خاتۊن هاتگە

خاتۊن هاتگە
2020-07-30T10:12:26+00:00


ها کابرا

پڕتاڵ ڕەش هادەوەرت

ژێر نوخانت پڕ بۊە

ژە خاک و خۊن ، چرکوو زۊخا

گوپت زەمین شۊەم کریاگ

شیوەت ، داورێش ریش بریاگ


نام سەرت

چەقە چەقە دەی دەرەو کەرێگ

بافە بافەس هە هاڵ زەمین

واوەلۊلەس شەپەتۊتانێان گردگە......!!


قەڵپەنجە دایتەسەڵ پاێلت

هایتەڵ بان قاور بێ مردگ

هە قیژنی ، هە لۊل کووتی

ئەسرێگ نەماگە دە چەمت

لچت بۊەسە شەق پا.....

هەر ڕێوارێ

ک دیاێگ و چووگ

بەزۊنامەێگ ژە تو خوەنێگ

ژە هەر کڕ بەزۊنامە ، چاڵ قۊلێگ ئڕات کەنێگ

دەست بێەوەم

دەست بێەوام

ئەڵس برا

پڕتاڵ نوو بکە وەرت

شاڵێ دەێەڵ نام قەێت چەنە پیەنیێ قەپاڵێگ

کڵاش ئەڵکیش ، فەرنجی دە وەرت بکە


خاتۊن هاتگە وەهار هاوەێ

زڵفێ سەونزە جووڕ وەڵنگ دارەێل بەڕۊە

هەر شانەێگێ پەڵکە داگە

ژە هەر پەڵکە مەلیچگ و مەڵانێگە


ژە هەر خەنگ ، شکوفە ژە لێوێ کەفێگ

ژە هەر شکوفەێل لێوێ

میوەێگ دە باوشێگ خەرێگ

ژاکان باران ملکشاهی



Shafaq Live
Shafaq Live