مێژوو قه‌ڵاى بانه‌مان
قه‌ڵاى بانه‌مان له دو نهۆم دروس كرياگه له كوچگ و خشت و چوار تاور شيوه بازنه‌يى ديرێد.
ئى قه‌ڵا له‌ساڵ 2007 له‌لايه‌ن وه‌ڕيه‌وبه‌رايه‌تى شوونه‌وار هه‌ولێره‌و تازه‌وه كرياگه، وه‌لێ مێژووه‌گه‌ى ئه‌چێده‌و ئه‌را سه‌رده‌م ميرنشينى سۆران و له سه‌رده‌م شا سلێمان به‌گ و شاژن خانزاد له‌ناوچه‌ى سۆران ك راوه‌ندوز پايته‌خت بوى له‌و سه‌رده‌مه دروس كرياگه.
قه‌ڵاى بانه‌مان وه‌پيشى ئويشن قه‌ڵاى خانزاد، خانزاديش دويه‌ت شاقولى به‌گ سلێمان به‌گ مير سه‌يد به‌گ سۆرانه‌و له ساڵه‌يل ناوڕاس سه‌ده‌ى 16ى زايينى هاته‌سه دونياو له كووتايى هه‌مان سه‌ده‌و له ساڵ 1597 ماڵئاوايى يه‌كجارى له دونيا كردگه.
ئمجا دوياى ئه‌وه‌گ مير سلێمان به‌گ براى خانزاد له‌ساڵ 1590 وه پيلانيگ "له‌شكرى" له‌ڕى به‌غدا كوشياگه، دى خانزاديش فه‌رمانڕه‌وايى ميرنشينيه‌گه گرته‌سه مل كاروبار ئه‌و ميرنشينيه برده‌سه ڕييه‌وه‌و دوياخريش خانزاد هه‌ر مينه‌ى فرسه‌تيگ كردگه تووڵه‌ى براگه‌ى بسينێد و دوياخريش ئه‌و ئه‌زره‌ته ئه‌راى جيوه‌جى بويه‌و له‌شكرى كوشتگه‌و ئاگر دڵه ئازيه‌تباره‌گه‌ى وه كوشتن له‌شكرى كپ و خامووشه‌و بويه.
خانزاد له ماوه‌ى هه‌فت ساڵ ده‌سڵاتى تا وه‌خت مردنى له‌ساڵ 1597 چه‌نه‌ها قه‌ڵاو خوه‌ندنگاو مزگفت دروسكردگه، ك تائيسه‌يش شوونه‌وار به‌شيگ له‌ليان هه‌ر مه‌ندگه و ديارترينيان قه‌ڵاى بانه‌مان(خانزاد)، گه‌لى خانزاد، كويه‌ن ديوار و ره‌سمه‌گه‌ى كويه‌ى هه‌رير...هتد.
سامى عه‌وڵا هه‌ريرى
