2019-12-14 14:15:27

شه‌فه‌ق نيوز/ وه‌ بوونه‌ى 67ه‌مين ساڵياد دامه‌زرانن يه‌كێتى ژنه‌يل كوردستان، مه‌سعود بارزانى په‌يانيگ پيرۆزبايى ئاراسته‌ى ژنه‌يل كوردستان كرد و له‌تى جه‌خت له‌وه‌ كرد باوه‌ڕى ئه‌وه‌سه‌ يه‌كێتى ژنه‌يل كوردستان وه‌رده‌وام ئه‌دێ له‌ مقه‌يه‌تيكردن له‌ ئاسته‌ مێژوويى و ئه‌نجامداين رۆڵه‌ كاراگه‌ى و ئه‌ركه‌ پيرووزه‌گه‌ێ.

 

بارزانى وه‌و بوونه‌وه‌ى وت: له‌ دڵه‌و پيرووزبايى له‌ سكرتێر و ئه‌ندامه‌يل مه‌كته‌ب سكرتاريه‌ت و ئه‌ندامه‌يل ئه‌نجومه‌ن باڵاى يه‌كێتى ژنه‌يل كوردستان ئه‌كه‌يم و ده‌وام سه‌ركه‌فتن ئه‌رايان ئه‌خوازيم.

 

بارزانى له‌ په‌يامه‌گه‌ێ ئه‌را ريكخرياگ يه‌كێتى ژنه‌يل كوردستان وت: وه‌ دريژايى ته‌مه‌نى و له‌گشت قۆناغه‌يل، مێژوو پرشنگداريگ پڕ له‌ شانازى داشتگه‌و خه‌بات كردگه‌ وه‌خاتر وه‌رگرى له‌ ماف ئافره‌ته‌يل له‌لايگ و هه‌ڵويست رووشن نه‌ته‌وه‌يى و نيشتمانى له‌لايگ تره‌و.

 

بارزانى وت: ئيمه‌يش له‌لايه‌ن خوه‌مانه‌و وه‌گووره‌ى تواناو وه‌بى دريغى پشتگيرى له‌ ريكخرياگ يه‌كێتى ژنه‌يل كوردستان و به‌شداريكردن كاراى ئافره‌ته‌يل ئه‌كه‌يم له‌ ژيان كۆمه‌ڵگا.

 

لاى خوه‌ييشه‌و، نێچيروان بارزانى سه‌رۆك هه‌رێم كوردستان، له‌به‌ياننامه‌يگ وه‌و بوونه‌وه‌ وت: گشت قه‌يران و جه‌نگه‌يليگ كۆمه‌ڵگا شيونێد و گامه‌يل دويا ئه‌خا و تون وتيژى ئه‌گرێده‌ وه‌ر، ژنه‌يليش قوربانى سه‌ره‌كى ئى بارودوخه‌نه‌، هه‌ر وه‌و خاتريشه‌ ئمڕوو له‌وه‌ر ئه‌نجامداين ئى ئه‌ركه‌ جه‌خت له‌ وه‌رده‌وامى و هه‌ماهه‌نگ سه‌رۆكايه‌تى هه‌رێم كوردستان ئه‌كه‌يم وه‌ل ده‌سه‌ڵات جيوه‌جيكار و كۆمه‌ڵگاى مه‌ده‌نى و پياوه‌يل ئايينى و ئاژانسه‌يل نه‌ته‌وه‌يل يه‌كگرتگ و ريكخرياگه‌يل ناوچه‌يى و ناوده‌وڵه‌تى.

}