لێڵاوی

لێڵاوی
2017-03-15T12:36:00+00:00

ت چیته دە دە‌ورم ،م ئاور و ته‌م دێرم

میلاق لێڵاوی دە نام چه‌م دێرم

ئاسارە‌م ئاجریاس، ئاز دڵم بریاس

وە حە‌زره ت عه‌بباس، خوەم داخ خوە‌م دێرم

هه‌م قە‌ێس دێوانە ، هە‌م له‌یل بێ وانه

هەم داخ په‌روانە، هەم ئه‌سر شە‌م دێرم

ئاخ و خه‌م و که‌وومڕ،ژان و ژیەر و ئاگڕ

دە‌ێ جوورە چێشته‌یلی، هه‌فتا ڕه‌قه‌م دێرم

شیره‌ی په‌ژارەێ دۆر، خامە خه‌م و زە‌نجیر

ئەر وەرژه سوبحانە سه ر بیته ڵە‌م دێرم

ڕوژان قه‌ڵاێ وەێ دەنگ ، شه‌وان هسار تەنگ

چۆ دۆ، سێاتی ڕە نگ ، دە شوون خوە‌م دێرم

جوور" قڵاوێزان" ، خۆنالی "مێران"

جوور" گه چان" ژان هشکی" شه‌ڵه‌م "دێرم

حه‌بيبوڵڵا به‌خشوده‌

Shafaq Live
Shafaq Live