2019-09-14 20:09:26

موئه‌يه‌د عه‌بدولستار/ قه‌يران ئيسه‌ ئاماژه‌ وه‌ ئه‌وه‌ ئه‌كا حكومه‌ت عادل عه‌بدولمه‌هدى هاو وه‌رده‌م رييگ به‌سياێ ك ناتويه‌نێد گاميگ له‌تى بچێده‌ نواوه‌و هويچ ئه‌ڕاى نه‌مه‌نده‌سه‌و مه‌گه‌ر ته‌نيا په‌رچه‌م خوه‌ى وه‌ده‌سه‌وداين ئه‌را ئه‌و هيزه‌يل سياسيه‌ به‌رزه‌و بكا ك وه‌زيره‌يل ئه‌راى هه‌ڵوژانن و چينه‌ ناو پله‌ تايبه‌ته‌كانه‌و له‌ بريكاره‌يل وه‌زاره‌ت و وه‌ريه‌وبه‌ره‌يل گشتى، ك هويچ چشتيگ ئه‌راى پيشكه‌ش نه‌كردن ك فه‌قيرى لاوه‌يد و رووڵه‌يل وڵات ناونى دوچه‌مان ك ده‌وڵه‌مه‌نه‌ وه‌نه‌ف تير بكاو له‌گشت خزمه‌تگوزاريه‌يليگ بيبه‌شه‌.

 

هه‌ر وه‌و خاتريشه‌ هيزه‌يل سياسى هه‌وڵ بريقه‌داركردن روخسار حكومه‌ت ئه‌يه‌ن وه‌ ئاڵشتكردن بڕێگ روخسار كه‌مته‌رخه‌م له‌ وه‌زيفه‌و ئاڵشتكردنى وه‌و كه‌سه‌يله‌ ريڕه‌و خوه‌يان گرتگه‌ مادام به‌شبه‌شايه‌تى و هه‌ق خوه‌ى وه‌گرتن هووكاره‌يليگن له‌ هه‌ڵوژانن بنه‌ماڵه‌ێ سه‌وز.

 

ئمجا هه‌رچه‌نى مه‌ردميش له‌ خوه‌ينيشانداينه‌يليگ تويڕه‌يى وبانگه‌وازه‌يليگ مه‌رجه‌ع ئايينى خوه‌يان نيشاندان و ده‌نگ به‌رزه‌و كردن، وه‌لێ هيزه‌يل سياسى حاڵه‌ت گه‌نده‌ڵێ فراوان له‌ناونى كه‌سه‌يل زگن و خڕه‌ڵ له‌بان كورسى ده‌سه‌ڵات چاره‌سه‌ر نه‌كردن و ئه‌و داواكاريه‌يليه‌ هه‌وا برده‌يان و كه‌س گووش له‌ليان نه‌ياو خوه‌يان له‌ هه‌ناى كردنه‌ كه‌ڕ و لاڵ و ئه‌وه‌ بوێ هه‌ركه‌سيگ و ده‌س له‌ چشتيگ له‌ وه‌زاره‌ت يا دام و ده‌زگايه‌يل پڕ له‌ دۆلار و مقاوڵات به‌ن كردگه‌، جوور بانكه‌يل و وزاره‌ت نه‌فت و دارايى و گواستنه‌وه‌و په‌يوه‌نديه‌يل و ته‌ندروستى و په‌روه‌رده‌و هيمان وه‌و جووره‌ مه‌سه‌له‌گه‌ هه‌ر جوور خوه‌ێ مه‌ندگه‌ و ده‌سكردنه‌ گيرفان پڕكردن خوه‌يان و قه‌وم و كه‌س و كار تا هه‌فت پشتيان بيجگه‌ تاڵان و بردن پويل و هويچ چشتيگ نه‌يشته‌سه‌و زه‌فه‌ر له‌لێ نارێد له‌ دارايى ملله‌ت و ماڵ حه‌رام.

 

دى جام پڕ بويه‌و مه‌ردميش وه‌چه‌و خوه‌يان دوينن ئى هه‌مگه‌ دزى و گه‌نده‌ڵى ئداريه‌ ئه‌كريه‌ێد و ده‌س گيرياسه‌ بان پۆسته‌يل وه ناهه‌قى و كه‌مى له‌ خزمه‌تگوزارى و هه‌وه‌جه‌ وه‌ خزمه‌تگوزاريه‌يليگ جوور ئاو و كاره‌با و ته‌ندروستى و په‌روه‌رده‌، ته‌نانه‌ت ملله‌ت جاڕس بوينه‌و ده‌سكردنه‌سه‌ سينه‌كوتان له‌ تازيه‌يل ئيمام حسێن شه‌هيد (سڵام خودا له‌لى) به‌شكه‌م وه‌و سينه‌كوتانه‌ ئاگر تويڕه‌ييان بكوشيه‌ێده‌، ك له‌يوا دياره‌ له‌ كه‌ربه‌لاوه‌ روێ له‌ ناوچه‌ى سه‌وز بكه‌ن، دى ئه‌و وه‌خته‌ په‌شيمانى ده‌رئه‌كه‌فێد ئه‌را گه‌ناته‌كاره‌يل.

}