2014-02-10 11:26:45

  خوداوه‌ند په‌روه‌ردگار له‌وه‌ختيگ ئاده‌ميزاد دروس كرد، گشت ياساو ده‌ستووريگ ئه‌ڕای وه‌ جوانی رازانه‌و تا بتويه‌نيد ژيان وه‌ شيوه‌ی خاسيگ وه‌پی بگوزه‌ريد، هه‌ر له‌وه‌ر ئه‌وه‌يش وه‌گشت باوه‌ڕيگه‌و ئويشيم: ده‌ستوور خودايی چاره‌كه‌ر گشت كيشه‌و گرفتيگه‌ له‌بان بنه‌مای راس و دروسيگ.

بيگومان سه‌رجه‌م ئاده‌ميزاد له‌ نه‌وه‌ی "ئاده‌م و حه‌وا"ن، گشتيشی له‌ خاك دروس كريانه‌و دويای ته‌واوبوين ئه‌و عومره‌ ك له‌لايه‌ن خوداوه‌ند ميهره‌بانه‌و ئه‌ڕاد دياری كرياگه‌، جاريگتر بويده‌ ئه‌و خاكه‌ ك له‌لی دروس كريايد، مانای ئه‌وه‌سه‌ له‌ خاك ئه‌را خاك و هويچ جياوازييگ نيه‌ له‌ناونی ئاده‌ميزاد له‌ڕوی دروسكردن و خولقاندنی، ته‌نيا ئه‌وه‌ نه‌ود ك وه‌گووره‌ی رووژگار نه‌ته‌وه‌يل جوراوجوور دروس بويه‌و زووان و داب و نه‌ريت ئی نه‌ته‌وه‌گه‌ له‌واكه‌ جياس و به‌شيگيش له‌و جياييه‌ له‌ سوره‌ی ئه‌لحجه‌رات له‌ قورئان باس كرياگه‌ ك خودا له‌تی فه‌رمايش ئه‌كا((وجعلناكم شعوبا وقبائل لتعارفوا)).

له‌يرا مه‌رام له‌ دروسكردن هووز و ملله‌ته‌يل جياجيا وه‌ گووره‌ی شيه‌وكردن بڕيگ له‌ شيه‌وكه‌ره‌يل ئايينی ئه‌وه‌ ده‌ركه‌فت ك بنه‌چه‌ك و ريشگ ئی ملله‌ته‌يله‌ هه‌ر يه‌كيگه‌و ته‌نيا جياوازيه‌گه‌ی له‌ڕوی شماره‌و قه‌واره‌ی مه‌ردمه‌گه‌س، وه‌نا هويچ جياوازييگ تر نه‌يريد.

ئنجا هه‌ر له‌بان ئه‌و بنه‌مايشه‌ ملله‌ت كورد خوه‌مانيش يه‌كيگه‌ له‌ی ملله‌ته‌يل خاوه‌ن زووان و كلتوور و فه‌رهه‌نگ تايبه‌ت خوه‌يه‌و زێدو ماوای خاك كوردستانه‌، ك هه‌رچه‌نی جی داخه‌ له‌لايه‌ن ملله‌ته‌يل تر هاوساو ئمپراتۆريه‌ته‌يل ناوچه‌گه‌ فره‌جار كه‌فته‌سه‌ وه‌ر هه‌وڵ له‌ناوبردن وه‌ پشتگيری وڵاته‌يل گه‌وراهيز له‌وه‌ر به‌رژه‌وه‌ندی و داگيركردن نيشتمانه‌ جوان و دڵگيره‌گه‌ی، وه‌لی وه‌ل ئه‌وه‌يشا كيشمه‌كيش و دژايه‌تيكردن يه‌كتری و هه‌وڵ چه‌كانن شيرازی برايه‌تی له‌ ناونی پيكهاته‌يلی تا ئيسه‌يش وه‌ ئاشكرا ره‌نگه‌و داگه‌و خه‌ريكه‌ ريشگ خوسه‌و كينه‌ت كوتيدو گه‌ورا بويچگ له‌ هويره‌و بردگه‌و مه‌ردمانيگ ره‌سه‌ن و دڵسووز و كوردپه‌روه‌ر هه‌ن خه‌ريكه‌ فه‌رامووش و خه‌ڵوه‌تنشين كريه‌ن.

