2017-05-27 20:40:00

شه‌فه‌ق نيوز/ زنجيره‌ درامايگ گه‌ورا له‌ مانگ ره‌مه‌زان نمايش ئه‌كريه‌ێد له‌ كووتايى ئى هه‌فته‌و له‌تى رووشنايى ئه‌خريه‌ێده‌ بان ژنه‌يليگ له‌ ريكخرياگ ترۆريستى جوور ژنه‌يليگ بوونه‌ سه‌رباز و ژنه‌يليگ مه‌شق ئه‌يه‌ن و جه‌نگ ئه‌كه‌ن و ژنه‌يليگيش حوكم تونڕه‌ه‌وانه‌ فه‌رز ئه‌كه‌ن و ژنه‌يليگيش خوه‌يان ئه‌ته‌قننه‌و.

 

ئه‌را يه‌كه‌مجاره‌ له‌ جه‌هان عه‌ره‌بى كاريگ ته‌له‌فزيۆنى ئه‌را ماوه‌ى مانگيگ ته‌سوير شيوازه‌يل ژيان رووژانه‌ بكا له‌ساێ "ده‌وڵه‌ت خه‌لافه‌ت" وه‌ خه‌رجيگ ك ره‌سيه‌ فيشتر له‌ 10 مليۆن دۆلار، ئه‌ويش وه‌ پشتبه‌سانن وه‌ روێداگه‌يليگ له‌ حكايه‌ته‌يل واقعى، ك ئى زنجيره‌ دراما له‌بان شاشه‌ێ كه‌ناڵ MBC نمايش ئه‌كريه‌ێد ك باره‌گاێ ها دوبه‌ێ.

 

له‌ ئاواييگ ك ها ژير ده‌سڵات ريكخرياگ ترۆريستى داعش، داپيره‌يگ وه‌ل نه‌وه‌يلى گڵاس و په‌رداخ شيشه‌يى فرووشێد و بڕيگ له‌ ژنه‌يل چه‌كداريش ئه‌يه‌نه‌ ناو دوكانه‌گه‌ێ ئه‌را دقه‌تكردن ئه‌و چشته‌يله‌ ك فرووشيه‌ن، يه‌يش وه‌ گووره‌ى مه‌شهه‌ديگ له‌ يه‌كيگ له‌ هه‌ڵقه‌يل دراماێ "قه‌ڵايه‌يل سيه‌".

 

ئه‌و ژنه‌يل چه‌كداره‌ ك ده‌مانچه‌ و ره‌شاش ها پيان سه‌ر وه‌ "ئه‌لحه‌سبه‌"ن، پۆليس له‌ ريكخرياگ تونڕه‌و په‌يجورى دقه‌تكردن ياسايه‌يل وه‌رده‌وام وه‌پى سپارياگه‌ ك تونڕه‌وه‌يل له‌ ناوچه‌يل ژير ده‌سڵات خوه‌يان له‌ سورياو عراق فه‌رزى كردنه‌.

 

سه‌ركرده‌ێ ده‌وريه‌يگ چه‌وێ كه‌فێده‌ ئه‌و شيشه‌يله‌ ك وێنه‌ێ ئاژه‌ڵه‌يل ها قه‌يانه‌و، ئمجا داوا له‌و داپيره‌ ئه‌كا له‌ليان نه‌فرووشێد وه‌ مه‌هانه‌ێ ئه‌وه‌گ حه‌رامه‌، پيره‌ژنه‌گه‌يش قسه‌گه‌ێ ره‌ته‌و ئه‌كاو ده‌س ئه‌كاده‌ فرووشتنيان ك هه‌رچه‌نى نه‌وه‌گه‌ێ داوا له‌لى ئه‌كا قسه‌يان وه‌ گووش بگرێد، وه‌لێ له‌ناكاو "ئوم حارس" ك سه‌ركرده‌ێ ده‌وريه‌گه‌س ده‌مانچه‌گه‌ێ له‌ پيره‌ژنه‌گه‌ كيشيده‌وه‌و گوله‌ ئه‌نه‌ێده‌ سه‌رى و ئه‌كوشێده‌ى و هيليده‌ێ جى و له‌ دوكانه‌گه‌ێ ده‌رئه‌چێد.

