2016-12-08 10:11:00

شه‌فه‌ق نيوز/ هه‌ناى ك گوله‌ قازيفه‌ كه‌فتياده‌ ده‌ورگرد شار ته‌لعه‌فه‌ر وه‌ل هاتن هيزه‌يل حه‌شد شه‌عبى ئه‌را جه‌نگ ريكخرياگ ترۆريستى داعش له‌ باكوور عراق، ئه‌بو فه‌ره‌ج ده‌رفه‌تيگ ديه‌و ئه‌را واين له‌ ديلى.

 

ئه‌بو فه‌ره‌ج خوه‌ى 17 كه‌س تر له‌ ئێزيديه‌يل جيواز بوين ئه‌را ده‌ورگرد شاره‌گه‌، يه‌يش له‌وه‌ختيگ ك وه‌رپرسه‌يل زيندانه‌گه‌ى سه‌ر وه‌ ريكخرياگ داعش سه‌رقاڵ جه‌نگ بوين.

 

دوياى چوار رووژ و له‌شوون وازبوين ده‌رفه‌تيگ ئه‌رايان واين، ك ئه‌و شماره‌ پيكهاتن له‌ ژن و مناڵ و تويه‌نستن له‌ڕى چووڵه‌وانيه‌و دويا چه‌ن سه‌عاتيگ ڕيكردن بڕه‌سنه‌ ناوچه‌يگ ژير ده‌سڵات كورد و له‌ ئه‌مان بوون.

 

ئه‌بو فه‌رج ته‌مه‌ن 33 ساڵان ك ئه‌را ماوه‌ى فيشتر له‌ دوساڵ چه‌وه‌ڕى ئى له‌حزه‌يله‌ كردياد، وت: ئه‌و وه‌خت و سه‌عاته‌ ها هويرم ك بڕيار واين دايم ك ئه‌ويش سه‌عات 6:50 ده‌قه‌ى ئيواره‌ بوى.

 

ئى ئه‌بو فه‌ره‌جه‌ ك ناويگ تر ئه‌را خوه‌ى هه‌ڵوژان له‌ترس ئه‌وه‌ك تونڕه‌وه‌يل داعش نه‌ناسنه‌ى ك هيمان خيشه‌يلى له‌لاى ئه‌و ريكخرياگه‌ زيندانى كريانه‌، وت: ناچار بويمن گشتمان وه‌ ڕه‌ز ڕى بكه‌يم له‌وه‌خت واينمان له‌ڕى چووڵه‌وانى و له‌شوون پاى يه‌كترى ڕى بكه‌يم له‌وه‌ر مه‌ترسى له‌ مين.

 

ريكخرياگ ترۆريستى داعش هه‌ناى ك هاتنه‌ ناو شه‌نگاڵ له‌ باكوورعراق له‌ ئاب ساڵ 2014، بڕيگ له‌ خيزان ئه‌بو فه‌رج ده‌سگير كرد ك پيكهات له‌ خوه‌ى و هاوسه‌ره‌گه‌ى و هه‌ردوگ دويه‌ته‌گه‌ى.

 

تونڕه‌وه‌يل داعش وه‌ شيوه‌يگ وه‌حشيانه‌ هه‌زاران ئێزيدى كوشتن و فريه‌يگيش له‌ليان ده‌سگير كردن و دويريانه‌و خستن و چه‌نه‌ها قه‌ورسان وه‌جه‌م ئى پيكهاته‌يشه‌ دوينريانه‌و له‌وه‌ختيگ ك هيزه‌يل كورد ناوچه‌يليگ له‌ باكوو شه‌نگاڵ له‌ژير ده‌سڵات ئه‌و ريكخرياگ ترۆريستيه‌ ئازاد كردن له‌ كانوون يه‌كه‌م 2014 و دوياى ئه‌وه‌يش ئازادكردن شاره‌گه‌ له‌ ته‌شرين دويه‌م 2015، وه‌لێ داعش شماره‌يگ فريه‌يگ له‌ ئێزيديه‌يل جيواز كرد ئه‌ر ناوچه‌يل تر و له‌وانه‌يش ته‌لعه‌فه‌ر.

 

وه‌ گووره‌ى ئه‌و راپۆرته‌يله‌ ك له‌ناوچه‌گه‌وه‌ ده‌رچياد ئه‌وه‌ ده‌ركه‌فت ك له‌ى رووژه‌يل دوياخره‌ هه‌زاران كه‌س له‌ ته‌لعه‌فه‌ر واينه‌ له‌وه‌ختيگ هيزه‌يل حه‌شد شه‌عبى شيعه‌ پيشڕه‌وى كردن وه‌ره‌و ناوچه‌گه‌و زوورم ئه‌وانه‌يش توركمان سنى بوينه‌ ك واينه‌.

