فه‌رمانڕه‌وايى "سه‌لمان سوڵتان" دونبولى

فه‌رمانڕه‌وايى "سه‌لمان سوڵتان" دونبولى
2016-05-31T20:41:43+00:00

ئى سه‌لمان سوڵتانه‌ ره‌سیه‌سه‌ خزمه‌ت " شا عه‌باس " و وه‌ته‌مامى خزمه‌ت خوه‌ى ئه‌راى نیشان داگه‌و شا عه‌باسيش ناوى ناگه‌ سه‌لمان وه‌ناو " سه‌لمان خه‌لیفه‌ "ى باپیریه‌و‌ ك ساڵ (1017ك) پله‌و پایه‌ى " سوڵتان " وه‌پى دریاگه‌و كریاسه‌ وه‌ڕیه‌وبه‌ر ناوچه‌يل "چورس و سه‌لماس" .

ئه‌مین زه‌كى به‌گ وه‌ پشتبه‌سانن وه‌ كتاو شه‌ره‌فنامه‌ى بدليسى ناو ئى كابرا بردگه‌و وه‌خت مردنى وه‌ساڵ ( 1014 ك ) ياد كردگه‌، چوينكه‌ شه‌ره‌فخان وه‌رجه‌ ئى سوڵتانه‌ ماڵئاوايى له‌ دونيا كردگه‌.

له‌و سه‌رده‌مه‌ ك ئه‌و میر بویه‌، محه‌مه‌د پاشاى كوڕ زاڵ پاشا ك یه‌كیگ بویه‌ له‌ سه‌ركرده‌یل عوسمانى و هاومه‌رز بویه‌ وه‌لیاو فه‌رمانڕه‌واى "ئه‌رجیش و عادل جه‌واز" بویه‌، هه‌ر وه‌و خاتره‌ جارجاریگ په‌لامار هه‌ریمه‌گه‌ى ژیرده‌سى داگه‌و "سه‌لمان سوڵتان"يش هه‌واڵ ره‌سانه‌سه‌ "پیربوداق خان" فه‌رمانڕه‌واى ته‌وریز و داواى كوومه‌ك و ده‌سميه‌ت له‌لى كردگه‌، ئمجا ئه‌را نواگرتن له‌ ( محه‌مه‌د پاشا) هیزیگ ره‌سانه‌سه‌‌ دادى .

ساڵ " 1035ك " له‌وه‌ختیگ ك ناونى له‌شكر عوسمانى و له‌شكر ئیرانى جه‌نگ و مرافه‌ بويه‌ "دته‌كه‌للو پاشا" میر میره‌یل ( وان ) بویه‌و شماره‌يگ له‌سه‌ركرده‌یل كورد ئه‌و ناوچه‌یشه‌ وه‌لیا بوینه‌و سه‌لمان سوڵتانيش له‌و جه‌نگه‌یله‌ به‌شدارى كردگه‌و ئازایه‌تى فريه‌یگ نیشانداگه‌و "شا عه‌باس"يش پاداشى كردگه‌و ناسناو " خان " وه‌پى به‌خشاگه‌.

وه‌ل ئه‌وه‌یشا له‌وه‌ختیگ ك كورده‌یل سۆران په‌لامار ئورمیه‌ دانه‌، ئى سوڵتان سه‌لمانه‌ نواگیرى له‌لیان كردگه‌و سه‌ركه‌فتن وه‌ده‌س هاوردگه‌، ك گوایا له‌سه‌رده‌م "سه‌فى شا"یش ك له‌شوون مردن شا عه‌باس هاتویده‌ بان ته‌خت ده‌سڵات له‌ ساڵ 1037 كووچى له‌و وه‌خته‌ ك سوڵتان " مراد عوسمانى " په‌لامار ئازه‌ربایجان داگه‌و له‌و سه‌رده‌میشه‌ ك والى به‌غدا "ئه‌حمه‌د پاشا" وه‌ل ده‌وڵه‌ت ئیران له‌حاڵه‌ت جه‌نگ بویه‌، ئى سوڵتان سه‌لمانه‌ له‌ كویه‌یل حه‌كارى روى وه‌ روى "فه‌رهاد پاشا"ى عوسمانى بویه‌و زرنگى و ئازایه‌تى فريه‌یگ نیشانداگه‌و تا دویا هه‌ناسه‌ى ژیانيشى هه‌ر فه‌رمانڕه‌واى چورس و سه‌لماس بویه‌و وه‌ختیگیش مردگه‌ هه‌ر له‌ناو ئه‌و قه‌ڵا ك خوه‌ى له‌ چورس دروسى كردوێد وه‌خاك سپاریاگه‌ .

مه‌لا جه‌ميل رۆژبه‌يانى

Shafaq Live
Shafaq Live