2010-09-27 13:55:38

سه‌ران ڕژیم ده‌رچوود، ده‌نگ فره‌یگ له‌ ڕیكخریایه‌یل شارسانى به‌رزه‌و بویه‌ داوا له‌ دادگاى عیراقى كه‌ن ئه‌و تاوانه‌یله‌ وه‌ جینۆساید بشمارید، و سه‌رچه‌وه‌یل خه‌وه‌ردار له‌ى باوه‌ته‌ جه‌خت له‌بان ئه‌وه‌ كه‌ن ك ئى كه‌یسه‌ ك دادگاى تایبه‌ت تاوان كار له‌بانى كه‌ید پشت وه‌ ماده‌ى 12 ى قانوون تاوان یا جنایات عیراقى به‌سایه‌ له‌ توومه‌تباركردن تاوانباره‌یل.

حاكم و پسپۆر قانوونى زوهێر كازم عه‌بوود له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌وه‌ ئویشى:" پێناسه‌ یا ته‌عریف تاوانه‌یل جینۆساید وه‌ل ئه‌و تاوانه‌یله‌وه‌ پووڕیه‌ید ك ڕژیم وه‌رین دژ وه‌ كورده‌یل فه‌یلى ئه‌نجامیان دایه‌؛ ئه‌ویش وه‌ ته‌سفیركردنیان ئه‌را ده‌یشت وڵاته‌گه‌یان و زه‌فتكردن ماڵ و موڵكیان و كوشتن جایڵ و جوانه‌یلیان له‌ زندانه‌یل (نوگره‌ سه‌ڵمان) له‌ بیاوان سه‌ماوه‌ و ئه‌و زندانه‌گانتر وه‌بى هویچ سه‌نه‌د قانوونییگ یا بڕیاریگ ئه‌را جیوه‌جیكردن ئى تاوانه‌یله‌، ئى كرده‌وه‌یلیشه‌ گشتى وه‌ تاوانه‌یل جینۆساید دریه‌یده‌ قه‌ڵه‌م ك بایه‌سه‌ له‌ دادگاى تاوانباره‌یل دژ وه‌ كورد فه‌یلى بنریه‌یده‌ وه‌رچه‌و".

زوهێر كازم عه‌بوود ئه‌وه‌یشه‌ ئاشكرا كرد ك :" ئه‌و لایه‌نه‌یله‌ ك مه‌سه‌له‌ى جینۆساید وه‌رگردنه‌ بایه‌سه‌ به‌ڵگه‌نامه‌ و دیكۆمێنت دیارى پیشكه‌ش بكه‌ن تا بتویه‌نن دادگاگه‌ وه‌پى قانع بكه‌ن".

قانوون شناس و په‌رله‌مانتار وه‌رین فائزه‌ باباخان له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌وه‌ ئویشى:" ئاڕاسته‌ و ڕیڕه‌و دادگاى وه‌رین عرووبى و شۆڤینى بوى و هه‌میشه‌ كورده‌یل دویره‌و خستیان له‌ زوورمى ڕیككه‌فتننامه‌ و وتاره‌ ڕه‌سمیه‌گان، سیاسه‌ته‌گان ڕژیم وه‌رینیش ئه‌وه‌ ئاشكرا كردن ك  چه‌نى شۆڤینیه‌ له‌ جینۆسایدكردن كورده‌یل فه‌یلى وه‌ ته‌سفیر كردن و بى شوون و نوینكردن ڕووڵه‌یلیان له‌ زندانه‌یل و باره‌گایه‌یل مخابرات و چه‌ن سه‌رچاوه‌یگیش جه‌خت له‌بان ئه‌وه‌ كه‌ن ك ئه‌را به‌ره‌ یا جه‌بهه‌ى جه‌نگ دژ وه‌ ئیران كل كریان و خریانه‌ ناو كێڵگه‌ یا حه‌قله‌یل مین یا ئه‌لغام تا ڕى ئه‌را له‌شكر واز وه‌پیان بكردیان دویاى ئه‌وه‌گ وه‌شیوه‌یگ ده‌سه‌جه‌مى گشتیان له‌و شوینه‌یله‌ مردیان".

نویسه‌ر و میدیاكار ئه‌حمه‌د ئه‌لحه‌مه‌د مه‌نده‌لاوى له‌ په‌یوه‌ندیه‌گه‌ى وه‌ل ماڵپه‌ڕ شه‌فه‌ق ئویشى:"من یه‌كیگ له‌و كه‌سه‌یله‌ بویم ك هه‌وڵ فره‌یگ دام ئه‌را جه‌مه‌وكردن دیكۆمێنه‌یلیگ تاوانه‌یل ڕژیم وه‌رین ئاشكرا كه‌ن دژ وه‌ كورده‌یل فه‌یلى، و ڕه‌سیمه‌ ئه‌و ڕاسیه‌ ك ته‌نیا هووكار ئى تاوانه‌یله‌ ئه‌وه‌ بوى ك یانه‌ كورد فه‌یلین و یه‌یشه‌ ئه‌وه‌ ئاشكراكه‌ید ك ئى ڕژیمه‌ ڕژیمیگ ڕه‌گه‌زپه‌رست و شۆڤینیه‌، یه‌كیگ له‌ پیسترین كرده‌وه‌یل ڕژیم وه‌رین دژ وه‌ كورده‌یل فه‌یلى ئه‌وه‌ بوى ژنه‌یل له‌ پیاوه‌یل و مناڵه‌لیان جیاوه‌ كردن له‌ ته‌سفیر كردن و جار له‌یوا بوى ژنه‌یل ته‌سفیركردیان و پیاوه‌لیان له‌ زندان بى شوون و نوین كردیان و گشت ئى دیكۆمێنته‌یله‌ هانه‌ سه‌نته‌ر دیكۆمێَنتى ماف ئاده‌میزاد، ئه‌ى دى چه‌ مه‌نیه‌ تا ئى تاوانه‌یله‌ بخریه‌نه‌ ڕیز تاوانه‌یل جینۆساید؟".

حاكم وه‌رین و ئه‌ندام په‌رله‌مان كوردستان ڕزگار مه‌حه‌مه‌د ئه‌مین له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:" گشت ئه‌وانه‌گ بایه‌خ ده‌نه‌ مه‌سه‌له‌ى دادگایى كردن سه‌ران ڕژیم وه‌رین ك توومه‌تبارن له‌ كه‌یسه‌گه‌ى كورده‌یل فه‌یلى نه‌بایه‌ت وه‌رج دادگاگه‌ بڕیار بیه‌ن و بایه‌سه‌ چه‌وه‌ڕى بكه‌ن تا ئه‌و وه‌خته‌گ بڕیار خوه‌ى له‌ى باوه‌ته‌ ده‌ید".

داوایش له‌ ڕیكخریایه‌یل شارسانى و كه‌ناڵه‌یل ڕه‌سانن كرد ك له‌ ده‌موه‌شانن و ته‌سریحات دویره‌و بكه‌فن له‌ خاتر دابین كردن كه‌ش و هه‌وایگ گونجیاى ئه‌را ده‌ركردن بڕیار دادپه‌روه‌رانه‌یگ له‌ لایه‌ن دادگا و كاریگه‌رى له‌بانى نه‌یاشتوون.

YesIraq
}