2019-10-12 09:12:29

شه‌فه‌ق نيوز/ جوور هه‌رجار سياسه‌ت تيكه‌ڵ وه‌ وه‌رزش بويه‌ له‌ پاچينه‌يل وازيگايه‌يل عه‌ره‌بى، ئوردنيش جموجويل دا خوه‌ى ئه‌را له‌خوه‌يگرتن قه‌يرانيگ ك شايه‌ت هووكاره‌گه‌ێ دروشمه‌يليگ بويه‌ له‌لايه‌ن جه‌ماوه‌ر ئوردنيه‌و له‌وه‌خت وازيكردن ناونى هه‌ڵوژارده‌ى ئوردنى و هاوتا كوه‌يتيه‌گه‌ێ.

 

هه‌ڵوژارده‌ى ئوردنى له‌ وازيگاى عه‌ممان ميواندارى هاوتا كوه‌يتيه‌گه‌ێ كرد له‌ رووژ په‌نجشه‌ممه‌ له‌ چوارچێوه‌ى ركاربه‌ريه‌يل گه‌شت سێيه‌م ئاماده‌كاريه‌يل پاڵه‌وانێتى ئاسيا ئه‌را مۆنديال جام جه‌هانى ساڵ 2022 و ئه‌و وازييشه‌ وه‌ يه‌كسان كووتايى وه‌پى هات.

 

ئيسه‌يش گرته‌يگ ڤيديۆيى ده‌ركه‌فت و له‌تى له‌ ماڵپه‌ڕه‌يل كۆمه‌ڵايه‌تى جه‌ماوه‌ر كوه‌يتى باس له‌وه‌ كردن بڕيگ له‌ ئوردنيه‌يل هتافاتيگ وتنه‌ وه‌ باڵاى سه‌دام حسێن سه‌رۆك له‌سێداره‌درياێ عراقى.

 

له‌و باوه‌تيشه‌و، هووكاره‌يل ره‌سانن كوه‌يتى گرنگى فريه‌يگ له‌ رويماڵكردن مه‌سه‌له‌گه‌ دانه‌و داوا له‌ يه‌كێتى تووپ پاى ناوچه‌يى كردنه‌ شكايه‌تيگ فه‌رمى دژ وه‌ يه‌كێتى ناوده‌وڵه‌تى(فيفا)و يه‌كێتى ئاسيايى وه‌بوونه‌ى ئه‌و هتافه‌يل جه‌ماوه‌ر ئوردنييه‌و پيشكه‌ش بكا.

 

وه‌ل ئه‌وه‌يشا سه‌باح ئه‌لخالد ئه‌لحه‌مه‌د ئه‌لسه‌باح وه‌زير خارجيه‌ى كوه‌يتى ده‌خاڵه‌ له‌ مه‌سه‌له‌گه‌ كرد و ناڕه‌حه‌تى وڵاته‌گه‌ى ده‌رخست له‌و هه‌ڵويست جه‌ماوه‌ر ئوردنيه‌و جوور داگيركردن وه‌رززشى تاريفى كرد له‌ مه‌سه‌له‌يگ ك په‌يوه‌س نيه‌ وه‌ وه‌رزشه‌و.

 

هه‌ر له‌ هه‌مان باوه‌ت، ئه‌يمه‌ن سه‌فه‌دى وه‌زير خارجيه‌ى ئوردنى، ئستنكار ئه‌و هتافه‌يل جه‌ماوه‌ر وڵاته‌گه‌يه‌ كرد و چه‌ن جاريگيش باس له‌ پته‌وى په‌يوه‌ندى ناونى هه‌ردوگ وڵات كرد و له‌ په‌يوه‌ندييگ ته‌له‌فۆنى وه‌ل هاوتا كوه‌يتيه‌گه‌ێ باس له‌وه‌ كرد ك ئى مه‌سه‌له‌ له‌لايه‌ن كه‌سه‌يليگه‌و بويه‌ ئه‌خوازن زه‌ره‌د له‌ په‌يوه‌نديه‌يل ناونى كوه‌يت و ئوردن بيه‌ن.

