2017-02-15 18:58:00

شه‌فه‌ق نيوز/ ڤيان ده‌خيل ئه‌ندام ئه‌نجومه‌ن نوێنه‌ره‌يل عراقى و كورد ئێزيدى، وێنه‌يگ تراجيدى مه‌ويسى نه‌خشان وه‌ ئه‌وه‌گ شايه‌ت جه‌نگ دژ ريكخرياگ ترۆريستى داعش بدێده‌ شانۆيگ له‌ رووژه‌يل ئاينده‌.

 

ده‌خيل توانج له‌بان ئه‌و گرته‌ى ڤيديۆيى ريكخرياگ داعشه‌ دا ك دو مناڵه‌گه‌ له‌تى ده‌ركه‌فن و داعش له‌تى وت: ئه‌و هه‌ردوگ مناڵه‌ كرده‌وه‌يل خوه‌يكوشى ئه‌نجام دانه‌ له‌ ديم چه‌پ له‌ شار موسڵ.

 

ئه‌و دو مناڵه‌ له‌ناونى ئه‌و هه‌زارام ئێزيديه‌يله‌ بوين ك ريكخرياگ داعش رفانه‌يان له‌ قه‌اى شه‌نگاڵ له‌ تاوسان 2014، ك ده‌سكرده‌ كوشتن پياوه‌يل و دويره‌وخستن ژنه‌يل و مه‌شقكردن وه‌ مناڵه‌يل له‌وه‌ر كرده‌وه‌يل سه‌ربازى.

 

له‌و گرته‌ى ڤيديۆيى تازه‌ ك له‌لايه‌ن نويسينگه‌ى ره‌سانن "ولايه‌ت نه‌ينه‌وا"نمايش كريا، مناڵه‌يل چه‌كدار بويچگ له‌ پيكهاته‌ى ئێزيدى له‌ يه‌كيگ له‌ سه‌ربازگه‌يل ئه‌و ريكخرياگه‌ خه‌ريك مه‌شقكردنن و داعش له‌يوا باسكرد ك ئه‌وانه‌ هاتنه‌سه‌ ناو ئايين ئسلام و ئايينه‌گه‌ى خوه‌يان وه‌ ئايين كافره‌يل زانستنه‌و فريه‌يگيش له‌ليان كرده‌وه‌يل خوه‌يكوشى ئه‌نجام دانه‌.

 

له‌ گرته‌ ڤيديۆيه‌گه‌ دو برا له‌ پيكهاته‌ى ئێزيدى ديارن ك دو كرده‌وه‌ى خوه‌يكوشى ئه‌نجام دانه‌ دژ هيزه‌يل عراقى له‌ موسڵ، يه‌كيگ له‌ليان ناسرياگه‌ وه‌ ئه‌مجه‌د ئه‌بو يوسف شه‌نگاڵى ك باس له‌وه‌ كردياد وه‌ زووان كوردى قسه‌ كرديان و شه‌يتان په‌رسيان و له‌ سه‌رده‌م نه‌فامى ژيانه‌.

 

باس له‌وه‌يش كرد ك ده‌رسه‌يليگ شه‌رعى خوه‌نينه‌و چينه‌سه‌ ناو سه‌ربازگه‌يگ سه‌ر وه‌ ريكخريگ داعش له‌ شام وه‌رجه‌ تۆماركردنيان له‌ ليست خوه‌يكوشه‌يل، يه‌يش له‌وه‌ختيگ ك براگه‌ى ناوى ئه‌سعه‌د بوى و ناسريا وه‌ ئه‌بو خه‌تاب و خه‌ڵك ئاوايى ته‌ل قه‌سه‌به‌ بوينه‌ له‌ شه‌نگاڵ و له‌و گرته‌ى ڤيديۆييه‌ وت: ئيشه‌ڵڵا خوه‌م و براگه‌م دژ دوشمنه‌يل خودايم و كرده‌وه‌يل شه‌هاده‌ت ئه‌نجام ئه‌يه‌يم.

 

وه‌ل ئه‌وه‌يشا له‌ گرته‌يگ ئه‌وه‌ ده‌ركه‌فت ئه‌و هه‌ردوگ برا كرده‌وه‌يل خوه‌يكوشى دژ هيزه‌يل ئاسايشى عراقى ئه‌نجام دان له‌ ديم چه‌پ شار موسڵ ك وه‌رجه‌ ماوه‌يگ كه‌فته‌ ژير ده‌سڵات هيزه‌يل عراقى.

 

ئمجا له‌ توانجيگ له‌بان ئه‌و گرته‌، ڤيان ده‌خيل باس له‌وه‌ كرد خيزان ئه‌و دو مناڵه‌ ك شماره‌يان 35 كه‌س بوينه‌ ته‌نيا 2 كه‌س له‌ليان مه‌ندگه‌و هه‌ردوگيانيش بران و له‌ كه‌مپيگ ژيه‌ن دوياى سه‌ربڕين برايه‌يل و باوگيان له‌ شه‌نگاڵ و كوشتن پيره‌ژنه‌يل و بردن ژنه‌يل و دويته‌يليان.

 

ده‌خيل هه‌ميش له‌ لێدوانيگ رووژنامه‌نويسى ئه‌را(شه‌فه‌ق نيوز)وت: ئه‌و هه‌ردوگ برا ك له‌و گرته‌ى ڤيديۆييه‌ ده‌ركه‌فن ئه‌يانه‌ دويا قوربانى بوينه‌.

 

نوێنه‌ر ئێزيديه‌يل له‌ په‌رله‌مان عراقى هه‌ميش وت: زويتريش چه‌ن جاريگ ئاماژه‌ وه‌ وجوود فيشتر له‌ هه‌زار مناڵ كرديمنه‌ له‌ زيندانه‌يل تايبه‌ت داعش و ئه‌يه‌ريه‌نه‌ كار و بوونه‌ بۆمبايگ ته‌وقيتكرياى و قه‌ڵغان به‌شه‌رى.

 

ده‌خيل وت: ئايا گوناى ئى مناڵه‌يله‌ چه‌س؟ ك دوجار بوينه‌سه‌ قوربانى، جاريگ له‌ وه‌ختيگ ك له‌ خيزانه‌يليان داوڕيان و جاريگيش گيان له‌ده‌سدان له‌ئاكام كرده‌وه‌يل خوه‌يكوشى.

 

جى باسه‌، ده‌خيل ك وێنه‌يگ مه‌ويسى نه‌خشان هه‌ميش وت: نازانم له‌ ئاينده‌ له‌وه‌ختيگ ك هيزه‌يل ئاسايشى ئه‌يه‌نه‌ تويش ئه‌و مناڵه‌يله‌ ئايا جوور داعشيه‌يل دوينه‌يان و كوشنه‌يان يا جوور قوربانى ته‌ماشايان ئه‌كه‌ن و ئه‌گرنه‌يانه‌ باوه‌ش و ئه‌ويش خوه‌ى وه‌پيانا بته‌قنێد، دى نازانم ئه‌را قوربانيه‌يلمان بگيريم يا ئه‌را شه‌هيده‌يلمان.

 

FaceIraq
}