2017-08-24 20:03:00

شه‌فه‌ق نيوز/ له‌ وه‌ختيگ هيزه‌يل عراقى رێ گرتنه‌ وه‌ر وه‌ره‌و شار ته‌لعه‌فه‌ر دويا بنگه‌ێ ريكخرياگ ترۆريستى داعش له‌ عراق و له‌ وه‌ختيگ حه‌يده‌ر عبادێ سه‌رۆك وه‌زيره‌يل عراقى په‌ياميگ ئاراسته‌ێ نزيه‌ێ دو هه‌زار چه‌كدار كرد له‌ورا ك خاستر ئه‌وه‌سه‌ ته‌سليم خوه‌يان بكه‌ن يا ئه‌وه‌سه‌ چاره‌نويسيان مه‌رگه‌، ئافره‌تيگ ئێزيدى يه‌كيگ له‌ چه‌كداره‌يل ئه‌و ريكخرياگه‌ ناسێ هه‌ناێ ك له‌بان شاشه‌ێ كه‌ناڵيگ كوردێ ده‌رچێ له‌ وه‌خت كووچكردنێ وه‌ل مه‌ردم ته‌لعه‌فه‌ر ئه‌را شوونه‌يل ئه‌مان له‌ژير ده‌سڵات هيزه‌يل عراقى.

 

ئه‌و ئافره‌ته‌ ك ناسرياگه‌ وه‌ ئيڤانا وه‌ليد تويه‌نست ئه‌و چه‌كدار ريكخرياگ ترۆريستى داعش بناسێد ك وه‌رپرس بويه‌ له‌بان بازرگانيكردن وه‌پى و ئافره‌ته‌يل تر ناسيارێ له‌وانه‌ك رفياوێن له‌ ته‌لعه‌فه‌ر له‌ خوه‌رئاواێ موسڵ و ئاماژه‌ وه‌ ره‌سم ئه‌و چه‌كداره‌ كرد و وت: ئى پياوه‌ ناسرياگه‌ وه‌ ئه‌بو عه‌لى ك ئيسه‌ هاوار ئه‌كاو ئويشێد من كووچبه‌رم و كاميرا له‌بانى بوێ له‌ وه‌خت جيوزاكردن راسه‌خۆ جه‌نگه‌يل ته‌لعه‌فه‌ر.

 

ئيڤانا له‌ لاپه‌ڕه‌ێ تايبه‌ت خوه‌ێ له‌بان ماڵپه‌ڕ په‌يوه‌ندێ كۆمه‌ڵايه‌تى فه‌يسبوك ئويشيد: هوچ ناتويه‌نم روخسارێ له‌ هوير بووه‌م، ئه‌و وه‌رپرس بوێ له‌بان سه‌ندن گشت ئافره‌ته‌يل ئێزيدى له‌ ته‌لعه‌فه‌ر، من و فريه‌يگ تر له‌ ئافره‌ته‌يل قورتاربوێ خاس ناسيمنه‌ێ.

 

ئيڤانا له‌ێ باوه‌ته‌و وت: من فريه‌ دڵنيام له‌ ده‌نگێ، هه‌ناێ ده‌نگێ ژنه‌فم ئه‌وه‌ ئه‌ياده‌ هويرم چوين قسه‌ وه‌لمانا كردياد وه‌ تونى و چوين ئيهانه‌مان كردياد و چوين وتياد فرووشمه‌دان.

ئيڤانا وت: ئى كابرا سه‌نده‌م و فرووشته‌م زياتر له‌ جاريگ.

 

ئى ئافره‌ت ئێزيديه‌ جه‌خت له‌وه‌يش كرد ك ئاماده‌س وه‌رانوه‌رێ بگرێد و گشت ئه‌و كرده‌وه‌يله‌ وه‌پى بكا ك هاورده‌سه‌ێ تويش خوه‌ێ و ئافره‌ته‌يل تر قورتاربوێ.

 

ئيڤانا وه‌ليد ئويشيد: داوا له‌ حكومه‌ت ئه‌كه‌يم په‌يجوورێ خاسيگ وه‌ليا بكا، چوينكه‌ زوورم ئافره‌ته‌يل له‌ ته‌لعه‌فه‌ر بوينه‌و ئه‌و ئيسه‌ خاس زانيد هانه‌ چ شوونيگ و چه‌ وه‌سه‌ريان هاتگه‌.

 

ئيڤانا هه‌ميش وت: ئى كابرا بايه‌سه‌ سزا بدريه‌ێد و باس له‌وه‌يش كرد ك سه‌دان كه‌س تر سه‌ر وه‌ ريكخرياگ داعش وه‌ل خيزانه‌يل كووچبه‌ر واينه‌.

 

ئيڤانا وه‌ليد يه‌كيگ له‌و ئافره‌ته‌يل دياريكرياگه‌ ك قورتار بوينه‌ له‌ ده‌س چه‌كداره‌يل ريكخرياگ داعشه‌ ك وه‌ديل گيريان و دويره‌و خريان له‌وه‌ختيگ شه‌نگاڵ داگير كريا له‌ ئاب 2014.

 

وه‌ل ئه‌وه‌يشا هيمان نزيكه‌ێ سێ هه‌زار ئێزيدى تر له‌ ژن و مناڵ هانه‌ ناو شماره‌ێ ئه‌و بيسه‌ر و شوونه‌يله‌ ك پيشبينى ئه‌كريه‌ێد فريه‌يگ له‌ليان له‌ شار ته‌لعه‌فه‌ر بوون.

 

}