تەقەلا ئەرا وسانن تەعریب دووباره‌ کەرکوک

Category: هــــه‌واڵ كــوردى

Date: 2020-06-15T16:34:11+0000

شەفەق نیوز/ ناسر هەرکی، ئەندام دەسەی ئەمنو وەرگری پەڕلەمانی، ئمڕوو دووشەممە، ئاشکرای هەوڵدانیگ كرد ک دەسەگەی کردگەسەی ئەرا وسانن تەعریب نوویگ لە پارێزگای کەرکوک.
راکان جبوری جینشین پارێزگار کەرکوک لە روژ ١٧ ئایار وەرین پەیامیگ رەوانە کردوید ئەرا بارەگای پێشەنگ ئۆپراسیۆنە هاوبەشەگان لە کەرکوک، له‌تی دوا وە جیگرکردن هاووڵاتییل عەرەب کەێد، لە هووز شەمەر لە ماڵەیل دانیشتوه‌یل لە پارێزگاگە، هەرچەن خوەیان دویای ساڵ ٢٠٠٣ لەتی کۆچ کردنە، ودەرکردن ئەوانەگ ئیسە هانەناوی.
هەرکی ئەرا ئاژانس شەفەق نیوز وت؛ سەردان فەرماندەی ئۆپراسیۆنەگان کەرکوک کردیمن، ئەرا دووپاتکردن لە وسانن پەیامه‌یل پەیوەندی دار وە زەویە کوردیەگان لە شار کەرکوک، وئاماژەدا ئی ناوچەیلە ململانە هابانیان و پابەندوە وه‌ ماده‌ ١٤٠ له‌ دەستور عراقی.
هەمیش وت؛ ئی ناوچەیلە هیمان رەوشیان یەکلاوە نەویە لە لایەن حکومەت عراق و حکومەت هەرێم کوردستان، وئی کارە سیاسیە نەگ وەڕیەوبردنی.
هەرکی لەزوان سەعەد حەربیە فەرماندەی ئۆپراسیۆن کەرکوک باس كرد ک پەیمان داگە وە وسانن جیوەجیکردن گشت پەیامەگان ئەوەگ پەیوەندی وەرەوش زەویەگان پاریزگای کەرکوک دیرێد.
کەرکوک و ناوچە دابڕیایەگان کەفتنە وەر کارەیل ئاڵشتکاری دیمۆگڕافی وەشیوەیگ گەورایگ لە سەردەم رژیم وەرین، ئەرا بەرژەوەنی عەرەب لەبان ماف کورد و تورکمان.
چوونکە رژیم وەرین هاووڵاتیەیل کورد و تورکمان دەرکریاد لە ماڵ وزەویەیل کشتوکاڵییان، ئه‌را عەرەویلیگ هاوردیادەیان لە پارێزگایل تر.
دویای رمانن رژیم وەرین عراق له‌ ساڵ ٢٠٠٣ ، فرە له‌ هاوڵاتیەیل کورد هاتنەو ئەرا ماڵەیلیان و زەوی کشتوکاڵییان وەپەی یاسای ١٤٠ لە دەستور عراقی، ک باس لاوردن سیاسەت ئاڵشتکردن دیمۆگڕافی کەێد، وئیجا سه‌رشماری دانیشتوەیل، جوور زەمینەیگ ئەرا دویاترین قۆناغ، وە جیهاوردن ریفڕاندۆمیگ، هاووڵاتیەیل وەپی پەسەن کەن یا چگنە ناو هەرێم کوردستان، یا حکومەت فیدڕاڵی لە بەغداد.
بڕیاربوی ساڵ ٢٠١٤ کۆتایی وە جیوەجیکردن یاسای ١٤٠ بهاتیاد، بەڵکم هەرێم کوردستان فرەجار پەنچەیل تومەت ئەرا دەسڵات فیدڕاڵی دڕا کرد وەپەکخستن یەکلاکردنەوەی ململانەگە لەباوەت ئەو ناوچەیلە.