2017-10-15 18:57:00

شه‌فه‌ق نيوز/ ئافره‌تيگه‌ عراقى خوازيار بوى ناوى ئاشكرا نه‌كريه‌ێد له‌وه‌ر مه‌ترسيه‌يل ئاسايشى، باس له‌و روێداگه‌يل تون وتيژى و سزايه‌يله‌ كرد ئه‌را بى بى سى ك هاته‌سه‌ تويشى دوياى ئه‌وه‌گ وه‌ ديل گيرياگه‌ له‌لايه‌ن چه‌كداره‌يل ريكخرياگ داعش.

 

ئه‌و ئافره‌ته‌ وت: من شيعه‌و توركمانم و هاوسه‌ره‌گه‌م سنى عه‌ره‌به‌، له‌ ناحيه‌ى ئه‌لعه‌له‌م له‌ شار تكريت ژيايم وه‌رجه‌ ئه‌وه‌گ ريكخرياگ ترۆريستى داعش بايده‌ ژيانمان.

 

هاوسه‌ره‌گه‌م خوتبه‌ده‌ر و پياويگ بوى جى ريز و خوه‌شه‌ويسى بوى له‌ كۆمه‌ڵگامان، ئه‌و مزگفتيشه‌ ك له‌تى نماز وه‌ نمازكه‌ره‌يل كردياد نزيك ماڵه‌گه‌مان بوێ.

 

ئيمه‌ جياوازى له‌ ناونى شيعه‌و سنى نه‌كرديايم وه‌رجه‌ ئه‌وه‌، كه‌سيش له‌ى باوه‌ته‌و هويچ باسيگ نه‌كردياد و هويچ كه‌سيگيش دوشمن نه‌ياشتيم و دوشمانه‌يه‌يش له‌ناومان نه‌وێ.

 

دوكان بويچگيگ سه‌وزى فرووشى داشتيم و خه‌ريك نانكردنيش بويم له‌ ناو باخچه‌ى ماڵه‌گه‌مان و خه‌ريك زراعه‌ت ناو باخچه‌گه‌ بويم و وه‌ فه‌زڵ خودا مه‌عيشه‌ت خوه‌مان ده‌ركرديايم.

 

ماڵ گه‌ورايگ داشتيم وه‌ كرايه‌ ديايمه‌ێ شماره‌يگ له‌ ژنه‌ مامۆستايه‌يل

 

من دو مناڵ ديرم، كوڕ و دويه‌تيگ، قوتابى بوين له‌ هه‌مان خوه‌ندنگا ك ئه‌و ژنه‌ مامۆستايه‌يله‌ له‌تى ده‌رس ديان و هه‌ر وه‌ يه‌كيشه‌و وه‌ليانا چيان ئه‌را مه‌دره‌سه‌.

 

هه‌ناى ك چه‌كداره‌يل داعش هاتنه‌ شار تكريت، سه‌ربازه‌يل فريه‌يگ له‌ كه‌مپ سپايكه‌ر دان له‌سێداره‌، يه‌يش يه‌كه‌م كوشتار بوى له‌لايه‌ن داعشه‌و ئه‌نجام درياو له‌تى فيشتر له‌ 1500 سه‌رباز كوشيان و بڕيگ له‌ ته‌رم كوشياگه‌يليش خستنه‌ ئاو فورات.

 

بڕيگ سه‌بازيش واين و روى كردنه‌ شاره‌گه‌ێ ئيمه‌ له‌ڕێ ئاوه‌و ك له‌ناونيمان بوى، دوياى ئه‌وه‌يش چه‌كداره‌يل داعش هاتنه‌ په‌يكردنيان.

 

له‌ ناونى ئه‌و سه‌ربازه‌يليشه‌ ك واين، توركمانيش له‌تيان وجوود داشت و بڕيگ له‌ليان له‌ ماڵ ئيمه‌ خوه‌يان شاردنه‌وه‌و زانستن منيش توركمانم و ده‌سميه‌ت بڕيگيش له‌ليان دايم له‌ واين له‌ڕى دڵنگه‌يل ژنانه‌وه‌.

 

هه‌ناى ك داعش هاته‌ ناو شاره‌گه‌مان، يه‌كيگ له‌و سه‌ربازه‌يله‌ ك واوين خوه‌ى له‌ناو فڕن نانكردنه‌گه‌مان شاردوێده‌و، فڕنه‌گه‌يش گه‌رم بوى و كه‌ميگيش له‌لى سزان، وه‌لێ هاوار نه‌كرد.

 

هاوسه‌ره‌گه‌م سێ پياو له‌ناو مزگفته‌گه‌ شارده‌و، ك شيعه‌ بوين و خه‌ڵك به‌سره‌.

 

رووژيگ له‌ رووژان چه‌كداره‌يل ريكخرياگ داعش له‌ سه‌عات 3ى شه‌وه‌كى هاتن، ئه‌ويش دوياى ئه‌وه‌گ ك زانستوين ئيمه‌ ده‌سميه‌ت سه‌ربازه‌يل ئه‌يه‌يم.