ئيمه‌ی كورد ئه‌گه‌ر ئمڕوو له‌ی بار سه‌خته‌ ك ناوچه‌گه‌ وه‌گشتی و عراق وه‌ تايبه‌ت وه‌پيه‌و گوزه‌ر ئه‌كا، يه‌كهه‌ڵويست و يه‌كڕه‌نگ و يه‌كده‌نگ نه‌ويم و ئه‌ياكه‌مان دگان وه‌ ئه‌واكه‌ نه‌نه‌يدو خه‌م يه‌كتری نه‌خوه‌يم و گه‌ورامايه‌يلمان مقه‌يه‌ت بويچكه‌يلمان نه‌ون و هه‌ميشه‌ چه‌قو بيه‌يمنه‌ هه‌سان له‌ڕوی يه‌كتری و چه‌ومان برايی يه‌كتری نه‌وينی، ئه‌وه‌ بيگومان كاريگه‌ری خراويگ نه‌يده‌ بان ئاينده‌ی هه‌ناسه‌ی ئه‌زه‌ره‌ته‌يل گشتلايگمان وه‌ گشتی، چوينكه‌ هه‌ر چين و تايفه‌يگ له‌ ئيمه‌ی كورد به‌ش خوه‌ی قوربانی داگه‌و ده‌رده‌سه‌ری فريه‌يگ ديه‌سه‌ چه‌و، ك هه‌ر وه‌و خاتريشه‌ نه‌بايه‌د سياسه‌ت دويره‌وخستن و فه‌رامووشكردن له‌ خشته‌ی سياسی ده‌سڵات كوردی ره‌نج چه‌ن ساڵه‌و تويه‌م ئوميد پيكهاته‌يگ له‌بار بووه‌يدو پيكهاته‌يگ تر خوه‌شگوزرانی له‌بان هساو خه‌بات و قوربانيه‌يل مه‌ردمانيگ بكا ك تائيسه‌يش ده‌روه‌ده‌ر و ئاواره‌ی په‌ڕ شاره‌يله‌ له‌ وڵاته‌يل تر!!

مه‌رام باسه‌گه‌م ئاشكراو دياره‌، ئيمه‌ نه‌بايه‌د وه‌خت له‌ده‌س بيه‌يم و هه‌ر وه‌ ئه‌زره‌ت وه‌رچه‌رخان روخسار رووژگاره‌و خوه‌مان خه‌ريك بكه‌يم، چوينكه‌ ئيمه‌ خاوه‌ن كيشه‌يگيم ئه‌گه‌ر ئمڕوو چاره‌سه‌ری نه‌كه‌يم سوو دسوو روڵه‌يلمانيش وه‌پيه‌و ناڵنن. كيشه‌ی كورده‌يل فه‌يلی كيشه‌يگ وژدانی و ئنسانيه‌و ئه‌رك گشت كه‌سيگ خاوه‌ن وژدانه‌ له‌ی عراقه‌ قه‌وڵ پيشخستنی بيه‌يد تا بار مه‌ينه‌تی و به‌دبه‌ختی ساڵه‌يل دوير و دريژ ئاواره‌يی و چه‌وسيان جوور ناويگ له‌ وه‌رانوه‌ر ئی پيكهاته‌ی قوربانيده‌ره‌ بكه‌فيده‌ گه‌ر ئاسياو، تا جاريگتر هويچ رژيميگ نه‌تويه‌نيد ده‌س زوڵم و سته‌م له‌ليان دريژه‌و بكا، هه‌ر وه‌و خاتريشه‌ بايه‌سه‌ له‌بان گشت كورديگ بادينی و سۆرانی و زازايی و هه‌ورامی...هتد كيشه‌ی كورده‌يل فه‌يلی وه‌ كيشه‌ی خوه‌يان بزانن و خه‌م ئه‌و هه‌زاران رولَه‌يل بيسه‌ر وشوونكرياگيانه‌ بخوه‌ن ك تائيسه‌يش چاره‌نويسيان نادياره‌، خه‌م ئه‌و داڵگه‌يل جگه‌رسزياگه‌ بخوه‌ن ك هيمان وه‌رگ ئازيه‌تی له‌وه‌ر نه‌كه‌ندنه‌و له‌ گووشه‌ی غوربه‌ت ژيان سه‌خت و حه‌سره‌تباريگ ديرن، وه‌ هه‌ر حاڵ ئيمه‌ی كورد گشتمان باوانمان يه‌كيگه‌و خوه‌زگ ئی جيازايكردن مه‌سه‌له‌ی مه‌زه‌وايه‌تيه‌ وه‌ ديديگ رووشنهويريه‌و هوير له‌لی بكريه‌يد، چوينكه‌ ئيمه‌ گشتمان يه‌كيگيم و زووان و كلتوور و فه‌رهه‌نگ و ئامانجمان له‌ی دونيا يه‌كيگه‌ ك ئه‌ويش هاوردنه‌وه‌ی هه‌قه‌يل و سه‌رفرازی رووڵه‌يل ملله‌ته‌گه‌مان وه‌گشت چين و تايفه‌و پيكهاته‌يليه‌و، دی شه‌رمه‌زاريه‌ ئه‌را هه‌ر كورديگ وه‌بی جياوازی حاشا له‌ كوردبوين و ناسنامه‌ی هاوزووانه‌يل خوه‌ی بكا، ئيمه‌ بيلا مه‌زه‌وه‌گه‌مان و شيوه‌زووانمانيش جيا بوود، وه‌لی دڵمان له‌ئاست يه‌كتری با پاك و پيكه‌رد بوود، تا وه‌ جه‌م ده‌نگه‌يلمان بتويه‌نيم قه‌ڵای خوه‌شبه‌ختی و به‌خته‌وه‌ری دامه‌زرنيم.

جه‌ماڵ ئه‌ركه‌وازی

YesIraq