2019-05-11 19:44:31

شه‌فه‌ق نيوز/ هوير وڕاى شاره‌زايه‌يل و شيه‌وكه‌ره‌يل وه‌ پشتبه‌سانن وه‌ قسه‌يليگ له‌ سه‌رچه‌وه‌يليگ حكومى عراقييه‌و ئاماژه‌ وه‌ ئه‌وه‌ ئه‌كه‌ن سه‌ردان مايك په‌مپيۆ وه‌زير خارجيه‌ى ئه‌مريكا ئه‌را به‌غدا هه‌ڵگرتن په‌ياميگ دياريكرياێ ئه‌مريكى بويه‌ ئه‌را سه‌ركردايه‌تى عراقى له‌باره‌ى هه‌ڕه‌شه‌يل راسه‌وخۆ ئيران يا ناڕاسه‌وخۆ له‌لايه‌ن هيزه‌يل هاوپه‌يمانى دژ به‌رژه‌وه‌نديه‌يل ئه‌مريكا له‌ ناوچه‌گه‌.

 

له‌ناونى ئه‌و باسه‌يله‌ ك له‌لايه‌ن هووكاره‌يل ره‌سانن ناوچه‌يى و بيگانه‌وه‌ باس كريا، تاووتويكردن مايك په‌مپيۆ وه‌ل عادل عه‌بدولمه‌هدى سه‌رۆك وه‌زيره‌يل عراقى و وه‌رپرسه‌يل تر دقه‌ت له‌بان ئه‌من سه‌ربازه‌يل ئه‌مريكى و به‌رژه‌وه‌نديه‌يل ئه‌مريكى و ئاسايش كۆمپانيايه‌يل و كارمه‌نده‌يلێ له‌ عراق و زه‌مانه‌تكردنيان بويه‌ له‌و هه‌ڕه‌شه‌يل ئيرانه‌.

 

له‌وه‌ختيگه‌و دۆناڵد ترامپ سه‌رۆك ئه‌مريكا سه‌ردان بنگه‌ى سه‌ربازێ عه‌ينولئه‌سه‌د كرد له‌ خوه‌رئاواى عراق له‌ى كووتايى ساڵ گوزه‌يشت و لێدوانه‌يلى له‌باره‌ى مه‌ندنه‌وه‌ى سه‌ربازه‌يلێ له‌ عراق له‌وه‌ر ئامانجه‌يليگ په‌يوه‌س وه‌ چه‌ودێرى چالاكيه‌يل ئيرانى له‌ عراق، هه‌ڕه‌شه‌ى گرووپه‌يل چه‌كدار سه‌ر وه‌ حه‌شد شه‌عبى له‌ سه‌ربازه‌يل ئه‌مريكى له‌ عراق زياێ بويه‌.

 

وڵاته‌يل يه‌كگرتگ هه‌ڕه‌شه‌ى ئه‌و گرووپه‌يل حه‌شد شه‌عبيه‌ وه‌ جددى وه‌رگرتگه‌و هه‌وڵ ئه‌وه‌ ئه‌ياد كار وه‌ل حكومه‌ت عراقى بكا ئه‌را زه‌مانه‌تكردن ئاسايش هيزه‌يلى و مقه‌يه‌تيكردن له‌ به‌رژه‌وه‌نديه‌يل ئه‌مريكا له‌ عراق.

 

هيمان وڵاته‌يل يه‌كگرتگ ته‌ئكيد نيه‌ له‌ تواناى خوه‌ى ئه‌را وه‌كاربردن وجوود سه‌ربازيه‌گه‌ى له‌ عراق وه‌ هه‌ماهه‌نگى و هاوكارى هاوبه‌ش وه‌ل حكومه‌ت عراقى ئه‌را روێ وه‌ڕوێ بوينه‌وه‌ى هه‌ڕه‌شه‌يل ئيرانى.

 

شه‌و سێشه‌ممه‌ 7 ئايار/ مايۆ، مايك په‌مپيۆ له‌ناكاو سه‌ردانه‌گه‌ى ئه‌را ئه‌ڵمانيا هه‌ڵوه‌شانه‌و ئه‌را ديدارى وه‌ل ئه‌نگيلا مێركڵ راوێژكار و وه‌زيره‌ خارجيه‌گه‌ێ و سه‌ردان به‌غدا كرد وه‌ بوونه‌ى مه‌سه‌له‌يليگ ك بايه‌سه‌ چاره‌سه‌ر بكريه‌ن.

