2019-10-11 14:57:53

جه‌لال شێخ عه‌لى/ له‌ 24 ديسه‌مبه‌ر, دۆناڵد تره‌مپ سه‌رۆك ئه‌مريكا له‌ په‌راوێز كاره‌يل كۆمه‌ڵه‌ى گشتى نه‌ته‌وه‌يل يه‌كگرتگ وت: شايسته‌ى ئه‌وه‌سه‌ خه‌ڵات نۆبڵ ئه‌را ئاشتى وه‌ربگرێد و وت: شايه‌ت له‌وه‌ر مه‌سه‌له‌يگ ئه‌و خه‌ڵاته‌ وه‌ربگرم ئه‌گه‌ر وه‌ پاكى بيه‌نه‌ى ك يه‌يش زه‌حمه‌ته‌ ئه‌نجامى بيه‌ن.

 

تره‌مپ وت: ئه‌و خه‌ڵاته‌ راسه‌وخۆ دريا ئۆباما دوياى ره‌سينى ئه‌را سه‌رۆكايه‌تى ك ئه‌و هويچ فكره‌يگيش نه‌ياشت له‌باره‌ى هووكار وه‌رگرتن ئه‌و خه‌ڵاته‌، يه‌يش گومانيگه‌ له‌ شايسته‌يى ئۆباما ئه‌را وه‌رگرتن خه‌ڵاته‌گه‌و له‌هه‌مان وه‌خت ليژنه‌ى سه‌رپه‌رشيتيكاريش كه‌فته‌ گومانه‌و!!!...

 

دياره‌ دۆناڵد تره‌مپ ئاگاى له‌وه‌ نيه‌ ليژنه‌يگ تايبه‌ت هه‌س له‌ چوارچێ,ه‌ى په‌رله‌مان نه‌رويجى ك سه‌رپه‌رشى لايه‌نيگ له‌ كانديدكردن ئه‌كا و ليژنه‌گه‌يش ساڵانه‌ ئه‌و كه‌سه‌يله‌ ديارى ئه‌كا ك شايسته‌ن ئه‌و خه‌ڵاته‌ وه‌ربگرن وه‌گوورى ئه‌و خزمه‌ته‌يل ئنسانيه‌ ك پيشكه‌شى ئه‌كه‌ن, ئه‌ويش وه‌گووره‌ى رينمايه‌يل نۆبل زاناى ناودار له‌ وه‌سيه‌ته‌گه‌ێ.

 

ئمجا پيشنيازه‌يل ئى كانديدكردنيشه‌ ئه‌را ئى خه‌ڵاته‌ له‌ دادگايه‌يل ناوده‌وڵه‌تى يا ئه‌ندامه‌يل حكومى يا مامۆستايه‌يل زانكۆ و ئه‌وانه‌گ تايبه‌تمه‌ندن وه‌ بوار مێژوو و زانسته‌يل كۆمه‌ڵايه‌تى و فه‌لسه‌فه‌وه‌ ئه‌ياد.

 

گله‌و خوه‌يم ئه‌را لاى ريزدار تره‌مپ ك ئاگاى له‌وه‌ نيه‌و هاتگه‌ گومان له‌گشت ئه‌و ده‌زگا و ليژنه‌يله‌ ئه‌كاو ئويشيد من شياسته‌ترم ئه‌را ئى خه‌ڵاته‌.

 

دى نازانم وه‌گووره‌ى كام بنه‌ماو پێوه‌ر تره‌مپ خوه‌ى    كانديد ئه‌كا، ك تا دويه‌كه‌ى نزيكيگ واز له‌ پێشمه‌رگه‌ى قاره‌مان هه‌رێم كوردستان هاورد ك دژ ريكخرياگ داعش جه‌نگ كرد وه‌ل هاوپه‌يمان ناوده‌وڵه‌تى، ك ئاشكرا بوى چوين تره‌مپ پێشمه‌رگه‌ وڵكرد له‌ژير ره‌حمه‌ت هيزه‌يل عه‌بادى سه‌ر وه‌ ئيران و پڕچه‌ككرياى وه‌ چه‌ك ئه‌مريكى جوور هه‌مه‌ره‌يل سه‌ربازى و ده‌بابه‌ى ئه‌برامز و دوياخريش كوشتن و ئاواره‌بوين هه‌زار كورد له‌لى كه‌فته‌و له‌ شاره‌يل كه‌ركوك و خانه‌قين و خورماتوو.

 

ئمڕوويش تره‌مپ واز له‌ كورد سوريا هاورد وه‌ هه‌ماتن سيناريۆ ئه‌را ئه‌وه‌ك بوونه‌ شكار ئاسان سوپاى توركى,ك يه‌يش كاره‌سان ئنسانى له‌لى ئه‌كه‌فێده‌وه‌ جوور كوشتن و كووچوه‌پيكردن و ئاواره‌بوين.

 

ئمجا ئايا ريزدار تره‌مپ هيمان مكوڕيد له‌بان شايسته‌يى خوه‌د ئه‌را وه‌رگرتن نۆبڵ ئه‌را ئاشتى؟؟؟

 

ئاگادار به له‌وه‌گ هه‌ركه‌سى شايسته‌ى ئه‌و خه‌ڵاته‌سه‌ نه‌بايه‌د بازرگانى وه‌ ئاده‌ميزاد بكا و به‌راوردى وه‌ چه‌ك و دارايى ناكا جوور ئه‌وه‌گ ئه‌وه‌گ تن كرديده‌ى له‌ دويا قسه‌يلد له‌ توێته‌ر.

FaceIraq
}