2014-09-02 11:45:13

وه‌ل ئه‌وه‌يشا ماڵ سياسی شيعه‌يش له‌ناونی خوه‌يان نه‌گونجيانه‌و له‌يوا دياره‌ يه‌يش مه‌سه‌له‌يگ تر بدێ تا وه‌و بوونه‌وه‌ هه‌وڵ بيه‌ن حكوومه‌تيگ هاوشيوه‌ی حكوومه‌ت وه‌رين دروس بكه‌ن و دوياخريش هه‌ر يه‌كيگ له‌ليان وه‌جيا له‌ قه‌وڵه‌يليان په‌شيمانه‌و بوون و مه‌هانه‌يانيش ئه‌وه‌ بدێ ك شيواز هويره‌وكردنيان جياوازه‌ له‌ يه‌كتری.

دويای ئازادكردن عراق سنيه‌يل عه‌ره‌ب تويش شكه‌ست هاتن و نه‌زانستتن چوين خوه‌يان ريك بخه‌ن، ك وه‌رده‌وام كه‌فتيانه‌ شوون كرده‌وه‌يل سه‌دام حسێن، ئمجا مه‌سه‌له‌ی ئاشتی و ژيان هاوبه‌ش له‌لايان ناجوور بوی و هه‌ر له‌وه‌ر ئه‌وه‌يش له‌ يه‌كه‌م هه‌ڵوژاردن له‌ موسڵ و رومادی به‌شداری نه‌كردن و ئه‌وه‌ بوی زه‌ردمه‌ن بوين و شيعه‌ به‌ڕه‌گه‌ له‌ژير پايان ده‌ركردو دوياخريش نه‌ شيعه‌و نه‌يش سنی قانجاز كرد له‌و مه‌سه‌له‌.

له‌و وه‌خته‌يليشه‌ هه‌ردوگ سه‌رۆك"تاڵه‌بانی و بارزانی"يش هه‌وڵ فريه‌يگ دان ئه‌را ئه‌وه‌ك شيعه‌و سنی له‌يه‌كتری نزيكه‌و بوكه‌ن و وتنه‌پيان ته‌ماشای ئه‌زموون كورد بكه‌ن له‌وه‌ختيگ له‌شوون راپه‌ڕين ١٩٩١ به‌ره‌ی كوردستان هاته‌ ناو شار يه‌كه‌م بڕياری وه‌خشين گشتی بوی، ك يه‌يش له‌يوا كرد گشتلايگ جوور يه‌ك روی وه‌ڕوی به‌عس فاشيست بوونه‌وه‌و راپه‌ڕينيش سه‌ركه‌فت.

سنی و شيعه‌ گووش وه‌و قسه‌يله‌ نه‌يان تا ئه‌وه‌ بوی شۆڤێنيزمه‌يل و تونڕه‌ويگ جوور مالكی دروس بوی و ئه‌و ئاره‌زووه‌يله‌ ك سنی داشتته‌ی ناته‌ دی و بگر زوورميان له‌وه‌ر غه‌ڵه‌ت سه‌رۆك وه‌زير و غه‌ڵه‌ته‌يل خوه‌يان په‌يوه‌ندی كردنه‌ داعش و عراق عه‌ره‌بی ره‌ساننه‌ ئه‌وه‌ك ته‌نيا له‌كار خراوه‌كاری و كوشتار و گه‌ناته‌كاری يه‌كه‌م بدێ له‌ جه‌هان.

هه‌ر وه‌و خاتريشه‌ كوومه‌ڵگای ناوده‌وڵه‌تييش خاس له‌و وازيه‌يله‌ ره‌سيه‌و، هه‌ر له‌وه‌ر ئه‌وه‌يش راسه‌وخۆ سه‌رۆك ئۆباما وت: هاوكاری فيشتر عراق په‌يوه‌سه‌ وه‌ دامه‌زرانن حكوومه‌تيگ گشتلايه‌ن و هاوبه‌ش، ئمجا ئه‌گه‌ر لايه‌ن سه‌ركه‌فتگ له‌ كه‌ل شه‌يتان نانه‌ خوار و هه‌ر وه‌ ته‌مای ده‌سی ده‌سی بوود و كارت گفتگوو خاس ناريده‌ كار، ئه‌وه‌ وه‌ دڵنياييه‌و كاسه‌ی خوه‌يان وه‌رجه‌ گشت لايه‌نيگ تر پڕ له‌ خوه‌ڵ و خه‌ڕگ خه‌س ئه‌كه‌ن.

شازاد ئه‌نوه‌ر

ج . أ

YesIraq
}