2016-12-24 05:38:00

شه‌فه‌ق نيوز/ ساڵ گوزه‌يشت وشه‌يگ هه‌ڵه‌ ك يه‌كيگ له‌ چه‌كداره‌يل سه‌ر وه‌ ريكخرياگ ترۆريستى داعش وته‌ى له‌ موسڵ، بويه‌ هووكار شه‌راره‌يگ له‌ روێداگه‌يل رخه‌وبه‌ر ئافره‌تيگ عراقى ك تويش شۆك هات تاڕاده‌يگ ك دوياى واينيش له‌ده‌س ئه‌و ريكخرياگه‌ ترس نيشته‌ گيانى.

 

بيوه‌ژنيگ گشت تاقيكردن و دقه‌تيگ ئه‌نجام دا له‌وه‌ر ئه‌وه‌گ مووچه‌ له‌ ئسلاميه‌يل تونڕه‌و وه‌ربگرێد دوياى چه‌ن مانگيگ له‌ ده‌سڵاتگرتنيان له‌بان شاريگ له‌ باكوور عراق له‌ 2014 و ئاڵشتكردنى ئه‌را پايته‌خت خلافه‌ت ك ته‌نيا له‌لايه‌ن خوه‌يانه‌و ئاشكراى ئه‌و خلافه‌ته‌ كريا.

 

ئه‌و بيوه‌ژنه‌ له‌ ديمانه‌يگ وه‌ليا له‌ كه‌مپ خازر له‌ خوه‌رهه‌ڵات موسڵ، وت: من هه‌ڵه‌يگ كردم وه‌ ئه‌وه‌گ ئاگاداريان كردم له‌وه‌گ هاوسه‌ره‌گه‌م بويه‌سه‌ قوربانى ترۆر، هه‌ر له‌وه‌ر ئه‌و قسه‌يشه‌ چه‌كداريگ ترۆريست يه‌ك ده‌س له‌ليم وه‌شان و دگانه‌يلم شكان.

 

ئى بيوه‌ژنه‌ له‌ ناو غورفه‌يگ پيس وه‌ل مويش و مه‌ل وموورى زيندانى كرياوێد و وت: چه‌وه‌يلم به‌سانه‌و زه‌نجير خستنه‌سه‌ ده‌س وپام و چه‌ن جاريگيش ده‌سدريژى كرياسه‌ بانم  له‌لايه‌ن چه‌كداره‌يله‌و.

 

ئيسه‌يش ريكخرياگ ترۆريستى داعش ك وه‌رگرى دڕندانه‌يگ ئه‌كا له‌وه‌رانوه‌ر په‌لاماره‌يل وڵاته‌يل يه‌كگرتگ ئه‌را هاوردنه‌وه‌ى موسڵ دويا بنگه‌يل گه‌وراى ئه‌و ريكخرياگه‌، ڕوى تومه‌ت كوشتن و سه‌ربڕين و ده‌سدريژى وه‌پيا كريه‌ێد له‌وه‌ختيگه‌و ئه‌و رويوه‌ر فراوانه‌ داگير كردگه‌ له‌ 2014.

 

ڕى ئه‌را په‌يجورى له‌ حكايه‌تى نيه‌، وه‌لێ باس له‌ ئه‌زموون ئافره‌ته‌يل تر كريه‌ێد ك له‌ده‌س ئه‌و ريكخرياگه‌ قورتار بوينه‌و له‌ژير بار مه‌ينه‌تى بوينه‌ ئه‌را ماوه‌ى دوساڵ و نيم.

 

دويه‌تيگ له‌ ته‌مه‌ن 13 ساڵان ك نه‌تواس ناوى ئاشكرا بكريه‌ێد، باس ئه‌را روێته‌رز كرد ك باوگى وه‌رجه‌ چوار ساڵ داسه‌ى شوى وه‌ هاوسايگيان ك فريه‌ له‌ خوه‌ى گه‌وراتر بويه‌ له‌ ته‌مه‌ن و سه‌ر وه‌ ريكخرياگ داعش بويه‌.

 

ئه‌و دويه‌ت مێردمناڵه‌ ك جزدانيگ ره‌نگامه‌ى مقه‌يه‌تيكردن پويل وه‌ده‌سيه‌و بوى، ئه‌وه‌ ده‌رخست ك هاوسه‌ره‌گه‌ى هه‌ڕه‌شه‌ى كوشتن له‌لى كردگه‌و ڕى وه‌ برايه‌يليشى داگه‌ ده‌سدريژى جنسى بكه‌نه‌ بانى.

