2017-02-27 16:01:00

شه‌فه‌ق نيوز/ وه‌رپرسه‌يل عراقى و شماره‌يگ تر له‌ شاره‌زايه‌يل ناوده‌وڵه‌تى، جه‌نگ دريژوه‌ختبه‌ر دياره‌ له‌ ئاسوو خاسسازى ئه‌و زه‌ره‌ده‌يله‌ ك ريكخرياگ هاورده‌ى تويش شوونه‌واره‌يل له‌ عراق.

 

ئه‌را ماوى چه‌ن مانگيگ، سوپاى عراقى رويوه‌ره‌يل فراوانيگ له‌ خاكه‌يل عراقى هاورده‌سه‌و، وه‌ل ئه‌وه‌يشا ده‌ركه‌فتن قه‌واره‌ى زه‌ره‌ده‌يل جه‌نگ فيشتر بوى له‌وه‌گ له‌لى ترسيايم جوور ئه‌وه‌گ ريكخرياگ يونسكۆ ئاماژه‌ وه‌پى كرد و له‌ سه‌رده‌م خه‌لافه‌تيگيش ك داعش ئاشكراى كرد له‌ساڵ 2014 له‌ هه‌ر يه‌ك له‌ عراق و سوريا، نزيكه‌ى فيشتر له‌ 400 شوونه‌وار مێژوويى كه‌فته‌ ژير ده‌سڵات ئه‌و ريكخرياگه‌.

 

قه‌يس ره‌شيد جيگر وه‌زير رووشنهويرى عراقى، له‌ كۆنگره‌يگ ك له‌لايه‌ن يونسكۆ ريكخريا له‌ پاريس له‌باره‌ى بنيتنانه‌وه‌ى كلتوور رووشنهويرى عراقى له‌ ناوچه‌يل ئازادكرياگ، باس له‌وه‌ كرد ك 66 شوونه‌وار مێژوويى وه‌لاى كه‌مه‌و له‌ ناوچه‌ى موسڵ وه‌ته‌نيا تويش كاولكارى هاتنه‌ بيجگه‌ شوونه‌يل تر و په‌رسگايه‌يل مه‌سيحى و موسڵمانه‌يل وه‌ل نه‌مه‌ندن هه‌زاران ده‌سنويس.

 

ره‌شيد باس له‌وه‌يش كرد ك ئه‌و ويرانكاريه‌ 80% له‌ شار نه‌مروود ئاشوورى كويه‌ن گرته‌سه‌و ك له‌ڕى جه‌ڕافه‌و ته‌قينه‌وه‌يل تويش هاتن ويرانكارى هاتن.

 

له‌ موسڵ سوپاى عراقى ده‌سكردنه‌سه‌ په‌لاماره‌يل فراوانيگ له‌وه‌ر له‌ناوبردن ريكخرياگ ترۆريستى داعش و چه‌وه‌ڕێ ئه‌كريه‌ێد دوياى ئى په‌لاماره‌يله‌ ئاماريگ ئه‌و زه‌ره‌ده‌يله‌ بكريه‌ێد ك ره‌سيه‌سه‌ بريگ موزه‌خانه‌ى ئه‌و شاره‌.

 

وه‌ل گشت پيشڕه‌ويكردنيگ هيزه‌يل عراقى له‌ناو موسڵ، گه‌ورايى ئه‌و زه‌ره‌ده‌يله‌ فيشتر ده‌رئه‌كه‌فێد، له‌ى باوه‌تيشه‌و سه‌ليم خه‌ڵه‌ف له‌ وزاره‌ت رووشنهويرى وت: قه‌ور يونس په‌يامبه‌ر ك له‌ ناوڕاس يه‌ناير/ كانون دويه‌م له‌ژير ده‌سڵات ئه‌و ريكخرياگ ترۆريستيه‌ هاورياوه‌، يه‌كيگه‌ له‌ گرينگترين شوونه‌يل پيرووز له‌ عراق ك زه‌ره‌ده‌يليگ وه‌پى ره‌سى له‌ خه‌ياڵ هويچ كه‌سيگ نه‌وى.

 

خه‌ڵه‌ف هه‌ميش وت: ئه‌و شوونه‌واره‌ ك موسڵمان و مه‌سيحى و يه‌هووديه‌يليش قه‌درى ئه‌گرن، هه‌ڕه‌شه‌ى ويرانكردن له‌بانى بوى له‌وه‌ر ئه‌وه‌گ ترۆريسته‌يل تواسن تونێل له‌ليه‌و بكه‌ن ئه‌را ئه‌وه‌گ خوه‌يان له‌تى بشارنه‌و، ك له‌ئاكام ئه‌و كاريشه‌ ته‌ختى كردن وه‌ل خاكاو باس له‌وه‌يش كرد ك فيشتر له‌ 700 پارچه‌ شوونه‌وار له‌تى ده‌ركرياگه‌ ئه‌را فرووشتن له‌بازاڕه‌يل.

 

ده‌سڵاته‌يل عراقى باس له‌وه‌ ئه‌كه‌ن ك ريكخرياگ داعش وه‌ شيوه‌يگ ناياسايى بڕيگيش له‌و خاكه‌يله‌ فرووشتگه‌ ك له‌ژير ده‌سڵات خوه‌ى بوينه‌ له‌وه‌ر پڕه‌وكردن هه‌وه‌جه‌يليان.

 

وه‌ل ئه‌وه‌يشا فرانس ديماريه‌ له‌ ئه‌نجومه‌ن ناوده‌وڵه‌تى موزه‌خانه‌يل وت: بازرگانى وه‌و شوونه‌واره‌يله‌ ناياساييه‌و دويه‌كه‌ نه‌ويه‌، به‌ڵكوو جه‌نگه‌يل يه‌ك له‌شوون يه‌ك له‌ عراق له‌ساڵ 2003 تائيسه‌ ده‌رفه‌ته‌يليگ زيايه‌ ده‌سوه‌ر كردگه‌ ئه‌را ئى مه‌سه‌له‌.

 

ئمجا شاره‌زايه‌يليش ئاگادارى ئه‌وه‌ ئه‌يه‌ن، ك بنياتنانه‌وه‌ى كلتوور عراقى ئه‌رك گه‌ورايگه‌و شايه‌ت ده‌يان ساڵ دريژه‌ داشتوود، وه‌ل ئه‌وه‌يشا جه‌ختيش له‌ خواست ده‌سه‌وه‌ركردن سه‌ڵامه‌تى شوونه‌واره‌يل و چه‌ودريكردنيان كردن وه‌ل ئاماركردن چشته‌يل شوونه‌وارى ويرانكرياگ يا دزرياگ و خاسه‌وكردن ده‌سنويسه‌يل و ئه‌و نه‌خشه‌يله‌ ك قورتار كريانه‌.

 

FaceIraq
}