ئی شاره چه‌و به‌سانه
قه‌ێرێگه کز که‌فتمه، داێم په‌ژاره وارێد!
ڕمیاس ئاسمانم، دێرێ هه‌ساره وارێد!
ده‌س نامه‌سه زرانی، ناپرتنم چه‌وه‌یلم-
تا ئه‌سره‌گه‌م گله‌وده‌م، هه‌ور وه‌هاره… وارێد!
هه‌م دڵخوه‌شی نۆقۆم بی، هه‌م مه‌خشه‌ڵان چراخه‌یل
دماێ هه‌ریز ناتێد، لاوار ئاخ و داخه‌یل
ئووردی شه‌ڕ له وه‌رانوه‌ر، ها ده‌سێیان هه‌ڕه و ته‌وه‌ر
وه ناڵانجی سه‌رانسه‌ر، به‌ر دروو ده‌ن باخه‌یل…
چه‌و کورپه‌گان کوور کردوو، بڵێزه‌ێ کوانێگ بردوو
ئه‌ڕا ئی خێڵ وێڵه، دۊزه‌مه‌و شه‌ڕ هاوردوو
وه‌تن یه ڕێ ڕاسێگه، قه‌ێوخوا قه‌ێوخواێ خاسێگه!
جی په‌پووله‌یل ڕهنگواێڕهنگ، شه‌مشه‌مه‌کوره‌یل گردوو…
له‌ێ زڵمه‌ته، مه‌نیه‌مه مه‌لێگ له ناو ئاگر
ئی خێڵ شه‌وپه‌ره‌سته نایلنه‌مه خوه‌مه‌و ئاخر
هۊشن وه خاسی پڕن، ناوم وه نازه‌و چڕن
له‌ت‌له‌ت وه گیانم بڕن، هانه ته‌ماێ له‌تێ‌تر
مه‌زه‌م تووان بمه‌نم، ساز خوه‌شی بژه‌نم
بفروشم خوه‌م ک به‌ڵکه‌م، که‌مێگ هورمه‌ت بسه‌نم!
ڕێ ڕووشنی باریکه، پڕ له چه‌م تاریکه
وه‌ڵێ ئازای نزیکه، دی وه‌خته دڵ بکه‌نم
په‌شێو بێ که‌س بچوو، گوم بوو له شار دروو
ڕاسی ک چۊز ناێه‌ێد، هه‌ریز له دار دروو
ئی شاره چه‌و به‌سانه، به‌زه‌و بێ‌ده‌نگ وسانه
تا به‌شێان بێه‌ێد قه‌ێوخوا، دایم له ژار دروو…
وەحید میرەبەیگی
