کەرەنتین دوو ئەندام ئەمنی و تووشهاتن ١٦٤ کەس وە ڤایڕۆس کٶڕۆنا لە دوو پارێزگا

Category: هــــه‌واڵ عــیراق

Date: 2020-06-21T13:04:58+0000

شەفەق نیوز/ سەرچەوەیلیگ پزشکی، ئمڕوو یەکشەممە، خەوەردان لە تووشهاتن دوو ئەندام ئەمنی و دەور ١٦٤ هاوولاتی وەڤایڕۆس کۆڕۆنا لە کەربەلا وزیقار، لە خود وەختەگە باس لە مردن ئەندامیگ لە واسیت كردن.
سەرچەوەیگ لە کەربەلا ئەرا ئاژانس شەفەق نیوز وت: زیاتر لە ئەندامیگ لە بەش خاڵە وەشكنینەگان و ریە دیشتیەگان لە پۆلیس پارێزگاگە ئمڕو تووشهاتنیان وە ڤایرۆس کۆڕۆنا دووپاتکریا لە پارێزگاگە ، وئاماژەدا ک زیاتر لە ٤٠ ئەندام کەرەنتین کریان لەوەر وەقەیداین تووشهاتگەیل.
لە ناسریە ناوەند پارێزگای زیقار، سەرچەوەیگ پزشکی خەوەردا لە تۆمارکردن ١٦٤ تووشهاتگ نوو وە ڤایرۆس کۆرۆنا لە پارێزگای زیقار.
لە پارێزگای واسیت، بەش راگەیانن لە وەڕیەوبەرایەتی پۆلیس پارێزگای واسیت پرسەو سەرەخوەشی ئەرا مفەوز جەبار حەسەن عروج زاملی کرد، ک ئەندام بەش مقەیەتی دامەزراوەگانە، ک کۆج دویایی کرد لەوەر تووشهاتنی وە ڤایڕۆس کۆرۆنا. وەڕیەوبەرایەتی پۆلیس پارێزگاگە پرسەو سەرەخوەشی ئەرا کەسوکاری کردن.
ژمارەی تووشهاتگەیل ڤایڕۆس کۆرۆنا لە روژەیل وەرین لە عراق زیایەو بوی وەشیوەیگ ئاشکرا، وهەژمار تووشهاتگەیل لە هەزاران رەدکرد لە ماوەی چەن روژیگ، ک بویە مەترسی گەورایگ لە فرەوەبوین پەتاگە.
وەزارەت تەندروسی عراق، دویەکە شەممە، ئاشکرای تۆمارکردن ٨٨ مردگ و ١٨٧٠ تووشهاتگ نوو وە ڤایڕۆس کۆرۆنا لە ماوەی ٢٤ ساعەت كرد ك ئەیە بەرزترین ژمارەس لە وەخت دیارکەفتن پەتاگە، ک ئامار تووشهاتنەگەی پیرەکەی جومعە ١٦٣٥ کەس بوی، و بەرزترین رێژەی مردگ وەڤایڕۆسەگە ٨٣ کەس بوی لە روژ پەنجشەممەی وەرین.