2016-11-16 11:08:00

مه‌سعود له‌ ده‌ور ته‌لبه‌نيگ ئاسنين له‌ كه‌مپ خازر له‌ ده‌روازه‌يل كوردستان عراق ئه‌گه‌ردێد له‌شوون دوينستنه‌وه‌ی تاكه‌يل خيزانه‌گه‌ی ك له‌تاوسان ساڵ ٢٠١٤ تائيسه‌ چه‌وی وه‌پيان نه‌كه‌فتگه‌ له‌وه‌ختيگ ك ريكخرياگ ترۆريستی داعش زاڵ بويه‌ له‌بان شاره‌گه‌يان و بڕيگ له‌ليان تويه‌نستن بهه‌يوان وه‌ره‌و شوونه‌يل تر.

براگه‌ی مه‌سعود و هاوسه‌ره‌گه‌ی و هه‌رسێ مناڵه‌گه‌يان تويه‌نستن له‌ زويه‌ خوه‌يان قورتار بكه‌ن له‌ژير ده‌سڵات ريكخرياگ ترۆريستی داعش، ئه‌ويش له‌شوون ده‌ رووژ ده‌سوه‌پيكردن په‌لاماره‌يل سوپای عراقی وه‌ پشتگيری هاوپه‌يمان ناوده‌وڵه‌تی ئه‌را بان شار موسڵ.

شاره‌گه‌ ئه‌را ماوه‌ی دو ساڵه‌ ژيان له‌تی سه‌خته‌و زوورم مه‌ردمه‌گه‌يشی شوانی ئه‌كه‌ن له‌ ديم خوه‌رهه‌ڵات موسڵ و له‌ناونی ماوه‌يگ و ماوه‌يگ تر هه‌ردوگ براگه‌ له‌ڕی په‌یوه‌ندی ته‌له‌فۆنی هه‌واڵ يه‌كتری زانستيان، ئه‌ويش له‌شوون ئه‌وه‌گ يه‌كيگ له‌ليان له‌ زويه‌ مه‌ند و ئه‌واكه‌يش ره‌و كرد وه‌ره‌و كوردستان عراق.

مه‌سعود ئسماعيل حه‌سه‌ن ته‌مه‌ن ٦١ ساڵان ئويشێد: من جنگ ئاسايی كوردی له‌وه‌ر كرديام، چه‌كداره‌يل داعش قه‌يه‌غه‌ی په‌يوه‌ندی له‌ليمان كرديان، وه‌لێ هه‌نای ك تووڕ په‌يوه‌ندی وجوود بياشتاد هه‌ڵه‌په‌ڵه‌ ته‌له‌فۆن كرديايم.

عسام سه‌عدو ك ئه‌ويش خوه‌ندكاريگه‌ له‌ ته‌مه‌ن ٢٢ ساڵان ئويشێد: تونڕه‌وه‌يل هه‌ميشه‌ تومه‌تبار كورده‌يل ژير ده‌سڵاتيان وه‌ ئه‌وه‌ كرديان ك گوايا زانياری ئه‌يه‌نه‌ پێشمه‌رگه‌، ئه‌و هيزه‌يل پێشمه‌رگه‌ ك ئمڕوو به‌شداره‌ له‌ جه‌نگ هاوردنه‌وه‌ی موسڵ.

عسام باس له‌وه‌يش ئه‌كا له‌ تاوسان ٢٠١٤ تائيسه‌ چه‌وی نه‌كه‌فته‌سه‌ برايه‌يلی ك شه‌ش بران، وه‌لێ دويای ماوه‌يگ په‌يوه‌ندی وه‌پيانه‌و كرد و هه‌ر له‌وسايشه‌و تائيسه‌ چه‌وه‌ڕی كرد ك بتويه‌نن خوه‌يان قورتار بكه‌ن و له‌شاره‌گه‌ ده‌ربچن.

رووژانه‌ شماره‌ی تازه‌يگ له‌ كووچبه‌ره‌يل ره‌سنه‌ كه‌مپ خازر و پێشمه‌رگه‌يش ناويان نويسنن و وشكننه‌يان. مه‌سعود ئويشێد: هه‌ر وه‌ختيگ له‌ی ئه‌نجامداين ڕی وشوونه‌يله‌ ته‌مام بدێد يه‌كسه‌ر شوون و خواردن و هه‌وه‌جه‌يل تر جوور دوشه‌ك و په‌توو وه‌پێد ئه‌دريه‌ێد.

له‌ ده‌ور ئه‌و چادره‌يله‌ دو باڵۆن ديارن ك ته‌پ وتووز بانيان گرتگه‌، ده‌يان كارگه‌ر وه‌هاناڕه‌س مادده‌يل خوارده‌منی دابه‌ش ئه‌كه‌ن.

وه‌ دريژايی ته‌لبه‌نه‌ ئاسنينه‌گه‌ مه‌ردمه‌ كووچبه‌ره‌ تازه‌گه‌ له‌ كووچبه‌ره‌يل كويه‌ن جياوه‌ ئه‌دێ، وه‌لێ تاكه‌يل بڕيگ له‌ خيزانه‌يل چه‌ويان ئه‌كه‌فێده‌ يه‌كتری و ده‌س ئه‌كه‌نه‌ گيرستن و مه‌ردمانيگيش له‌ليان خه‌ريك پرسيارن و بڕيگيش له‌ليان ئاشنان وه‌ل يه‌كتری و سه‌ر سه‌ڵامی له‌ يه‌كتری ئه‌كه‌ن.

يه‌كيگيان وت: باوگم نه‌خوه‌شه‌، دی نازانم ئايا قسمه‌تم ئه‌دێ ماچی بكه‌م وه‌رجه مردنی، دوياخريش چه‌وی كه‌فته‌ باوگی له‌ناو كه‌مپه‌گه‌و سه‌ردان وه‌رپرسه‌يل كرد ئه‌را ناونونيسان.

وه‌ گووره‌ی ئاماره‌يل نه‌ته‌وه‌يل يه‌كگرتگ ئه‌وه‌ ده‌ركه‌فت ك نزيكه‌ی ١٠ هه‌زار كه‌س له‌ موسڵ واينه‌ هه‌ر له‌سه‌ره‌تای ده‌سوه‌پيكردن په‌لاماره‌يل ئازادكردن له‌ ١٧ی ئوكتۆبه‌ر/ ته‌شرين يه‌كه‌م.

وه‌لێ ئی شماره‌ دويره‌ له‌و شماره‌ی پيشنياركرياگه‌ ئه‌را كووچبه‌ره‌يل وه‌ل نزيكه‌وبوين هيزه‌يل حكومی له‌ شاره‌گه‌ ك نزيكه‌ی ١.٥ مليۆن كه‌س له‌تی نيشته‌جيه‌.

شماره‌ی كووچبه‌ره‌يل له‌ عراق هه‌ر له‌وه‌ختيگ ريكخرياگ ترۆريستی له‌ساڵ ٢٠١٤ ده‌سڵات گرتنه‌سه‌ بان ئه‌و ناوچه‌يله‌ ره‌سيه‌سه‌ ٣،٣ مليۆن كه‌س، ك يه‌يش بويه‌سه‌ مايه‌ی نگه‌رانی كومه‌ڵگای ناوده‌وڵه‌تی له‌باره‌ی به‌رزه‌وبوين شماره‌يان و توانای دابينكردن شوون و هه‌وه‌جه‌يل بنه‌ڕه‌تی ئه‌ڕايان.

FaceIraq
}