 

چه‌كداره‌يل داعش سه‌ربازه‌يل خه‌ڵك به‌سره‌ دينه‌وه‌و يه‌كسه‌ر كوشتنه‌يان و هاوسه‌ره‌گه‌ميش بردن و دى له‌وساوه‌ نه‌زانستم چه‌ وه‌سه‌رێ هات.

 

له‌شوون ئه‌وه‌يش هاتنه‌و ئه‌را ماڵمان و دوياى ده‌ركردنمان ماڵه‌گه‌مان ته‌قاننه‌و.

 

منيش وه‌ل هه‌ردوگ مناڵه‌گه‌م و ژنه‌ مامۆستايه‌يل توركمانى و مناڵيگ شيره‌خوه‌ر يه‌كيگ له‌ مامۆستايه‌يل كه‌فتيمنه‌ ڕێ، وه‌لێ چه‌كداره‌يل وساننه‌مان و بردنه‌مان ئه‌را گراجيگ خاسه‌وكردن سه‌ياره‌يل وه‌ل ئافره‌ته‌يل تر وه‌ديل گيرياێ له‌ ناوچه‌گه‌.

 

ئيمه‌ نزيكه‌ى 22 ئافره‌ت و مناڵ بويمن، دويه‌ته‌يل له‌ ژنه‌يل جياوه‌ كردن، ئه‌وان په‌نج دويه‌ت بوين و له‌ ورچه‌ومان هه‌تگ وه‌پيان كردن و دويه‌ته‌يليش هاوار كرديان بڕه‌سنه‌ دادمان.

 

منيش هه‌وڵ ئه‌وه‌ دام بانيان بيه‌م، وتمه‌ چه‌كداره‌يل ريكخرياگ داعش قه‌سه‌مدان ئه‌يه‌م وه‌ قورئان واز له‌ى دويه‌ته‌يله‌ بارن و قه‌سه‌مدان ئه‌يه‌م وه‌ خودا ده‌سدريژى مه‌كه‌نه‌ بانيان و هه‌تگيان مه‌كه‌ن, وه‌لێ يه‌كيگ له‌ چه‌كداره‌يل شه‌پازله‌يگ داليم و يه‌كيگيانيش وه‌ گشت قوه‌تيگ قه‌پيگ گرته‌ شانم و خويناليى كرد.

 

چوار پياوه‌ وه‌ نه‌وبه‌ ده‌سدريژى كرديانه‌ بان دويه‌ته‌يل و دويه‌ت هاوسه‌ره‌گه‌ميش هه‌تگ كردن ك ته‌مه‌نى هه‌يژده‌ ساڵ بوى ك من ئمايه‌تى كردويم و دوياى ئه‌و هه‌تگكردنه‌ يه‌كسه‌ره‌ گيان له‌ده‌سدا و مرد.

 

باقى دويه‌ته‌يليش له‌ ته‌مه‌ن بيس ساڵان بوين و ده‌سدريژى كرديانه‌ بانيان و له‌ هه‌مان وه‌خت هه‌تگيش وه‌پيان كرديان.

 

يه‌كيگ له‌و دويه‌ته‌يله‌ تا بويشێد جوان بوى، هه‌تگ فريه‌يگ وه‌پى كرديان و هيلاكى كرديان.

 

ئه‌و دويه‌ته‌يله‌ تويش خوينڕيزى فريه‌يگ هاتن و يه‌كيگ له‌ليان كه‌فته‌ بان كوچگيگ و سقانى شكياو دوياخريش گيان له‌ده‌سدا.

 

گشت ئه‌و دويه‌ته‌يله‌ نه‌خوه‌ش كه‌فتيان و بڕيگيش له‌ليان مردن.

 

منيش ته‌ماشاى روخسار چه‌كداره‌يل كرديام و دووان له‌ليان ناسيم، ك خه‌ڵك شاريگ عه‌ره‌بنشين سنى بوىن نزيك له‌ شاره‌گه‌مان، مه‌ردم فريه‌يگيش له‌ ناوچه‌گه‌مان چينه‌ ناو داعش، وه‌لێ فريه‌يگيش له‌ عه‌ره‌ب سنى ناڕازى بوين له‌ داعش و وه‌ ئازايه‌تى دژايه‌تى ئه‌و ريكخرياگه‌ كرديان.

 

ئيمه‌ له‌و گراجه‌ حه‌بس كردن وه‌بى خوه‌راك و منيش وه‌زنم فريه‌ داوه‌زى تا ره‌سيمه‌ حاڵه‌تيگ پووس له‌شم شه‌قشه‌قه‌و بوى و كوڵه‌نجييش داپيمه‌و وه‌بى ئه‌وه‌گ هس وه‌پى بكه‌م.

