2016-07-03 18:21:03

ئافره‌ته‌يل داعشی له‌جيای ژيان سروشتی جوور باقی ئافره‌ته‌يل تر، تيه‌ريكی هه‌ڵوژانن و ڕی مه‌رگ گرتنه‌ وه‌ر، يا خوه‌يان وه‌ته‌نی ژيان جيهاد.

سێ ئافره‌ت تونسی هاته‌ ناو سه‌ربازگه‌ی داعش له‌ ليبيا و ريڕه‌و ژيانيان قه‌ڵبه‌و بوی دويای بوردمانيگ ئاسمانی له‌ ١٩ی فبرايه‌ر/ شووبات و كوشيان ده‌يان داعشی تونڕه‌و له‌ئاكام ئاشكراكردن شانه‌يگ ترۆريستی له‌ نزيك مه‌رزه‌يل تونس.

دويای ئه‌و بوردمان ئاسمانيه‌ ژيان ئه‌و هه‌رسێ ئافره‌ته‌يل تونسيه‌ ئاڵشت بوی، ئمجا دويای ئه‌وه‌گ شوی كردوينه‌ تونڕه‌وه‌يليگ ك دوياخر كوشيان له‌ئاكام بوردمانه‌يل ئاسمانی، ئه‌وه‌سه‌ ئيسه‌ خوه‌يان و مناڵه‌يليان كه‌فتنه‌سه‌ گووشه‌ی زيندان له‌ ترابلس.

له‌ ديمانه‌يگ ده‌گمه‌ن وه‌ل ئه‌و ئافره‌ته‌يله‌ ك له‌لايه‌ن ئاژانس "روێته‌رز" بڵاو كريا، باس له‌ ژيان خوه‌يان كردنه‌ وه‌ل ريكخرياگ ترۆريستی داعش و ئاشكرای پلانه‌يليگ كردن ك ئه‌را جيوه‌جيكردن په‌لاماره‌يليگ دانرياوێد ئه‌را بان تونس.

ره‌حمه‌ شێخاوی (١٧ ساڵان) هاوسه‌ر نوره‌دين شوشان پايه‌به‌رزترين سه‌ركرده‌يل تونسی له‌ ريكخرياگ داعش له‌ ليبيا، باس له‌ ژيان ئاسايی وه‌رين خوه‌ی ئه‌كا له‌ شار مسراته‌، ك خوه‌شترين ژيانيگ داشتگه‌ وه‌شيوه‌يگ سروشتی و هه‌ميشه‌ سه‌ردان ساڵۆنه‌يل جوانكاری كردێاد.

ره‌حمه‌ تونسی ئويشێد: پياوه‌يل ريكخرياگ داعش ئاماده‌ بويان بچن وه‌ره‌و ناو بنگه‌يل ئه‌و ريكخرياگه‌ له‌ ليبيا يا جيواز بويان وه‌ره‌و سورياو هه‌ميشه‌ پلان دانان ئه‌را په‌لاماره‌يليگ ك تونس بگرنه‌ ئامانج.

وه‌رپرسه‌يل ئه‌مريكی و تونسيه‌يليش باوه‌ڕيان ئه‌وه‌ بوی نوره‌دين شوشان هاوسه‌ر ره‌حمه‌ رۆڵ گرينگ له‌ ئاماده‌كاری ئه‌را دو په‌لامار گه‌ورا داشت ك ساڵ گهوزه‌يشت گه‌شتياره‌يل له‌ تونس گرته‌ ئامانج، يه‌كه‌ميان په‌لاماره‌گه‌ی مۆزه‌خانه‌ی باردو له‌ پايته‌خت و دويه‌ميش په‌لاماره‌گه‌ی هه‌وارگه‌ی سووسه‌ له‌ هه‌مان ساڵ ٢٠١٥.

ئمجا هه‌رچه‌نی نوره‌دين شوشان سه‌رده‌سه‌ی ئه‌و داواكرياگه‌يله‌ بوی ك فه‌رمان ده‌سگيركردن ئه‌را ده‌رچی، وه‌لێ هاوسه‌ره‌گه‌ی باس له‌وه‌ ئه‌كا ك ده‌سڵاته‌يل هويچ وه‌ختيگ نه‌گه‌رديانه‌ شوونی و خاسيش زانستيان شوون وجووديان كامه‌سه‌، وه‌لێ دويای بوردمانه‌يل ئه‌ريكی باره‌گه‌ ئاڵشت بوی.

له‌ی باوه‌تيشه‌و غوفران شێخاوی خوه‌يشگ ره‌حمه‌ ك ته‌مه‌نی ١٨ ساڵانه‌، وت: ئه‌و گرووپه‌ ك مير سه‌ركردايه‌تی ئه‌كا بايه‌سه‌ وه‌ گووره‌ی ستراتيجيه‌ت تايبه‌ت كار بكا، ك بڕێگ له‌ليان پاسه‌پۆرت تايبه‌ت سووری ديرن و بڕێگيش وه‌رپرسياريتی په‌لاماره‌يليگ ئه‌را بان تونس وه‌پيان سپاريا و له‌ليانيش بوی تايبه‌تمه‌ند بوين وه‌ كاره‌يل ليبی.

غوفران ئاماژه‌ وه‌ ئه‌وه‌ كرد ك گشت سه‌ركرده‌يل ريكخرياگه‌گه‌ فه‌رمان له‌ ئه‌لبه‌غدادی وه‌رگرتيان، ك ئه‌و له‌لايه‌ن خوه‌يه‌و باس له‌وه‌ ئه‌رايان كردياد ئتاعه‌ت مير داعش بكه‌ن له‌ سرت، وه‌لێ بڕێگ له‌ليان ياخی بوين له‌و فه‌رمانه‌يله‌ و ته‌كلايه‌نی بڕێار ده‌ركرديان.

له‌يرا ئه‌ڵڵاجه‌وی له‌ قسه‌ی ئی ئافره‌ته‌يله‌ ئه‌وه‌سه‌ ك هويچ وه‌ختيگ په‌شيمانی نيشان نايه‌ن له‌ ئه‌زموون و كردوه‌يليان وه‌ل دڕنده‌ترين ريكخرياگيگ له‌ جه‌هان، به‌ڵكوو گشتيانيش ناخوازن گله‌و بخوه‌ن ئه‌را تونس.

ئمجا هه‌رچه‌نی ئه‌و ئافره‌ته‌يله‌ له‌ ته‌مه‌نيش بويچگن، وه‌لێ مه‌رگ وه‌ پيسترين شيوازيگ يه‌خه‌يان گرت و له‌ هه‌مان وه‌خت واز له‌ خوه‌نين هاوردنه‌و چينه‌سه‌ ناو فكر تونڕه‌وی و پشت له‌ ژيان وه‌ل كه‌س وكاريان كردنه‌و ژيان ماڵ داعشی هه‌ڵوژننه‌ له‌جيای دڵسووزی و فيداكاری ئه‌را نيشتمان.

FaceIraq
}