بڵووزەێ ئاگر دار وەن

بڵووزەێ ئاگر دار وەن
2018-07-10T17:55:00+00:00

کزە جارێ ئەگەر بەێتێ خوەنیمن

تیەڵە سازێ ئەگەر جارێ ژەنیمن

دڵ داخینمان ئاخینە وەختێ

دە بەزمێ چۊ گوڵ لاڵە خەنیمن

بووِ شەو گرتگە ڕووژەیل ئیمە

سەفا نەیریمن ئاو شەومەنیمن

هە چۊ ئاسارە گیروودەێ تڵسم

شەوِ بێ دەروەچِ ئەهریمەنیمن

شەماڵەێ واێ ئەجەڵ ها دە جمشت و

کولێ تەرتِ دەمِ پەنجەێ شەنیمن

منیمە تاشەوان، دەێ ڕۊ مەغارە

کولێ پەێوەس وە یەێ تاڵ بەنیمن

خوەشە سزیانمان ڕا شەونشینەیل

بڵووزەێ ئاگر دارِ وەنیمن

هە جوور خانەقین دەو دەیشتِ داخە

هەڵاکِ هۊنگاوِ ئەڵوەنیمن

نە کەڵ ماگە دە کەڵوەز جوور جاران

نە دی ئیمەیشە واشەێ دەروەنيمن

 دە شوونِ ماڵ و مەڵوەن بۊمنە گوم

خوەمان مزنەم هە ماڵ و مەڵوەنیمن

شرین، نام ترِ فەرهادمانە

وە ول وەیلانِ شار ئەرمەنیمن

گەنم داگە وە باێ خەرمان ئیمە

ونە کەێ ئێقرە ئیمە گەنیمن!

دە دۊرەو ئاسووِ ڕووژێ دیارە

وەرەو ئەو ئاسووە پاڕوو ژەنيمن

زاهر سارايي

Shafaq Live
Shafaq Live