 

ئه‌بو فه‌رح وت: هه‌ناى ك چه‌ومان كه‌فت مه‌ردمان تر خه‌ريك واينن له‌ شوونه‌يل خوه‌يان، ئيمه‌يش ماڵ خوه‌مان هيشتيمنه‌ جى، وه‌لێ باس له‌وه‌ كرد ك له‌ژير ده‌سڵات ريكخرياگ ترۆريستى داعش له‌سێداره‌داين و كوشتن فريه‌يگ ئه‌نجام درياگه‌.

 

ئه‌بو فه‌رج يه‌كيگ بوى له‌و مه‌ردمان جايه‌ڵ جوان كه‌م ئێزيديه‌يله‌ ك له‌ژير ده‌سڵات داعش وايه‌و باس له‌وه‌يش كرد ك باقى مه‌ردمه‌گه‌يش وه‌ليا پيكهاتنه‌ له‌ ژن و مناڵ و پياو په‌ككه‌فتگ.

 

په‌يجووريكاره‌يل سه‌ر وه‌ نه‌ته‌وه‌يل يه‌كگرتگ له‌ مانگ حزه‌يران باس له‌وه‌ كردن ك ريكخرياگ داعش له‌ناوبردن وه‌جه‌م ده‌رهه‌ق ئێزيديه‌يل ئه‌نجام داگه‌ له‌ سورياو عراق، ئه‌ويش وه‌خاتر زاڵبوين له‌بان كه‌مينه‌يل له‌ڕى كوشتن و تاوانه‌يل تر.

 

ژنيگ تر له‌ ته‌مه‌ن 42 ساڵان هه‌مان ڕى وه‌ واين بڕى ك ئه‌بو فه‌ره‌ج بڕيه‌ى و سێ له‌ مناڵه‌يلى وه‌ليا بوين و وت: دوياجار ره‌سيمنه‌ سه‌نگه‌ره‌يل پێشمه‌رگه‌و حجابه‌يلمان لاورديم و ده‌سه‌يلمان به‌رزه‌و كرديم و ترس له‌وه‌ داشتيم وه‌ داعش بزاننه‌مان وه‌و جنگه‌يل سيه‌ ك له‌وه‌رمان بوى و بكه‌فيمنه‌ وه‌ر ته‌قه‌يان.

 

وه‌لێ هاوسه‌ره‌گه‌ى و كوڕيگه‌ له‌ ته‌مه‌ن 16 ساڵان و دويه‌تيگى له‌ ته‌مه‌ن 20 ساڵان له‌ليان جيا كرياوێن له‌وه‌ختيگ وه‌ديل كه‌فتنه‌ ده‌س تونڕه‌وه‌يل ريكخرياگ داعش ئه‌را يه‌كه‌مجار و ئويشێد نازانم چه‌ وه‌سه‌ريان هاتگه‌.

 

له‌ى باوه‌تيشه‌و، نويسينگه‌ى كاروبار رفياگه‌يل له‌ دهۆك و حكومه‌ت هه‌رێم كوردستان پشتگيرى له‌لى ئه‌كا، باوه‌ڕى ئه‌وه‌سه‌ ك نزيكه‌ى 3500 ئێزيدى هيمان هانه‌ ناوچه‌يل ژير ده‌سڵات ريكخرياگ ترۆريستى داعش و له‌ناونيانيش ئافره‌ته‌يل فريه‌يگ و مناڵه‌يليش وجوود ديرن.

 

وه‌لێ وه‌ل ئه‌وه‌يشا ئه‌وانه‌كيش ك تويه‌نستنه‌ وه‌ واين خوه‌يان قورتار بكه‌ن له‌ه‌س ريكخرياگ ترۆريستى داعش، هيمان تائيسه‌يش مه‌ينه‌تيه‌يليان ته‌مام نه‌ويه‌.

 

ئه‌بو فه‌ره‌ج ئويشێد: ئيسه‌ ئيمه‌ نازانيم چه‌ بكه‌يم، نازانيم ئه‌يا ئه‌تويه‌نيم كله‌و بخوه‌يم ئه‌را شوون و ماواى خوه‌مان؟ ئه‌ى ئاينده‌مان چوين بوود؟ ئى كاره‌ خه‌يمنه‌ لاى خودا.

FaceIraq
}