2013-04-22 13:57:04

 

ئه‌وه‌ بوى قوناغ كووچ وه‌پیكردن تایفه‌گه‌رى ده‌رهه‌ق ئى پیكهاته‌ په‌یڕه‌و كرد له‌وه‌ر ئه‌وه‌ك شیعه‌ مه‌زه‌و بوین وه‌ مه‌هانه‌ى ته‌به‌عیه‌ى ئیرانى، دى ئه‌و كووچ وه‌پیكردنیشه‌ له‌ سه‌رده‌م سه‌دام و پیاوه‌یل به‌عس فیشتره‌و بوى و چییه‌ قوناغ تایفه‌گه‌رى كوورانه‌و شێواز شۆفێنى له‌ بڕیارێگ پیس و دویر له‌ ئنسانیه‌ت، ك فره‌یگ له‌ جایه‌ڵ جوانه‌یلیان خسته‌ زندانه‌یل تیه‌ریك وه‌بێ تاوان له‌وانه‌یش زندان ئه‌بو غرێب  و زندانه‌یل تر عراق.

 

رژیم رمیاگ به‌عس ئه‌و سیاسه‌ت كوورانه‌ وه‌ل ئى پێكهاته‌ى عراقیه‌ له‌وه‌ر ئه‌وه‌ هاورده‌ كار چوینكه‌ كورده‌یل فه‌یلى لایه‌ن قورس ئابوورى بوین له‌ عراق ك ده‌وڵه‌مه‌نترین وڵاته‌یل جه‌هان بوى و له‌وه‌ ترسیا پایه‌ى ئابوورییان به‌رزه‌و بودو كاریگه‌رى بیاشتوود له‌بان كوڕه‌ نازپه‌روه‌ر سه‌رۆكه‌یل سته‌مكار و داروده‌سه‌یان، هه‌ر له‌وه‌ر ئه‌وه‌یش ده‌س كردنه‌ نه‌خشه‌ناین ئى پلان تاوانكاریه‌ له‌ڕى دویره‌و خستنیان وه‌ مه‌هانه‌ى ئنتماى نه‌ته‌وه‌یى ك فره‌یگ له‌ ده‌وڵه‌ته‌یل عه‌ره‌بى و پێكهاته‌یل تر عراقى وه‌پى خه‌ڵه‌تانن و رووڵه‌یل ئى عراقه‌ وه‌ سه‌فه‌وى و فارس و خیانه‌تكار و چشته‌یل تر تاریف كردن. به‌ڵێ ئى تایفه‌گه‌ریه‌ ته‌نانه‌ت تا وه‌رجه‌ چه‌ن مانگیگیش له‌ده‌م خوه‌ینیشانده‌ره‌یلیش ژنه‌فتیم ك رژیم به‌عس هاورده‌ى كار ده‌رهه‌ق زوورم ملله‌ت عراقى وه‌گووره‌ى فیشتر له‌ سى ساڵ و هه‌ر وه‌و خاتریشه‌ ده‌سكرده‌ كووچ وه‌پیكردن زووره‌ملى رووڵه‌یل ره‌سه‌ن و خسته‌یانه‌ بان مه‌رز ئیران و گشت ماڵ و موڵكه‌یلیان له‌لیان زه‌فت كرد وه‌ گووره‌ى ئه‌و ئامانجه‌یل خوه‌یانه‌ ك له‌وسا تائیسه‌یش شوونه‌وارى مه‌ندگه‌ له‌بان ئى پێكهاته‌.

 

ئى كیشمه‌كیش ئیسه‌یشه‌ ك ئمڕوو له‌عراق دوینیمنه‌ى دریژه‌ده‌ر ئه‌و سیاسه‌ته‌سه‌ ك هاووڵاتى عراقى له‌ هه‌قه‌یلى بیه‌به‌ش كریاو هه‌ق زوورم ملله‌ت له‌ ژیان ئازادانه‌ ناهمى كرد و ده‌سكرده‌ كوشتن و گرتن مه‌ردم بیتاوان و جنگ تایفه‌گه‌رى ئه‌ڕایان دویران و ده‌سگرته‌ بان دارایى و هه‌قه‌یل مه‌ده‌نى و ناسنامه‌و موڵكه‌یلیان.

 

تویه‌نیم بویشیم دزین هه‌قه‌یل نه‌ك ته‌نیا له‌بان ماڵ و موڵك، به‌ڵكوو هه‌قه‌یل تاكه‌ كه‌سییش گرته‌و ك یه‌یش هه‌قه‌ بنه‌ڕه‌تى ئى پێكهاته‌ى زوڵملیكریاگ كورد فه‌یلیه‌ بوى، ئمجا ئیسه‌ بایه‌د له‌بان گشت لایه‌نه‌یل سیاسى له‌عراق جوور لایه‌نه‌یل بڕیارده‌ر و جیوه‌جیكار و سه‌رۆكایه‌تى داواى هاوردنه‌وه‌ى هه‌قه‌یل ته‌واو ئى مه‌ردمانه‌ بكه‌ن و قه‌ره‌بوو بكریه‌ن له‌ ئاكام ئه‌و زوڵم و دزیكردنه‌ ك له‌لیان كریا.

 

جواد كازم خاڵسى

ج . أ

 

 

 

 

 

 

 

YesIraq
}