له چين هه‌ر كه‌سيگ تويشهاتگ وه كۆرۆنا خوه‌ى ته‌سليم بكا هه‌زار يوان وه‌رئه‌گرێد
شه‌فه‌ق نيوز/ تووڕ سى ئێن ئێن ئه‌مريكى وت: وه‌رپرسه‌يل چينى جاڕس بوينه له تواناى كۆنترۆڵكردن ڤايرۆس كۆرۆنا، ك يه‌يش له‌يوا وه‌پيان كردگه بگه‌ردنه شوون چاره‌سه‌ره‌يل تر له‌وانه‌يش به‌خشين دارايى له‌وه‌ر خاتر ئاگاداركردنه‌وه له حاڵه‌يل تويشهاتن وه‌و په‌تا.
له‌ى باوه‌ته‌و، ناوچه‌ى هۆبى ك شار وۆهان هاله‌تى و ناوه‌ند بڵاوبوينه‌وه‌ى ئه‌و په‌تاى كوشنده بوێ، ئاشكراى وه‌پيداين خه‌ڵات كرد وه هه‌ركه‌سيگ خوه‌ى ته‌سليم بكا له‌وانه‌گ وه‌و په‌تا تويش هاتنه يا ئاگادارى بيه‌ێد له‌بان كه‌سيگ تويشهاتگ.
وه‌گووره‌ى زانياريه‌يل تازه‌يگ له هۆبى، هه‌ركه‌سيگ نيشانه‌يل ئه‌و په‌تا وه‌پيه‌و دياره و ئاگادارى له‌بان خوه‌ى بيه‌ێد، هه‌زار يوان (142 دۆلار) وه‌رئه‌گرێد و هه‌ركه‌سيگيش ئاگادارى له‌بان كه‌سيگ تر تويشهاتگ بيه‌ێد 500 يوان(71 دۆلار)وه‌رئه‌گرێد.
جى باسه، ئى نمايشه وه‌رده‌وامه له 9 فبرايه‌ر دويه‌كه تا 18ى فبرايه‌ر.
