قەورخانەێ هۆوەخشەتەرە ئمپراتوور ماد دە قزقاپان سڵێمانییە
شەفەق نیوز- گووڕ دەخمەێ هۆوەخشەتەرە، لە بنەڕانەر هووز پاشایەتی ماد ک وە یەکم ئمپراتووری ناوچەێ ئێران و کوردستانات و عراق و گشت نام‌دوئاوان (بین النهرین) دناسرێ، ها دە نزیکی شار سڵێمانی دە هەرێم کوردستان.
دە نام‌بەین سۆن و کوماچەێلەێ بارگاگەێ ئی قەورخانە ک دە نام تاش و بەرد تاشریاگە نەخش و بڵەخشەێلێ لە فەروەهەر و ئاناهیتا و مێهر یا میترا کیشریاگە ک گشتێ خوداڵە یا خوداوێنە و خوداژنەێل ئوو فرێشتەێلێگن هن دین و ئائینەێل گەور کوردەواری و ئێران ک ئەڵگەردنە ئەو بەێنەێلە ک دو پەیامبەر کوردی-ئێرانی یانێ زەڕتوشت ئوو مانی دژیانە.
دە بان کەل و کەلانەگەێ ئی قەورئشکەفتە وێنەێ لەێ پاتشا تاشیاگە ک دیرێ نقا و نزا وە دەرگاێ ئێزەد و ئەهوورامەزدا دکەێ.
دە کەش ئی گەورەپاشا، موغ یان رووحانیێ زەڕتوشتی وساگە دە لا چەپێ و هەر دوگێیان دەم ئەڵپێچاننەو هەر کامێیان یەکێ یەک گلە کەمان ک نیشانەێ بردن و پیرووزییە گرتنەسە دەسێیانەو.
ئی قەورخانە هە دمنێگە قەورخانەێ (دی-دوور) دە کێوەێل هووز بەختیاری ک وتنە تەرم ئاریووبەرزن سەردارێ ک رووم داشکانە و بەختیارییەێل وە باوەگەوراێ خوەیان دناسنەێ دەورەێلە تم کریاگە.
هۆوەخشەتەرە سێیم پاتشای ماد و زووردارترینێیان بییە ک کوت فرەیێگ لە دنیا داپێچانگە و کەڵێن‌ترین ئمپراتووری گەور دە دنیا دامەزرانگە.
دیاکونوف، کەڵەموحەقق مادناس، کوردەێل وە وەچ و وەچەڵ‌زاێ ماد ناسییە.
