2015-01-03 10:22:10
(هیوا ئه‌فه‌ندی) سه‌رۆك‌ فه‌رمانگه‌ێ‌ ته‌كنه‌لۆژیاێ زانیاری، له‌ئه‌نجومه‌ن‌ وه‌زیره‌یل‌ هه‌رێم‌ كوردستان وه‌تووڕ‌ هه‌واڵ‌ (بی بی سی) به‌ریتانی وت، ده‌زگاێ‌ ICAAN تایبه‌ت وه‌دابینكردن‌ ئینته‌رنێت، ڕازی بويه‌‌و ناونیشان‌ ئینته‌رنێتی‌ داسه‌ ‌هه‌رێم‌ كوردستان، وه‌مه‌رجێگ كاریگه‌ری‌ له‌بان په‌یوه‌ندیه‌یل هه‌رێم وه‌ل وڵاته‌یل‌ هاوساێ دانه‌نه‌ێد، هویچ وڵاتێگ تێبینی نه‌ياشتگه‌و ته‌نیا ئيران دژایه‌تيی كردگه‌.

ماڵپه‌ڕ‌ (كتابات) عێراقیيش له‌وباره‌وه‌ نويساس‌: دامه‌زرانن‌ ده‌وڵه‌ت كوردستان له‌ڕێ‌ ئینته‌رنێته‌و ده‌سوه‌پێ ئه‌كا، ئه‌وه‌يش ئه‌نجام‌ ئه‌و هه‌ڵه‌يله‌سه‌‌، ك‌ حكوومه‌ت‌ فیدراڵی‌ به‌غدا كردێه‌سه‌يان ‌‌و لێواكردگه‌، هه‌رێم‌ كوردستان ده‌س بگرێده‌ بان ‌سێ له‌سه‌ر چوار تووڕه‌یل‌ ئینته‌رنێت له‌عێراق.

هه‌ر ئه‌و ماڵپه‌ڕ‌ عێراقیه‌ ئاماژه‌‌ وه‌وه‌يشكردگه‌، وه‌گوره‌ێ‌ ئامار‌ یه‌كيه‌تی‌ ناوده‌وڵه‌تی په‌یوه‌ندیه‌يل، ته‌نيا (9.2%)‌ نیشته‌جايه‌يل‌ عێراق ئینته‌رنێت وه‌كارتێرن، يانێ‌ له‌شوون‌ وڵاته‌یليگ‌ جوور نیپاڵ‌و هایتی‌، يه‌يش له‌وه‌ختێگه‌ ك داهات‌ تاك له‌عێراق، شه‌ش چه‌نه‌‌ داهات‌ تاكه‌ له‌و دو وڵاته‌، ئه‌وه‌يش له‌وه‌ختێگه‌‌ ك وه‌گوره‌ێ‌ ئامار وه‌زاره‌ت‌ گواستنه‌وه‌ێ‌ هه‌رێم كوردستان، 20% نیشته‌جايه‌يل‌ هه‌رێم، هێڵ ئینته‌رنێت وه‌گشت جووره‌گانیه‌و‌ وه‌كارتێرن.

هاووه‌خت ماڵپه‌ڕ‌ (ناسریه‌)ێ‌ عێراقی نويساس‌: كوردستان كه‌فتگه‌سه‌ ناونی دو دۆماین‌، دۆماین‌ عێراق وه‌ناونیشان‌ (IQ)، وه‌ل دۆماین كوردستان وه‌ناونیشان(KRD).

ئه‌و ماڵپه‌ڕ عێراقیه‌ جه‌خت‌ له‌وه‌كردگه‌سه‌و‌، كوردستان له‌ڕێ‌ وه‌ده‌سهاوردن‌ دۆماین‌ تایبه‌ت‌ خوه‌یه‌و‌، دويره‌وكه‌فتن ‌‌و سه‌روه‌خۆیی له‌عێراق، كه‌ێده‌ ديفاكتۆ‌.

