مادنیشت
مادنیشت دەس کی بنیادد بەنی
کام وا ، کام واران بنا ڕاد ژەنی
مادنیشت! زاڵ زەڕ، وامنەێ ساڵان
پیر پرچ چەرمێ باوگ ئەڤداڵان
تا تۆ گەورا بۊد وساید وه پاوه
بنچینەێ بەشەر هزار تووک داوه
خەم خوەراواێ خان مەسۊر دیری
توژاوڵەێ له زام دنیاێ دۊر دیری
زەڕەێ شاپەروەر ها واراندەو
ها وه تەمەلۊل وەهاراندەو
ها چۊزەێ نەوڕەس قەێ داراندەو
ها وه سووسەن گوڵ نساراندەو
ئاسووم هەسەڵ کەنۊ داردە
غەزەڵم کەڵ مەس قەێ مەقاردە
چەوێڕد چۊ چەتر دۊەتەگانمە
داواند داوان داڵگانمە
بەڕۊد باوگە وەن داێەمە
کەێکوود شێرە ، چروو ساێەمە
نەوتۊلد گوچان گەر دەسمە
ئاخڵەێ مانگد پەچیەێ پەسمە
نەورووز گوڵ خێزیا هەێ گوڵ هەێ گوڵدە
چۊ خودا پێ داێ دنیا وە دڵدە
هەرچەن پەنجە تێ کەپوو کەپوودە
دنیا مەس لە ئەتر شەو بوودە
دنیاێ وا لە پەێ سەقامێگ نەێرێ
چۊ گوڵ د ڕووژەو دەوامێگ نەێرێ
ئێ پرچ سفێد بان باڵادە
جەور سەربەرزی ناو دێواڵادە
هەر دار بەرزێ سان خەنەو گژێ
بزان ئەو دارە بەر گرتێە بژێ
ئۊشن گەورا ماڵ کەشکەشان منم
ئەو کەسە ک تۊەم شێعر وەشان منم
منیش گیان تەڕ کوور سزێگ دێرم
کەفیدەو لاوام بوو کزێگ دێرم
تیەنی نمەزاێ بێ نزێگ دێرم
چەرداخ بۊچگ پایزێگ دێرم
ئەر ت نەۊاتای وە ستۊن م
دشمن فەتیرە کرد وە خۊن م
بەو تنیش جوور م ئاێەمی بکە
فکرێ پەێ وەهار داێەمی بکە
سەعيد بانان
