2019-01-19 07:54:00

شه‌فه‌ق نيوز/ عه‌بدولحسێن عه‌بتان وه‌زير وه‌رين لاوان و وه‌رزش ده‌س له‌ ئه‌ندامێتى خوه‌ى له‌ ئه‌نجومه‌ن نوێنه‌ره‌يل له‌بان ره‌وت حيكمه‌ وه‌ سه‌رۆكايه‌تى عه‌مار حه‌كيم كيشاوه‌و بويه‌سه‌ جێ مشتومڕ هيزه‌يل سياسى و جه‌ماوه‌رێ به‌غدادى دوياى باسكردن ئه‌را له‌باره‌ى وه‌رگرتن پۆست ئه‌ميندار به‌غدا ك راسه‌وخۆ له‌لايه‌ن سه‌رۆك وه‌زيره‌يله‌و دامه‌زريه‌ێد وه‌ گووره‌ى ياسا.

 

له‌ى باوه‌ته‌و، سه‌رچه‌وه‌يليگ باس له‌وه‌ كردن ك ريككه‌فتنيگ سياسى هه‌س له‌ناونى كوتله‌و حزبه‌يل سياسى له‌بان وه‌رگرتن پۆست ئه‌ميندار  به‌غدا له‌لايه‌ن عه‌بتانه‌و ك وه‌گووره‌ى ئه‌و ريككه‌فتنه‌ وه‌رپرسيارێتى به‌غداى پايته‌خت ئه‌گرێده‌ ده‌س بيجگه‌ شاره‌وانيه‌يل سه‌ر وه‌ ئداره‌گه‌و ئه‌دێده‌ وه‌رپرس له‌بان پاكه‌وكردن شار و جوانكردنه‌وه‌ى و سازكردن چالاكيه‌يل تر و له‌وانه‌يش بوونه‌و ئاهه‌نگه‌يل ساڵانه‌ جوور فيستيڤاڵ گوڵه‌يل ناوده‌وڵه‌تى.

 

يه‌يش له‌ وه‌ختيگه‌ مه‌سه‌له‌ى ناكووكى ناونى ره‌وت حيكمه‌و عه‌سايب ئه‌هل حه‌ق وجوود ديرێد و كوتله‌ى سادقون باڵ سياسى عه‌سايب داوا له‌ هه‌رسێ سه‌رۆكايه‌تى كرد پۆست ئه‌ميندار به‌غدا بدريه‌ێده‌ كه‌سايه‌تييگ سنى له‌ به‌غداديه‌يل ره‌سه‌ن و يه‌يش وه‌ ئنساف تاريف كرد ك وه‌لاى كه‌مه‌و شاره‌زايى ئدارى و ته‌كنيكى داشتوود.

 

جى باسه‌، يه‌يش له‌ وه‌ختيگه‌ عه‌بتان رۆڵ ديارييگ داشت له‌ به‌رزه‌وكردن گه‌مارۆ له‌بان وازيگايه‌يل عراقى ك له‌لايه‌ن فيفاوه‌ چه‌سپنريا له‌بان وازيگايه‌يل، ئه‌ويش وه‌ دروشكردن وازيگايه‌يل تر وه‌رزشى له‌وه‌ختيگ وه‌زير لاوان بوێ له‌ حكومه‌ت عه‌بادى.

YesIraq