2018-04-26 19:31:00

شه‌فه‌ق نيوز/ كورده‌يل فه‌يلى ئيجاره‌ وه‌ هيزه‌وه‌ به‌شدارى له‌ هه‌ڵوژاردنه‌يل نوێنه‌رايه‌تى عراقى ئه‌كه‌ن له‌بان ئاشت شماره‌يگ له‌ كانديده‌يل، وه‌ل ركابه‌رييش له‌بان كورشى ته‌رخانكرياێ كۆتا له‌ پاريزگاى واست.

 

نوێنه‌رايه‌تى كورده‌يل فه‌يلى له‌ خوله‌يل نوێنه‌رايه‌تى وه‌رين وه‌شيوه‌ى فراوانيگ نه‌وێ و ته‌نيا له‌بان وجوود كه‌سه‌يليگ له‌ناو فراكسيۆنه‌يل يا ليسته‌يل سه‌ر وه‌ حزبه‌يل كوردستانى يا شيعه‌ مه‌ند، به‌ش كه‌ميگيش له‌ليان له‌ خوله‌يل وه‌رين سه‌ركه‌فت ئه‌را په‌رله‌مان عراقى له‌ڕێ ليست داخرياێ يا يه‌كه‌مين خول، ئه‌ويش له‌ وه‌ختيگ ته‌نيا كه‌سيگ له‌ خول وه‌رين له‌ په‌رله‌مان كوردستان نوێنه‌رايه‌تى ئى شه‌ريحه‌ كرد و له‌به‌ش عه‌لى حسێن فه‌يلى بوى له‌بان فراكسيۆن پارت ديموكرات كوردستان.

 

نوێنه‌رايه‌تى ناوچه‌يى فه‌يليه‌يليش له‌ڕێ كۆتاى ئه‌نجمه‌ن پاريزگايه‌يل له‌ به‌غدا و يه‌كيگيش له‌بان پاريزگاى واست هات، وه‌لێ ياساى تازه‌ى هه‌ڵوژاردنه‌يل يه‌ك كورسى له‌بان پاريزگاى واست چه‌سپان وه‌ سيستم كۆتا، ئه‌ويش دوياى داواكاريه‌يل وه‌رين ئه‌را ته‌رخانكردن 3 كورسى له‌ليانيش له‌ به‌غداو له‌ دياله‌.

 

له‌ى باوه‌ته‌و، عسام ئه‌كره‌م فه‌يلى چالاكوان ئه‌را شه‌فه‌ق نيوز ئويشێد: شايه‌ت كار ئه‌ڵڵاجه‌وييگ بوود ك كانديده‌يل له‌ كورده‌يل فه‌يلى ئه‌را ئى هه‌ڵوژاردنه‌يل زياتر له‌ 100 كانديد بوون، وه‌لێ له‌بان كۆتاى واست 12 كه‌س ركابه‌رى ئه‌كا.

 

سه‌ربازگه‌ى كانديده‌يل فه‌يلى دابه‌شه‌و ئه‌دێ، مه‌ردميانيش كه‌فه‌سه‌ ناونى به‌ش نه‌ته‌وه‌يى و مه‌زه‌وى. وه‌نسبه‌ت ئه‌را فريه‌يگ له‌ كانديده‌يل فه‌يلى هاوردنه‌وه‌ى ماف رووڵه‌يل ئى پيكهاته‌و ماڵ و موڵكه‌يليان ئه‌ركيگ سه‌ره‌كيه‌و به‌رنامه‌ هه‌ڵوژاردنه‌گه‌يان له‌لى به‌شدار ئه‌دێ.

 

ئه‌را يه‌كه‌مجاريشه‌ له‌ هه‌ڵژاردنه‌يل ته‌شريعى زياتر له‌ ليست و هاوپه‌يمانييگ فه‌يلى به‌شدارى ئه‌كا، وه‌لێ كه‌سه‌يل تر چينه‌سه‌ ناو ليسته‌يل جياجيا يا پشتگير له‌ حزبه‌يل ناسرياێ سياسى.

 

ركابه‌ره‌يل له‌ به‌غداو واست و پاريزگايه‌يل تر دابه‌ش بوينه‌، وه‌لێ ته‌نيا خانميگ كانديدكرياێ كورد فه‌يلى له‌ هه‌رێم كوردستان وه‌ناو شه‌يما نه‌جم سه‌فه‌ر له‌بان پاريزگاى هه‌ولێر به‌شدارى ئه‌كا له‌ ليست پارت ديموكرات كوردستان.

 

كورده‌يل فه‌يلى بڵاوه‌و بوينه‌ له‌ ناوچه‌يليگ وه‌ دريژايى به‌ش رۆژهه‌لات له‌ مه‌رزه‌يل عراقى ئيرانى و له‌ناوڕاس و باشوور عراق و له‌ پاريزگايه‌يل واست و ميسان و له‌باكووريشه‌و تا پاريزگاى دياله‌ وه‌ شاره‌يل جه‌له‌ولاو خانه‌قين و مه‌نه‌لى له‌ وه‌رانوه‌ر دابه‌شبوينيان له‌ناو خاكه‌يل ئيران له‌ پاريزگايه‌يل كرماشان و ئيلام.

 

وه‌لێ له‌ به‌غداى پايته‌خت ده‌رفه‌ت ئه‌را كورده‌يل فه‌يلى هه‌ڵكه‌فت تيكه‌ڵ له‌ چالاكى بازرگانى بوون ك دوياى كووچكردن يه‌هووديه‌يل له‌ساڵ 1948 فراوانه‌و بوى، ئه‌و بۆشايى له‌ بوار بازرگانى پڕه‌و كريا وه‌ حوكم جيگيربوينيان له‌ناوڕاس ناوه‌ند بازرگانى پايته‌خت له‌ جاده‌ى ره‌شيد و ناوچه‌يل شێخ عومه‌ر و كفاح و حه‌يولئه‌كراد ك گره‌وبوين فريه‌ى فه‌يليه‌يل له‌تى بوى له‌ ساڵه‌يل  په‌نجاو شه‌سه‌يل سه‌ده‌ى وه‌رين.

 

فه‌يليه‌يل له‌ڕوێ نه‌ته‌وه‌ييه‌و كوردن و له‌ڕوێ مه‌زه‌وييشه‌و شيعه‌ن، وه‌ل ئه‌وه‌يشا رژيم به‌عس وه‌ لايه‌نگر ئيران و پشتگيريكه‌ر حزبه‌يل كوردى زانسته‌يان و بيبه‌شيان كرد له‌ كار وه‌زيفه‌يى حكومى له‌ماوه‌ى ده‌يه‌يل يه‌كه‌م دامه‌زرانن ده‌وڵه‌ت تازه‌ى عراقى وه‌رجه‌ ئه‌وه‌گ بكه‌فنه‌ وه‌ر ياسايه‌يل كووچ وه‌پيكردن ئه‌را ئيران له‌ هه‌فتاو هه‌يشتايه‌يل سه‌رده‌ى وه‌رين وه‌ مه‌هانه‌ى "ته‌به‌عيه‌ى ئيرانى".

 

وه‌ل ئه‌وه‌يشا ئاماريگ فه‌رمى نيه‌ له‌بان شماره‌ى كورده‌يل فه‌يلى له‌ عراق، وه‌تايبه‌ت له‌ساى ئه‌و بارودوخه‌ ك هاته‌ تويش ئى پيكهاته‌ له‌ كرده‌وه‌يل كووچ وه‌پيكردن و سه‌ندنه‌وه‌ى ره‌گه‌زنامه‌يليان.

 

 

FaceIraq
}