 

په‌مپيۆ له‌ڕى هاتنى ئه‌را به‌غداى پايته‌خت، ئاگادار رووژنامه‌نويسه‌يل ياريده‌ده‌رى كرد چه‌وێ ئه‌كه‌فێده‌ سه‌رۆك كۆمار و سه‌رۆك وه‌زيره‌يل عراق، له‌وه‌ر ده‌رخستن پاڵپشتى ئه‌مريكا ئه‌را عراق و سه‌روه‌خوه‌يبوينى دوير له‌ هه‌ژموون ئيرانى، بيجگه‌ تاووتوێكردن ريككه‌فتنه‌يليگ بازرگانى وه‌ ئه‌وه‌گ عراق پشتبساننى له‌بان وزه‌ى ئيران دى به‌سه‌و ئاگادار وه‌رپرسه‌يل عراقييش ئه‌كا له‌باره‌ى چه‌وديرێ ريككه‌فتنه‌يل وزه‌ وه‌ل ده‌وڵه‌ته‌يليگ جوور سعوديه‌و ئيمارات و ئوردن و مسر وه‌خاتر كه‌مه‌وكردن پشبه‌سانن وه‌ كاره‌باى ئيران.

 

مايك په‌مپيۆ ئه‌را رووژنامه‌نويسه‌يل ئه‌وه‌ ده‌رخست وڵاته‌گه‌ى خوازياره‌ موحاسبه‌ى ئيرانيه‌يل بكا له‌بان هه‌ر په‌لاماره‌يليگ ئه‌را بان به‌رژه‌وه‌نديه‌يل وڵاته‌يل يه‌كگرتگ له‌لايه‌ن بڕيگ له‌ بريكاره‌يلى سه‌ر وه‌ لايه‌نه‌يل ده‌ره‌كى چ جه‌ماعه‌ت ميليشياى شيعه‌ يا حووسيه‌يل يا حزبوڵڵاى لوبنانى و وت: راسه‌وخۆ وه‌رپرسيارێتى ئه‌خه‌يمنه‌ بان سه‌ركردايه‌تى ئيرانى له‌و كاره‌يله‌.

 

سه‌ردانه‌گه‌ى وه‌زير خارجيه‌ى ئه‌مريكا، دوياى دو رووژ هات له‌ لێدوانه‌يل راوێژكار ئاسايش نه‌ته‌وه‌يى ئه‌مريكى ك له‌تى باس له‌وه‌ كرد وڵاته‌گه‌ى ته‌ياره‌هه‌ڵگر جه‌نگى ئبراهام لينكۆڵن بڵاو كردگه‌ وه‌ل شماره‌يگ له‌ كه‌شتيه‌يل جه‌نگى ده‌رياوانى و قازيفه‌يل بۆمب ستراتيجى ئه‌را روێ وه‌ڕوێ بوينه‌وه‌ى هه‌ڕه‌شه‌يل ئيرانى وه‌گووره‌ى زانياريه‌يل هه‌واڵگيرى.

 

وه‌ل ئه‌وه‌يشا وه‌زاره‌ت وه‌رگرى ئه‌مريكى(پنتاگۆن)وشدارى دا له‌باره‌ى هه‌ڕه‌شه‌ێ به‌له‌مه‌يل بويچگ ئيرانى ك گومان ئه‌كريه‌ێد مووشه‌كه‌يل كورت مه‌ودا هه‌ڵگرتوێن.

 

ئمجا ئه‌گه‌ر وه‌زير خارجيه‌ى ئه‌مريكى وه‌ متمانه‌وه‌ قسه‌ كرد له‌وه‌گ حكومه‌ت عراقى قه‌وڵ مقه‌يه‌تيكردن په‌رژه‌وه‌نديه‌يل ئه‌مريكى داگه‌، وه‌لێ واقعه‌گه‌ ئاماژه‌ وه‌ ئه‌وه‌ ئه‌كا هيز و نفوز كۆمه‌ڵه‌يل چه‌كدار وهاوپه‌يمان ئيران له‌ عراق چشتيگ تر ئه‌خوه‌نێده‌وه‌و فريه‌جاريش به‌رژه‌وه‌نديه‌يل ئيرانى له‌وه‌رچه‌و ئه‌گيريه‌ێد، ك يه‌يش له‌يوا ئه‌كا ئيچنه‌ قه‌وڵه‌يليگ له‌ حكومه‌ت عراقى دوير بدێ له‌ واقع، يه‌يش له‌وه‌ختيگ ئه‌گه‌ر ئيران باوه‌رێ ئه‌وه‌ بدێ په‌لامار سه‌ربازه‌يل ئه‌مريكى بيه‌ێد يا به‌رژه‌وه‌نديه‌يل ئه‌مريكا بگرێده‌ ئامانج له‌ڕێ ئه‌و كۆمه‌ڵه‌يل چه‌كداره‌ ك لايه‌نگرى له‌ ئيران ئه‌كه‌ن.

FaceIraq
}