 

نزيكه‌ى 21 رووژ له‌و گراجه‌ كه‌نديم و دوياى ئه‌وه‌يش پياويگ پير وه‌ساڵاچگ كردنه‌ پاسه‌وانمان، ئه‌و پياوه‌ خوه‌شمان تواست، ئاو ئه‌رامان هاوردياد هه‌ر وه‌ختيگ چه‌كداره‌يل له‌ هه‌تگكردنمان واز هاورديان.

 

رووژيگيش له‌ رووژان شير ئه‌را مناڵه‌يلمان هاورد، وه‌لێ رووژيگ چه‌كداره‌يل هاتن و كردنه‌مانه‌ دو به‌شه‌و، به‌شيگ له‌ليمان دويره‌و خستن و منيش وه‌ل مناڵه‌يلم و مناڵ مامۆستا توركمانيه‌گه‌ مه‌ندم ك خوه‌ى له‌ئاكام هه‌تگكردن گيان له‌ده‌سدا.

 

پياوه‌ پيره‌گه‌ وته‌پيمان ئيوه‌يش ئه‌وه‌ن، بايه‌سه‌ يه‌كسه‌ر خوه‌دان قورتار بكه‌ين، ئمجا برده‌مان ئه‌را ڕييگ له‌ ده‌يشت ناوچه‌گه‌و خوه‌ى گله‌و خوارد.

 

من له‌ناو گراجه‌گه‌ داوا له‌ خودا كرديام بڕه‌سيده‌ دادمان، باوه‌ڕم ئه‌وه‌ بوى خودا ئه‌و پياو پيره‌ ئه‌رامان ره‌سان تا قورتارمان بكه‌ێد.

 

دوياى ئه‌وه‌يش زانستم ك چه‌كداره‌يل ريكخرياگ داعش ئه‌و پياو پيره‌ كوشتنه‌ له‌وه‌ر ئه‌وه‌گ ده‌سميه‌ت ئيمه‌ داگه‌ ئه‌را واين، پياويگ فريه‌ خاس بوێ.

 

روێ كرديمنه‌ بياوانيگ، هه‌وريش هاورد و نمه‌نم وارانيش بوى و زه‌وييش ته‌ڕ بوى و ئيمه‌يش دڵنگ وه‌پيمان نه‌وى مقه‌يه‌تمان بكه‌يد له‌و وارانه‌ و خوه‌راكيش نه‌ياشتيم و هه‌ر گژوگيا خوارديايم.

 

كوڕ شيرخوه‌ره‌گه‌ێ ژنه‌ مامۆستاگه‌ مرد و له‌ باوه‌ش من بوێ، دوياى په‌نج رووژ ره‌سيمنه‌ كه‌ركوك، چيمه‌ ماڵه‌ كويه‌نه‌گه‌ى ميمگم له‌ كه‌ركوك.

 

خيزان ئه‌و دويه‌ت بويچگه‌ ك واى وه‌لما پيشوازى له‌لى نه‌كريا، وتن ئى مه‌سه‌له‌ په‌يوه‌سه‌ وه‌ شه‌ره‌ف، ئيسه‌يش ئه‌و ها ئيران چاره‌سه‌ر ده‌روينى ئه‌راێ ئه‌كه‌ن.

 

شوون و نوين هاوسه‌ره‌گه‌م نه‌زانستم، قه‌ورسانه‌يليش گه‌رديم و مينه‌ى دويه‌ت هاوسه‌ره‌گه‌ميش و ئه‌و پياو پيريشه‌ كردم ك ده‌سميه‌تمان دا له‌ واين، وه‌لێ بى فايده‌ بوى و كه‌سيان نه‌يمه‌و.

 

ئيسه‌يش مناڵه‌يلم ئحساس وه‌ دڵته‌نگى ئه‌كه‌ن، كوڕه‌گه‌م قسه‌ ناكا له‌و رووژه‌و ك ئى موسيبه‌ته‌ هاه‌ تويشمان.

 

هه‌وڵ دام گله‌و بخوه‌م ئه‌را شوون و ماواى خوه‌م و له‌ورا بژيه‌م، وه‌لێ ناتويه‌نم، ئيسه‌ په‌نا بردمه‌سه‌ لاى پيره‌ژنيگ و هه‌وڵ ئه‌يه‌م ته‌دبير خوه‌م بكه‌م و مه‌عيشه‌تم وه‌ هه‌ر جووريگ بوود ده‌ربكه‌م.

 

ئيمه‌ تويش سه‌ختيه‌يل رخه‌وبه‌ريگ هاتيم وه‌ده‌س چه‌كداره‌يل داعش و فريه‌يش ئه‌زيه‌ت كيشايم، باوه‌ڕم ئه‌وه‌سه‌ هه‌ركه‌سيگ تويش ئيچنه‌ حاڵه‌ته‌يليگ باێد ئه‌زانيد چه‌نيگ تويش شه‌ڕ هاتگه‌، ئيه‌يش ته‌نيا ئه‌را مناڵه‌يلم ژيه‌م.

 

}