2016-07-13 19:23:29

ئی فيلمه‌ بڕيگ گفتگوو ئه‌گرێده‌ خوه‌ی وه‌ل شماره‌يگ له‌ كه‌سايه‌تيه‌يل رووحانی و چالاكوانه‌يل له‌ بوار ماف ئاده‌ميزاد، له‌وانه‌يش: گفتگوو وه‌ل بابا شێخ سه‌رۆك رووحی تايفه‌ی ئێزيدی و لوقمان مه‌حمود رووژنامه‌نويس و چالاكوان و شايه‌تی بڕێگ له‌وانه‌گ له‌ده‌س داعش قورتار بوينه‌و واينه‌.

ئمجا "به‌تی ئه‌يوب" به‌رهه‌مهاوه‌ر و دراوه‌ر ئی فيلمه رووشنايی خسته‌سه‌ بان مه‌ينه‌تی ئێزيديه‌يل هه‌ر له‌ كوشتن و هه‌تككردن و كووچ وه‌پيكردن تا ڕه‌سێده‌ ويرانكردن ماڵ و په‌رسگايه‌يل.

ئه‌يوب وێنه‌ی ژان و ئه‌زره‌يل ئی پيكهاته‌ی سته‌مديده‌ گرتگه‌ له‌ په‌رسگای "لالش" پيرووز تايفه‌ی ئێزيدی له‌ عراق و جه‌هان و له‌ كه‌مپ باعزره‌ی كووچبه‌ره‌يل له‌ پاريزگای دهۆك و له‌ شار "لينكۆڵن" پايته‌خت ولايه‌ت نبراسكای ئه‌مريكی، ئه‌ويش له‌ڕی حكايه‌ته‌يل هه‌ر يه‌ك له‌ به‌سمه‌ و ره‌شۆ و ده‌رويش و جولی و حه‌سه‌ن و خه‌يرۆ و خه‌ڵه‌ف و فريه‌يگ تر له‌و كه‌سه‌يله‌ ك قورتار بوينه‌و ژان براو خوه‌يشكه‌يليان گرتنه‌سه‌ گه‌ردن و وه‌رگری كردن له‌وه‌ر مافه‌يليان له‌ ژيان.

وه‌ل ئه‌وه‌يشا فيلمه‌ وێنه‌ی ژيان په‌نابه‌ره‌يل ئێزيدی گرته‌سه‌ خوه‌ی له‌ شار لينكۆڵن، ك جوور دايگيگ باوه‌شگرتگه‌ ئه‌را فيشترين شماره‌ی ئێزيديه‌يل له‌ وڵاته‌يل يه‌كگرتگ، ك باس له‌ نه‌خشه‌و توانايه‌يليان ئه‌كا له‌بان گوزه‌ركردن سه‌ختيه‌يل و مقه‌يه‌تيكردن له‌ ميرات رووشنهويری و جموجويلكردن وه‌خاتر بنياتناين ژيانيگ تازه‌و ئاينده‌يگ خاستر.

له‌ هه‌مان وه‌خت فيلمه‌گه‌ مه‌سه‌له‌ی گونجانن و تيكه‌ڵبوين خيزانه‌يل ئيزيدييش باس ئه‌كا له‌ كومه‌ڵگای تازه‌يان و له‌ باوه‌ش ئه‌و كومه‌ڵگاو مه‌سه‌له‌ی پيشكه‌شكردن هاوكاری و ده‌سميه‌ته‌يل ئنسانی له‌لايه‌ن ده‌سڵاته‌يل مه‌ده‌نيه‌و.

https://www.youtube.com/watch?v=AggOfCfH7UY&feature=youtu.be

FaceIraq
}