 

دويه‌ته‌ 13 ساڵانه‌گه‌ دوياى واينى له‌ موسڵ وه‌رجه‌ چه‌ن هه‌فته‌يگ، ئاگادار بوى له‌وه‌گ هاوسه‌ره‌گه‌يشى وايه‌و هاته‌سه‌ كه‌مپيگ نزيك، هه‌ر وه‌و خاترييشه‌ خه‌وه‌ر له‌بانى داو له‌لايه‌ن ده‌سڵاته‌يله‌و ده‌سگير كريا، وه‌لێ مه‌سه‌له‌ى هاوسه‌رگيريه‌گه‌ى هيمان كووتايى وه‌پى ناتگه‌.

 

بيوه‌ژنيگ له‌ ته‌مه‌ن 37 هه‌يواى ئه‌را كه‌مپ خازر و ده‌سميه‌ت ده‌روينى وه‌رگرێد له‌ سه‌ندووق نه‌ته‌وه‌ل يه‌كگرتگ ئه‌را نيشته‌جيكردن سه‌ر وه‌ نه‌ته‌وه‌يل يه‌كگرتگ له‌باره‌ى تون وتيژى له‌بان بنه‌ماى جوور كۆمه‌ڵايه‌تى و له‌وه‌ر ترس نه‌تواس ناوى ئاشكرا بكريه‌ێد.

 

ئى بيوه‌ژنه‌ هه‌ناى ك ريكخرياگ ترۆريستى داعش ئازادى كردنه‌ دوياى ده‌سدريژى، هاته‌و ئه‌را ماڵه‌گه‌ى خوه‌ى و باوه‌ڕى ئه‌وه‌ بويه‌ ك قورتارى بويه‌ له‌ مه‌ويسى و به‌دبه‌ختى و هه‌ردوگ مناڵه‌ بويچكه‌گه‌يشى خسته‌سه‌ لاى قه‌ومه‌يل نزيكيان و پلان ئه‌وه‌ دانا بچێده‌ لاى مناڵه‌يلى دوياى ئه‌وه‌گ بتويه‌نێد بهه‌يواێد.

 

وه‌لێ دوياى چه‌ن هه‌فته‌يگ زانست ك زگى پڕه‌ له‌و كه‌سه‌يله‌ چه‌كداره‌ ك سزاى دانه‌، يه‌يش بيجگه‌ ئه‌و شۆك و ترسه‌ ك هاته‌سه‌ تويشى له‌وه‌ختيگه‌و سزاى ده‌سدريژى له‌بانى كرياو ترس له‌وه‌يش ديرێد جوور ژنه‌يل تر مناڵهاوردنى بدێده‌ عاريگ ئه‌راى.

 

ژنيگيش وه‌ گيرستنه‌و باس له‌وه‌ كرد و وت: چه‌كداره‌يل ريكخرياگ ترۆريستى داعش له‌ناونى ماوه‌يگ و ماوه‌يگ تر ناچار بيوه‌ژنه‌يل كردنه‌ ئه‌را شويكردن و وتنه‌سه‌پيان يا شوى وه‌پيمان ئه‌كه‌ين يا له‌ورسگ ئه‌مرين.

 

ئى ژنه‌ باس له‌وه‌ كرد ك وه‌ختيگ هيزه‌يل عراقى ره‌سينه‌سه‌ ناوچه‌گه‌يان، يه‌كسه‌ر هاوسه‌ره‌ تازه‌گه‌ى ده‌سگير كردنه‌ ئه‌را په‌يجورى له‌وه‌ر ئه‌وه‌گ په‌يوه‌ندى وه‌ ريكخرياگ ترۆريستى داعشه‌و داشتگه‌.

 

ئى ژنه‌ وه‌ل كوڕه‌ گه‌وراگه‌ى رويكردنه‌ كه‌مپ خازر و مناڵه‌ كورپه‌ شيرخوه‌ره‌گه‌يشى ك ته‌مه‌نى يه‌ك ساڵانه‌ هيشته‌جى وه‌ل هاوسه‌ره‌ دويه‌مه‌گه‌ى ئه‌را هاوسه‌ره‌ تازه‌گه‌ى ك هيمان ها موسڵ و چاره‌نويسى جوور چاره‌نويس سه‌دان يا هه‌زاران مناڵ تر له‌وانه‌گ له‌ توخم تونڕه‌وه‌يلن.

 

ئى ژنه‌ وه‌ل خوه‌يا بڕيار ئه‌وه‌ داگه‌ جاريگتر تا وه‌ ته‌مامى ئه‌و ريكخرياگ ترۆريستيه‌ له‌ناو نه‌وريه‌ێد گله‌ونه‌خوه‌ێد ئه‌را موسڵ و وت: ئه‌خوازم بچم وه‌ره‌و شوونيگ دوير تا كه‌س له‌تى نه‌ناسێده‌م.

 

 

FaceIraq
}