 

له‌ بازگه‌يگ ئاسايشى له‌ يه‌كيگ له‌ جاده‌يل ئاوايه‌گه‌يش، ژنه‌يل حه‌سبه‌ ده‌س وشكانن ره‌وه‌نه‌يل، يه‌كيگ له‌ليان پرسيار له‌ ژنه‌يل روخسار پوشياێ ئه‌كا له‌بان له‌ده‌س نه‌كردن ده‌سپووش، وه‌لێ ئه‌واكانتر مۆبايل وه‌ شه‌يتان و عه‌تر وه‌ مه‌دخه‌ل زنا و چشته‌يل جوانكارى وه‌ مونكه‌ر تاريف كه‌ن.

 

مه‌جموعه‌ى ئێم بى سى سعودى زنجيره‌ دراماى "قه‌ڵايه‌يل سيه‌" له‌ ره‌مه‌زان نمايش ئه‌كه‌ن، ئه‌ويش له‌وه‌ر ئه‌وه‌گ ركابه‌رى ده‌يان زنجيره‌ درامايه‌يل تر عه‌ره‌بى بكا ئه‌را مه‌يلكيشان مليۆنه‌ها كه‌س له‌ رووژه‌وانه‌يل.

 

ئى كار درامييشه‌ له‌ به‌رهه‌م كومپانياى " O3 " و سه‌ر وه‌ مه‌جموعه‌ێ سعوديه‌.

 

مازن حايك قسه‌كه‌ر وه‌ناو ئێم بى سى ئويشێد: تيم نويسه‌ر و ئاماده‌كارى توێژينه‌وه‌يل دريژيگ ئه‌نجام دانه‌و ئاماده‌كردن كاره‌گه‌يش فيشتر له‌ ساڵيگ كيشاگه‌و ره‌سمگرتنيشى فيشتر له‌ شه‌ش مانگ دريژه‌ داشتگه‌.

 

حايك ئويشێد: ئيمه‌ حكايه‌ته‌يليگ راسكانى و كاريگه‌ر خواستيمنه‌ له‌وه‌ر ئه‌وه‌گ كاريگه‌رى له‌ وژدان مه‌ردم داشتوود و ئه‌و ره‌سم ناشرن ترۆره‌ بخاده‌ روێ وه‌ل ئه‌و شيوازه‌يله‌ ك په‌يڕه‌ويان ئه‌كا.

 

زوورم هه‌ڵقه‌يل دراماێ قه‌ڵايه‌يل سيه‌ له‌ لوبنان ته‌سوير كريانه‌، ك بڕيگ له‌ ئه‌كته‌ره‌يل له‌ چه‌ن ده‌وڵه‌تيگ عه‌ره‌بى به‌ه‌شدارى له‌تى ئه‌كه‌ن.

 

زنجيره‌ دراماێ قه‌ڵايه‌يل سيه‌، باس له‌ وه‌ سه‌ربازكردن مناڵه‌يليش ئه‌كا، له‌ يه‌كيگ له‌ مه‌شهه‌ده‌يلى سث مناڵ ده‌ركه‌فێد چه‌ك ره‌شاش ها ده‌سيان و خوه‌يان له‌بان زه‌وى وه‌ زگا دريژه‌و كردنه‌و سێ پياويش ها پشتيان له‌ ريكخرياگ ترۆريستى داعش چه‌وديرييان ئه‌كه‌ن.

 

له‌ هه‌ڵقه‌يگيش له‌ دراماگه‌، ژنيگ له‌ ريكخرياگ ترۆريستى داعش له‌ناو مزگفتيگ دوعا ئه‌خوه‌نێد و ئويشێد: خودايا ره‌فزيه‌يل نه‌يلێد، ئمجا ژنيگ تر پرسيار له‌لى ئه‌كا ماناى رافزيه‌يل چه‌س، ئايا يه‌هوودن؟ دويه‌تيگ جايه‌ڵ جوان جواوێ ئه‌ياده‌و ئويشێده‌پى: شيعه‌ن، وه‌كراگيرياێ ئيرانن له‌ جه‌هان ئسلامى.

 

ئمجا ژنه‌گه‌ ك پرسيار كرد له‌بان ماناێ دوعاگه‌، ئويشێد: ئايا مه‌گه‌ر يه‌هوود خاستر نين؟ ئةوان قودس بردن.

 

}