زرياگه‌يله ك له‌لايه‌ن ته‌ياره‌يل بى ته‌ياره‌وانه‌و په‌لامار دريان.