 

له‌ هه‌مان وه‌خت يه‌كێتى تووپ پاى ئوردنى ته‌به‌ڕا كرد له‌و هتافه‌يله‌ له‌بان سه‌دام حسێن سه‌رۆك له‌سێداره‌ درياگ عراقى و دوياى ته‌واوبوين وازيه‌گه‌يش له‌ڕێ ماڵپه‌ڕه‌يل په‌يوه‌ندى كۆمه‌ڵايه‌تى وه‌تايبه‌ت له‌ فه‌يسبوك و تويته‌ر گرژى له‌ناونى كوه‌يتيه‌يل و ئوردنيه‌يل ده‌س وه‌پيكرد جوور جواودانه‌وه‌يگ ئه‌را ئه‌و هتافه‌يله‌ ك له‌ناو وازيگا كيشريا.

 

له‌هه‌مان وه‌ها هاشتاك"# كوه‌يت _ ئوردن" بويه‌ سه‌رباس باوه‌ته‌يل له‌ چه‌ن ده‌وڵه‌تيگ عه‌ره‌بى و جه‌ماوه‌ر كه‌نداو مناى جه‌ماوه‌ر ئوردنى كرديان.

 

له‌و باوه‌تيشه‌و عه‌بدوڵڵا غه‌يس فلستينى نويسا:" شووره‌ييه‌ تووپان له‌ روشت ده‌ربچێد و بدێده‌ هووكار ئاشووگه‌رى سياسى له‌ناونى ملله‌ته‌يل، ئه‌راچه‌ ئستفزاز ملله‌ت كوه‌يتى برا ئه‌كه‌ين وه‌ هتافه‌يل سته‌مكار ك وڵاته‌گه‌يان داگير كرد؟".

 

يه‌كێتى تووپ پا له‌ به‌ياننامه‌يگ له‌ڕێ ماڵپه‌ڕه‌ فه‌رميه‌گه‌ وه‌ تونى ئه‌و هتافه‌يله‌ له‌چوارچێوه‌ى وه‌رزش ره‌ته‌و كرد ك له‌لايه‌ن كه‌سه‌يليگ ناوه‌رپرس و ناڕه‌سه‌ن له‌ناو كۆمه‌ڵگاى ئوردنييه‌و ده‌رچيه‌و قه‌وڵ ئه‌وه‌يشدا ئه‌و كه‌سه‌يله‌ بخريه‌نه‌ وه‌ر پرس وپرسكارى وه‌ ئه‌وه‌گ ره‌فتاره‌يليان چه‌واشه‌ى ره‌وشت ئوردن و ريز و حورمه‌تيه‌ ئه‌را برايه‌يلى له‌ وڵاته‌يل تر.

 

شماره‌يگيش له‌ كه‌سايه‌تيه‌يل گشتى ئوردنى هه‌وڵ دامركاننه‌وه‌ى ئه‌و گرژيه‌ دان له‌ناونى لايه‌نگره‌يل هه‌ردوگ هه‌ڵوژارده‌ى ئوردنى و كوه‌يتى.

 

له‌ى روييشه‌و عولا فارس بێژه‌ر ئوردنى و تارق خورى ئه‌ندام ئوردنى يه‌كه‌مين ئه‌و كه‌سه‌يله‌ بوين ك ده‌سپيشخه‌رى كردن ئه‌را له‌لى وه‌خشين له‌و هتافه‌يله‌ و داوايش كردن رويداگه‌گه‌ نه‌خريه‌ێده‌ قاڵب سياسه‌ت و گيان برايى له‌تى باريه‌ێده‌ كار.

 

هه‌ر له‌ هه‌مان باوه‌ت، روه‌يده‌ ئه‌لره‌واشنه‌ چالاكوان ئوردنى داوا كرد وه‌رزش بيلايه‌ن بدێ وه‌گشت شيوه‌يگى له‌وانه‌يش له‌ ئنتماى جوگرافى و ناوچه‌يى و كه‌ش سياسى.

 

له‌ى ساڵه‌يل دوياخره‌ وازيگايه‌يل عه‌ره‌بى بويه‌ مه‌يدانيگ ك له‌تى جه‌ماوه‌ر راى خوه‌ى ده‌رخست و تيكه‌ڵى وه‌ سياسه‌ت و هه‌ڵويست سياسيانه‌ كرديان، له‌هه‌مان وه‌خت مه‌ردمانيگيش ئه‌و ره‌فتاره‌يله‌ په‌سه‌ن كردن و خستنه‌ى خانه‌ى ئازادى راده‌رخستن، وه‌لێ مه‌ردمانيگيش ره‌خنه‌ ئه‌گرن و داواى داناين ياسايه‌يليگ ئه‌كه‌ن رێ له‌ ئيچنه‌ ره‌فتاره‌يليگ له‌ناو وازيگايه‌يل بگرێد.

FaceIraq
}