(سه‌ركه‌وت عارف عومه‌ر) سه‌رۆك‌ ڕێكخرياگ‌ ئینته‌رنێت‌و كۆمپیوته‌ر‌ كوردستان له‌وباره‌وه‌ ئويشێ:"وه‌ده‌سهاوردن‌ ناونیشان‌ ئینته‌رنێتی‌، هه‌نگاوێگ‌ گرنگه‌ ئه‌ڕا كورد و له‌ڕوی‌ ئابووری، سیاسی‌، نه‌ته‌وه‌یی‌و ته‌كنه‌لۆژیه‌وه‌ سود دێرێ‌، چوينكه‌ نه‌ك كورد، به‌ڵكو نه‌ته‌وه‌یل‌ تر جه‌هانیش كار وه‌پێ كه‌ن، وه‌وه‌يش كورد زیاتر ‌ناسريه‌ێد".

میدیای‌ ئيرانی بایه‌خ وه‌بڵاوه‌وبوين‌ هه‌واڵ‌ وه‌رگرتن‌ دۆماین له‌لایه‌ن كوردستانه‌و‌ داس‌، له‌وه‌ختێگ وه‌گوره‌ێ فه‌رمانگه‌ێ‌ ته‌كنه‌لۆژیاێ‌ زانیاری هه‌رێم، ئيران ته‌نيا‌ وڵاته‌ ك له‌وه‌رانوه‌ر ئه‌‌و هه‌نگاوه نگه‌رانه‌‌.

ماڵپه‌ڕ‌ (عاله‌م)‌ ئيرانی‌ بڵاویه‌وكردگه‌سه‌و‌، ده‌زگاێ‌ ICAAN مۆڵه‌ت‌ وه‌كارهاوردن‌ دۆماین‌ ئینته‌رنێتی‌ داسه‌ ‌كوردستان وه‌ناو (KRD)، وه‌مه‌رجێگ كاریگه‌ری‌ له‌بان په‌یوه‌ندیه‌یل‌ هه‌رێم‌ كوردستان‌و وڵاته‌یل‌ هاوساێ نه‌ياشتوود، وه‌لێ ئه‌و ماڵپه‌ڕه‌ باس‌ نگه‌رانیه‌یل‌ حكوومه‌ت‌ تاران‌ له‌ وه‌رانوه‌ر ئه‌و پرۆژه‌‌ له‌هه‌واڵه‌گه‌ لاوردگه‌.

له‌ڕووژه‌یل‌ گوزه‌يشته‌، فه‌رمانگه‌ێ‌ ته‌كنه‌لۆژیاێ‌ زانیاری‌ هه‌رێم‌ كوردستان ئاشكرايه‌وكرد، ده‌زگاێ‌ ICAAN ڕه‌زامه‌ندی نيشانداس وه‌داين‌ دۆماین‌ ئینته‌رنێت وه‌كوردستان، وه‌ناونیشان(KRD).

له‌لاێگ تره‌و‌، (بۆتان مه‌حمود عوسمان) سه‌رۆك‌ وه‌رين‌ ده‌زگاێ‌ ته‌كنه‌لۆژیای‌ زانیاری هه‌رێم‌ كوردستان له‌وباره‌وه‌ ئويشێ‌:"ئه‌و ته‌قالا‌ له‌ساڵ‌ 2010ه‌وه‌ ده‌سوه‌پێكردگه‌، ئمساڵيش ڕه‌سيه‌سه‌ ئه‌نجام‌".

ئيسه‌ وه‌كارهاوردن‌ ئینته‌رنێت بويه‌سه‌ یه‌كێگ له‌هه‌وه‌جه‌يل كۆمه‌ڵگايه‌يل جه‌هان‌و وه‌ل ‌ناسنامه‌‌و ئه‌منیه‌ت‌ وڵاته‌يلا هاميته‌ بويه‌.

NNA

YesIraq
}