ئاسو سوو

بيلا گولباخی خەنەخەن بکەێ

بيلا گول دایم بوشکی وه ناز

بيلا ده عاڵەم پرِ بوو سدای ساز

بيلا نەشئەی مەی بکەی مەدهووشم

بيلا نەغمەی نەی پەخش بوو ده گووشم

بيلا بنيشيم دەوەر نساران

بکەيم تەماشای رەوزەی وەهاران

بيلا سروەی وا سەفا بيەی وه  دەیشت

بيلا دنيا بوو وه  باخ بەهەيشت

بيلا ئەلپەرِيم هەرکەس وەيەی تەرز

شاواز بکيشيم وه  ئاواز بەرز

بيلا شەو بچوو رووژ پاکیگ ئەڵای

دەمان دور بکەی کوڵ قەزاو بەڵای

تا کەی هەناسه، تا کەی خەمباری

تا کەی  واوەیلا، تا وەکەی زاری

تا کەی پەژاره، تا کەی پەشیوی

تا کەی حاکم بوو عادەت دیوی

بيلا تووز خەم، بيلا تەم شين

نەمينی ده روی ساراو سەرزەمين

بيلا ئاسو سوومان رووشن بوو

بيلا رووشنی وڵات پووشن بوو

شیعر:  زاهر سارایی-ئیلام