يار مه‌حمه‌دخان كرماشانى و حسێن كورد
فێشتر له يه‌ك سه‌ده‌س ك له شه‌هيد بوين سه‌ردار كورد يارمه‌حه‌مه‌دخان كرماشانى چيه، سه‌ردارێ ك شان وه شان سه‌تارخان و باقرخان له تهورێز جه‌نگ كرديه‌و ته‌مام جووخه‌ى ژيان خوه‌ى ناسه‌و بان دفاع له ئازاديخوازى له ئيران. هويچ وه‌خت ئه‌را رزگار كردن گيان خوه‌ى، په‌نا وه سه‌فاره‌تخانه‌ى هويچ وڵاتێ بێگانه نه‌وردو هويچ وه‌ختيش وه‌ل سته‌مكاره‌يل دووسى نه‌كرد تا يه‌گ فره وه قاره‌مانيه‌و گيان خوه‌ى له رێ ئامانجێ ك داشت فه‌داى كرد.
يارمه‌حمه‌دخان له كرماشان ژياو جه‌نگياو له كرماشانيش شه‌هيد بوى. له هه‌رجى ئيران له سه‌تارخان و باقرخان باس ئه‌كريه‌يد، په‌يكه‌ره‌يلێ ئه‌را ئه‌ى دو سه‌ركرده له تاران و تهورێز سازينه‌و له ناو مه‌وزه‌خانه‌يليش ئه‌و كه‌ره‌سته‌يله ك هن خوه‌يان بوينه نريانه، له كتاوه‌يل ئه‌يرنانه‌و هويرو ته‌ورێزيه‌يل و ئازه‌ريه‌يل وه داشتنيان شانازى و وه پيانه شاقزى كه‌ن، وه‌لى له‌ى شاره پاڵه‌وان په‌روه‌ره، كه‌سێ له‌ى سه‌ركرده‌ى كورد ها يادێ ناكه‌ى!. قه‌ور ئه‌ى سه‌ركرده‌ى كوردها له كرماشان، وه‌لى ئايا زانين ها له كوو!؟.
فه‌رمانفه‌رما حاكم كرماشان ك حاكم سفارش كرياى ده‌وڵه‌ت قاجار بوى و خوه‌يشێ هه له‌ى ئێڵه بوى، تاوان قاره‌مانيه‌يل ئه‌ى سه‌ركرده‌يل كورده وه مردن دا، ئه‌وه‌يشه هناى جنازه‌ى ئه‌ى سه‌ركرده‌ى كورد به‌سيه ته‌خته‌و له ناو شار نيشانێ داو له‌لێ وێنه گرتن، ئمجا ئه‌ى سه‌ركرده‌ى كورده دا وه ده‌س بنه‌ماڵه‌ى تا له قه‌ورسان گشتى شار كرماشان خاكێ بكه‌ن.
له ساڵ 1971 زايينى، وه‌ل لاوردن قه‌ورسان ناودار وه سه‌رقه‌وه‌ر ئاقا له سنوور ئمڕوو شه‌قام مونه‌زه تا مه‌يدان تاج گوزارى، ترس يه بوى تا قه‌ور ئه‌ى سه‌ركرده‌ى تێكوشه‌ره ئه‌را هه‌ميشه خراو بكريه‌يدو له هويره‌و بچوود. وه‌لى وه ته‌قڵاى مه‌ردم كرماشان و پاشمه‌نه‌يل نه‌مه‌ر يارمه‌حمه‌خان له خروا كردن قه‌وه‌ره‌گه‌ى نوا گيرياو ئه‌را ئه‌و هويرهاوردن جيگاى ئه‌ى سه‌ركرده‌ى گه‌وراى كورده، له ده‌وڵه‌ت خوازين تا قه‌ورسانێ له ئاست شان و شه‌وكه‌ت ئه‌ى سه‌ركرده‌و مه‌وزه‌خانه‌ى و كتاوه‌خانه‌گيش له لاى قه‌وره‌گه‌ى بسازيه‌يد. وه‌لى ده‌وڵه‌ت پاڵه‌وى وه له وه‌رچه‌و گرتن پێشينه‌ى دژايه‌تى ئه‌ى سه‌ركرده، ئه‌ى داواى مه‌ردمه وه جى ناوردو زه‌ويه‌يل ئه‌ى ناوچه ئه‌را نه‌خوه‌شخانه‌ى ته‌رخان كرد.
وه سه‌ر ئه‌ى بێ خه‌مى ده‌وڵه‌ته، مۆهه‌ندس چه‌ودێر سازين نه‌خوه‌شخانه‌گه، نه‌يشت قه‌وه‌ر ئه‌ى سه‌ركرده‌ى كورده خراو بكريه‌يد./ش
