چماێ نووپه‌ڵه‌ێ ئاسمان دریا

له بوو گوڵباخی باخ هناسێ

له پاێ گه‌په‌یل ڕه‌نگین وخاسێ

گوڵه‌یل هه‌م خه‌نن وه ڕوى باخه‌وه

فه‌رش سه‌وزێ خه‌ن وه ڕوى راخه‌وه

ئه‌ور دڵخوه‌شی له‌ێره وارێدن

که‌پوو ها له‌ ڕێ،خه‌وه‌ر بارێدن

هوره‌چڕ چڕی:گوڵه‌یل هاینه‌کوو؟

کونه‌و ئاوه‌گه‌ێ شه‌فا ناینه‌کوو؟

گیشتێ خوه‌شاڵن وه‌هارێان تێ

کونه‌ێ پڕ له ئاو وه‌کارێان تێ

هه‌ر من بێ به‌شم له ئێ وه‌هاره

کریا خڵاتم بافه‌ێ په‌ژاره

چماێ نووپه‌ڵه‌ێ ئاسمان دریا

شین باخه‌گه‌ێ گوڵه‌یلم کریا

واران هاله کوو؟؟ گیری چه‌و منه

په‌ڵپ دڵه‌گه‌ێ شکیاێ شه‌و منه

مه‌لێ بی خه‌وه‌ر چێه له باخم

داخ تر ناێه ئه‌و بان داخم

خوينم له شیشه‌ێ شه‌وار شه‌و کرد

پایلم له شونێ هزار جا ڕه‌و کرد

حامد شبابی