2017-07-23 11:44:00

شه‌فه‌ق نيوز/ ريكخرياگ ترۆريستى داعش، تا ئيسه‌ 1700 ئافره‌ت و دويه‌ت ئێزيدێ عراقى فرووشتگه‌، وه‌ پويل ئه‌را سماسره‌يل ك ئه‌وانيش له‌لايه‌ن خوه‌يان فرووشتنه‌يانه‌ كه‌س وكاريان وه‌ پويل فريه‌يگ، ئه‌ويش له‌ شوون سێ ساڵ له‌ بردنيان و وه‌كارهاوردنيان جوور كه‌نيز و ئه‌را كاره‌يل جنسى له‌ قه‌زاێ شه‌نگاڵ و ئاوايه‌يل ده‌ورگرد خوه‌رئاواێ موسڵ له‌ سه‌ره‌تاێ ئاب 2014.

 

رووژانه‌يش ريكخرياگ ترۆريستى داعش دويه‌ت و ئافره‌ته‌يل ئێزيدى وه‌ل باقى مناڵه‌يليان نمايش ئه‌كه‌ن ئه‌را فرووشتن و نمايشيان له‌بان رفاننكاره‌يل و بازرگانه‌يل ئه‌كه‌ن له‌ بازاڕ ديل فرووشتنه‌يل ك وازى كردنه‌ ئه‌را تايبه‌ت وه‌ بازرگانيكردن وه‌پيان له‌ شار ڕقه‌ێ سوورى.

 

فائيزه‌ ك ريكخرياگ داعش وه‌ 17 هه‌زار دۆلار ئه‌مريكى فرووشته‌ێ، ئه‌و پويله‌ وه‌ سه‌ختێ له‌لايه‌ن چالاكوانه‌يل ئێزيدى و له‌ڕێ نويسينگه‌ێ ئازادكردن و قورتاركردن ئافره‌ت و پياوه‌يل رفياگ له‌ ماوه‌ێ كه‌ميگ گرده‌و كريا، تا وه‌پى باريه‌نه‌و له‌ سوريا ئه‌را ناو كه‌مپه‌يل كووچبه‌ره‌يل له‌ هه‌رێم كوردستان عراق و بڕسنه‌ كه‌س وكاريان دوياێ ئه‌وه‌گ گه‌ورا بوينه‌و روخساريان ئاڵشت بويه‌ له‌ئاكام ئه‌و به‌دبه‌ختيه‌ ك له‌ترس داعش هاته‌سه‌ تويشيان.

 

عه‌لى حسێن خانسورى چالاكوان ئێزيدى عراقى، ك يه‌كيگه‌ له‌ ديارترين چالاكاوانه‌يل له‌ چه‌وديريكردن و ئازادكردن ئافره‌ته‌ رفياگه‌يل له‌ رووڵه‌يل پيكهاته‌گه‌ێ، وت: ريكخرياگ ترۆريستى داعش بازاڕيگ ئه‌را فرووشتن ئافره‌ته‌ رفياگه‌يل ئێزيدێ ديرێد و بڕيگ له‌ليان سينيه‌ن و بڕيگيش له‌ليان وه‌ پويل رفيه‌ن و پويل له‌ كه‌س وكاريان وه‌رئه‌گرن له‌ وه‌رانوه‌ر ئازادكردنيان.

 

هه‌يفا دويه‌تيگه‌ له‌ ناحيه‌ێ خانسورى، ك له‌ناو ڕقه‌ ئازاد كرياو هاته‌و ئه‌را لاى كه‌س وكارى له‌ 6 كانوون يه‌كه‌م/ ديسه‌مبه‌ر ساڵ گوزه‌يشت ك وه‌ 160 وه‌رقه‌ ئازاد كريا له‌لايه‌ن سماسره‌يل ك ئه‌كاده‌ 16 هه‌زار دۆلار.

 

خانسورى وه‌ ئاماژه‌كردن ئه‌را هه‌يفا وت: له‌ كومه‌ڵگه‌ێ ئه‌ئميمه‌و دايگى و چوار برايشى له‌لايه‌ن ريكخرياگ ترۆريستى داعشه‌و رفيانه‌ وه‌ل خيزان مامه‌ێ و ميمگه‌يلى ك گشتيان رفيانه‌.

 

له‌ 22 مارس/ ئادار ئمساڵ، سه‌وسه‌ن و شيرين ئازاد كريان، ئه‌يانه‌ هه‌ردوگيان خوه‌يشگن له‌ ئاوايى ته‌ل قه‌سه‌ب له‌ باشوور خوه‌رهه‌ڵات قه‌زاێ شه‌نگاڵ ك پيكهاته‌ێ  ئێزيدێ له‌تى له‌بان ده‌س داعش له‌ناو بريا.

 

له‌يرا خانسورى ئشاره‌ت وه‌ ئه‌وه‌يش كرد و وت: ئه‌و بڕه‌ پويله‌ ك درياگه‌ ئه‌را ئازادكردن ئى دو خوه‌يشگه‌(2 ده‌فته‌ر و 20 گه‌ڵا)بويه‌، ك ئه‌كاده‌ 22 هه‌زار دۆلار ئه‌مريكى.

 

فائيزه‌ ئه‌و دويه‌ت مناڵ جوانه‌ وه‌ قژ سيه‌ و دومچه‌و چه‌رمگيه‌و ك ترس له‌ گيان بوێ وه‌ بوونه‌ێ هه‌ڕشه‌ێ داعش ك بته‌قنيده‌وه‌ێ، ئه‌را ماوه‌ێ كه‌ميگه‌ ئازاد كريا له‌ناو سوريا وه‌ بڕ 17 هه‌زار دۆلار ئه‌مريكى.

 

خانسورى وت فائيزه‌ خه‌ڵك ئاوايى سيباي له‌ باشوور شه‌نگاڵه‌و تائيسه‌يش 9 كه‌س له‌ ئه‌ندامه‌يل خيزانه‌گه‌ێ رفيانه‌ له‌لايه‌ن ريكخرياگ ترۆريستى داعشه‌و.

 

فائيزه‌ جوور كه‌نيزيگ له‌لاى يه‌كيگ له‌ داعشيه‌يل كار كردياد له‌ ناوچه‌يل ژير ده‌سڵات ئه‌و ريكخرياگه‌ له‌ سورياو له‌ 21 يۆنيۆ/ حزه‌يران ئازاد كرياو هاورياوه‌ ئه‌را وڵات خوه‌ێ له‌ عراق.

 

ئى نرخه‌يل به‌رزيشه‌ وه‌رانوه‌ر ئازادكردن ئه‌و دويه‌ت و ئافره‌ته‌يل رفياگ ئێزيديه‌سه‌ ك شماره‌يان وه‌ نزيكه‌ێ په‌نج هه‌زار رفياگ مه‌زه‌نه‌ ئه‌كريه‌ێد، دوياێ ئه‌و زه‌ره‌د گه‌ورا ك ره‌سيه‌ ريكخرياگ داعش و له‌ده‌سداين زوورم ناوچه‌يل ژير ده‌سڵاتى له‌ عراق.

YesIraq
}