2015-05-31 12:42:59

ئحسان مه‌جيد دادوه‌ر په‌يجووری له‌و راپۆرته‌ ئه‌را (شه‌فه‌ق نيوز)وت: چه‌ته‌يليگ هه‌ن شوونه‌يل بازرگانی ئه‌گرنه‌ ئامانج و مينه‌ی ئه‌وه‌ ئه‌كه‌ن بزانن كی سه‌ياره‌گه‌ی خسته‌سه‌ كار ا كوشنيده‌وه‌ی و سويچه‌گه‌ له‌ناوی هيليد تا بدزنه‌ی.

مه‌جيد ك تايبه‌تمه‌نده‌ وه‌ دوسيه‌ی دزين سه‌ياره‌ ئويشيد: ئه‌و تاوانه‌يله‌ ك فيشتر بڵاو بويه‌ له‌ژير هه‌ڕه‌شه‌ی چه‌ك ئه‌نجام ئه‌دريه‌يد و جار له‌يوايشه‌ هه‌س خاوه‌ن سه‌ياره‌ هه‌ر چه‌وه‌ڕی ئه‌كا تا بزانيد كه‌ی ئه‌و چه‌ته‌يله‌ ده‌سگير ئه‌كريه‌ن تا سه‌ياره‌يليان بارنه‌و.

مه‌جيد ئويشيد: بڕيگ له‌و سه‌ياره‌يله‌ ك دزيه‌ن بريه‌ن وه‌ره‌و هه‌رێم كوردستان و ئه‌رك دزيكه‌ر له‌ی حاڵه‌ته‌ ئه‌وه‌سه‌ ك سه‌ياره‌گه‌ بڕه‌سنيده‌ نزيكترين شوونيگ له‌ هه‌رێم جوور پاريزگای دياله‌ يا كه‌ركووك و دی له‌ورا وه‌ ناياسايی فرووشيه‌يد.

له‌ هه‌مان وه‌خت مه‌جيد يه‌يش ده‌رخست ك هه‌ر چه‌ته‌يگ و عه‌ميليگ ديريد كار ئه‌رايان ئه‌كاو زوورم ئه‌و تاوانه‌يليشه‌ ك ئه‌نجام ئه‌دريه‌يد ئامانج له‌لی ته‌نيا دزيكردنه‌.

له‌باوه‌ت سه‌ياره‌يل كويه‌نه‌يش مه‌جيد ئويشيد: سه‌ياره‌يل كويه‌ن ئه‌يه‌رنه‌ی كار ئه‌را كرده‌وه‌يل مينڕيژكردن و له‌يرا ئيمه‌ په‌يجووری له‌وه‌ ئه‌كه‌يم ك ئايا نياز دزه‌گه‌ چه‌سه‌و ئايا ئه‌فرووشيده‌ی ترۆريسته‌يل يا ته‌نيا دزيكردنه‌، ئمجا ئه‌گه‌ر نيازی وه‌كارهاوردن بدێ ئه‌را ته‌قينه‌وه‌ ئه‌وه‌ له‌ی حاڵه‌ته‌ وه‌ گووره‌ی مادده‌ی ٤ له‌ ياسای دژه‌ ترۆر پرس وپرسكاری وه‌ليا ئه‌كريه‌يد.

مه‌جيد هه‌ميش وت: چه‌ته‌يليگ ده‌سگير كرديمنه‌ ك سه‌ياره‌ی تازه‌ ئه‌فرووشنه‌ ريكخرياگه‌يل ترۆريستی و بڕيگ له‌و دزه‌يليشه‌ نازانن چاره‌نويس ئه‌و سه‌ياره‌يله‌ ك دزينه‌سه‌ی چه‌س، چوينكه‌ له‌ليان هه‌س ته‌نيا ئامانجی دزيكردنه‌.

له‌باوه‌ت شيوازه‌يل دزيكردن سه‌ياره‌يش ناوبرياگ وت: له‌ی دوياخره‌ دزيكردن سه‌ياره‌ له‌ ناوچه‌ی مه‌نسوور ده‌سوه‌پيكرد، ئه‌ويش ئه‌وه‌سه‌ ك دو كه‌س سه‌ياره‌يگ تازه‌ی خسووسی كرايه‌ كرديان له‌و سه‌ياره‌يله‌ ك وه‌ كرايه‌ كار كرديان له‌ ناوچه‌گه‌و برديانه‌ی ئه‌را ناوچه‌ی سه‌يديه‌ و له‌ورا وه‌هه‌ڕه‌شه‌ی چه‌ك سه‌ياره‌گه‌ له‌لی دزيان.

ناوبرياگ باس له‌وه‌يش كرد و وت: دويای ئه‌وه‌گ ئی تاوانه‌يله‌ روی له‌ زيايبوين كرد، دی مه‌فره‌زه‌ی هه‌واڵگری دانريا ئه‌را چه‌وديريكردن مه‌سه‌له‌گه‌و ئيسه‌يش له‌و شوونه‌يله‌ ك دزی له‌تيان ئه‌نجام درياگه‌ كاميرای چه‌وديری دانرياگه‌.

مه‌جيد ئاماژه‌ وه‌يه‌يش كرد ك له‌ناوڕاس ساڵ ٢٠١٤ تا سه‌ره‌تای ساڵ ٢٠١٥ حاڵه‌ت دزيكردن سه‌ياره‌ فيشتره‌و بوی، وه‌لی دوياخر ك گرينگی دريا مه‌سه‌له‌گه‌ بڕيگ له‌و چه‌ته‌يله‌ له‌ مانگ گوزه‌يشت ده‌سگير كريانه‌.

له‌باوه‌ت وجوود ژن له‌ كرده‌وه‌ی دزيكردن، مه‌جيد وت: بڕيگ له‌و چه‌ته‌يله‌ ك كاريان دزيكردن سه‌ياره‌ش ژنيش وه‌ليانا ده‌س ديريد، وه‌لی له‌گشت تاوانيگ وه‌ليانا به‌شدار نين و باس له‌وه‌يش كرد ك يه‌كيگ له‌ تاوانباره‌يل ژنه‌گه‌ی هاورده‌سه‌ كار ئه‌را دزيكردن و وه‌ناو ئاشقيه‌و سايه‌قه‌گه‌ خه‌ڵه‌تانگه‌و داوا له‌لی كردگه‌ بڕه‌سنيده‌ی‌ ئه‌و شوونه‌ ك باقی چه‌ته‌يل تر ره‌فيقی چه‌وه‌ڕی كردنه‌و له‌ورا وه‌و شيوه‌ سه‌ياره‌گه‌ی دزينه‌.

مه‌جيد ئاماژه‌ وه‌يه‌يش كرد ك له‌ی دوياخره‌ بريگ دز ده‌سگير كريانه‌و شماره‌يان شه‌ش كه‌س بويه‌و زوورميان دگان وه‌و تاوانه‌يله‌ خوه‌يان نانه‌ له‌ناوچه‌يل هه‌ردوگ ديم كه‌رخ و رسافه‌ ك چه‌نه‌ها سه‌ياره‌ له‌تی دزينه‌.

جی باسه‌، ئيسه‌يش ئاماژه‌ وه‌ ئه‌وه‌ ئه‌كريه‌يد ك حاڵ حازر دزيكردن سه‌ياره‌يل تازه‌ فيشتره‌ له‌ سه‌ياره‌يل كويه‌ن وه‌تايبه‌ت سه‌ياره‌يل هيوندای (Elantra) تازه‌.

ج . أ

}